އައްޑޫ ސިޓީގައި ރޭ ޕިކަޕެއްގައި އަލިފާން ރޯވެ، ހިނގި ހާދިސާއެއް ފުލުހުން ބަލަން ފަށައިފިއެވެ.
މިކަމާ ގުޅިގެން ފުލުހުން މިއަދު ބުނީ، ރޭ ދަންވަރު 12:56 ހާއިރު އައްޑޫ ހައި ސްކޫލް ކައިރީގައި ހުންނަ "ކާ ސާވް އޮޓޯ ރިޕެއާ ސާވިސް" ގަރާޖު ކުރިމަތީ ބާއްވާފައި އޮތް ޕިކަޕެއްގައި އަލިފާން ރޯވެފައިވާ މައްސަލައެއް ފުލުހުންނަށް ހުށަހަޅާފައިވާ ކަމަށެވެ.
ޕިކަޕުގައި ރޯވި އަލިފާން ނިއްވާލާފައި ވަނީ އެ ސަރަހައްދުގައި އުޅުނު އާންމުންގެ މަސައްކަތުން ކަމަށް ފުލުހުން ބުނެއެވެ. އަދި މި ހާދިސާގައި އެއްވެސް މީހަކަށް އަނިޔާވެފައި ނުވާއިރު، ޕިކަޕަށް ވަރަށް ބޮޑަށް ގެއްލުން ވެފައިވާ ކަމަށް ފުލުހުން ބުނެއެވެ. އެގޮތުން އަލިފާނުގެ ސަބަބުން ޕިކަޕުގެ ކުރީކޮޅަށް ގެއްލުން ވެފައިވާ ކަމަށް ފުލުހުން މައުލޫމާތު ދެއެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ރޭ ފުލުހުން މައުލޫމާތު ދީފައިވާ ގޮތުގައި އައްޑޫ ހައި ސްކޫލު ކައިރީގައި އޮތް ޕިކަޕެއްގައި ރޯކޮށްލި މައްސަލަ ވަނީ ހުށަހަޅާފައެވެ. އެހެންކަމުން މި ހާދިސާއަކީ ބަޔަކު ގަސްތުގައި ކުރި ކަމެއް ކަން ނުވަތަ ނޫން ކަން ސާފުވާގޮތް ނުވެފައެވެ.
އައްޑޫގައި ޕިކަޕެއްގައި ރޯވެ އަލިފާނުގެ ހާދިސާއެއް ހިނގާފައި ވާއިރު، ގަސްތުގައި މުދަލަށް ގެއްލުން ދިނުމަކީ ގާނޫނީ ގޮތުން މަނާ ކަމެކެވެ. އެގޮތުން ގަސްތުގައި މީހުންގެ މުދަލަށް ގެއްލުން ދޭ މީހުންނާމެދު ފުލުހުން ދަނީ ފިޔަވަޅު ވެސް އަޅަމުންނެވެ. އެގޮތުން މިދިޔަ އޮގަސްޓް މަސް ތެރޭގައި ގދ ތިނަދޫގައި މަސައްކަތް ކުރާ ފުލުހެއްގެ ސައިކަލުގައި ރޯކޮށް އަންދާލި މައްސަލާގައި 3 މީހަކު ވަނީ ހައްޔަރު ވެސް ކޮށްފައެވެ.
