ރުޤްޔާގެ ނަމުގައި އަންހެނުންނަށް ގޯނާ ކުރުމަކީ ބަލައި ގަނެވޭނެ ކްމެއް ނޫން ކަމަށް ވިދާޅުވެ ޖެންޑާ މިނިސްޓަރު އައިޝަތު މުހައްމަދު ދީދީ ކަންބޮޑުވުން ފާޅުކުރައްވައިފިއެވެ.
މިނިސްޓަރު އައިޝާ ވަނީ މިފަދަ ކަންކަމަށް ސަމާލުވުމަށާއި، ލިބެނީ އަނިޔާކަން އެނގޭ ހިސާބުން ރިޕޯޓް ކުރުމަށް އިލްތިމާސްކުރައްވާފައެވެ. އަދި އަނިޔާއާ ދެކޮޅަށް އެންމެން އެކީގައި ތެދުވެ، މުޖުތަމައެއްގެ ގޮތުގައި ހުރިހާ ބާވަތެއްގެ އަނިޔާއަށް ވެސް ނޫނެކޭ ބުނަން ޖެހޭ ކަމަށް އޭނާ ވިދާޅުވިއެވެ.
މިނިސްޓަރު އައިޝާ މިހެން ވިދާޅުވީ، ރުޤްޔާ ކުރުމުގެ ނަމުގައި އަންހެނަކަށާއި އޭނާގެ 3 ދަރިންނަށް އަނިޔާ އާއި ޖިންސީ ގޯނާ ކުރި މައްސަލައެއް ފެންމަތިވުމާ ގުޅިގެންނެވެ. 3 މަސް ވަންދެން ބަންދުތަނެއްގައި ބައިތިއްބައިގެން 4 މައިންނަށް ކުރި އަނިޔާތައް ތަފްސީލާއެކު ނޫހެއްގައި ޝާއިއު ކުރުމާ ގުޅިގެން އެ މައްސަލަ ވަނީ ހޫނުވެފައެވެ.
އަދި މިހާރު މި މައްސަލާގައި އަނިޔާ ލިބިފައިވާ ފަރާތްތަކަށް ބޭނުންވާ އެހީތެރިކަމާއި ރައްކާތެރިކަން ޖެންޑް މިނިސްޓްރީން ކަށަވަރު ކޮށްފައިވާ ކަމަށް ވެސް އެ މިނިސްޓްރީން ވަނީ ބުނެފައެވެ.
މި މައްސަލައާ ގުޅިގެން ބައެއް ދީނީ ފަރާތްތަކުން ވެސް ދަނީ ހިޔާލު ފާޅު ކުރަމުންނެވެ. އެގޮތުން، މިކަމަ ކަންބޮޑުވުން ފާޅު ކުރައްވާ ޝެއިހް އަލީ ޒައިދު ވަނީ އަނިޔާ ލިބުނު އަންހެން މީހާ ފިރިމީހާއާއެކު ޖިމާއުވުމަށްފަހު ރުޤްޔާ ކުރާ މީހާ ކަމަށް ބުނާ މީހާއަށް ސަޖިދަ ޖަހަން ބުނާ ކަމަށް އެ އަންހެން މީހާ ބުނެފައިވާ ކަން ފާހަގަ ކުރައްވާފައެވެ. އަދި މިފަދަ ކަމެއް ކުރަން ބުނުމަކީ އެއީ ރުޤްޔާ ކުރާ މީހެއްގެ ކިބައިގައި ހުންނާނެ ސިފައެއް ނޫން ކަމަށާއި، އެއީ ސިހުރުވެރިއެއްގެ ކިބައިގައި ހުންނާނެ ކަމެއް ކަމަށް އޭނާ ވިދާޅުވިއެވެ.
