މާލޭގައި މަގުމަތިވެފައިވާ މީހުންގެ އަދަދު އިތުރުވަމުން ދާތީ އެފަދަ މީހުންނަށް ވަގުތީ ހިޔާއެއް ހަމަޖެއްސުމުގެ މަސައްކަތް ކުރަމުންދާ ކަމަށް ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވެއްޖެއެވެ.
މިނިސްޓަރު އައިޝާ މިއަދު ކުރެއްވި ޓްވީޓެއްގައި ވިދާޅުވީ، މާލޭ މަގުމަތީގައި މީހުން ދިރިއުޅެމުން ދާތީ، އެކަމުގެ ކަންބޮޑުވުން ގިނަ ފަރާތްތަކުން ފާޅު ކުރަމުން ދާ ކަމަށެވެ. އަދި މިދިޔަ އޭޕްރީލް މަހުން ފެށިގެން ޖެންޑާ މިނިސްޓްރީން އެފަދަ 500 އަށް ވުރެ ގިނަ މީހުންނަށް އެހީތެރިކަން ފޯރުކޮށް ދީފައިވާ ކަމަށް މިނިސްޓަރު ވިދާޅުވިއެވެ.
އެފަދަ ފަރާތްތަކަށް އެހީތެރިކަން ފޯރުކޮށް ދިނުމުގެ ގޮތުން ޖެންޑާ މިނިސްޓްރީން އެމީހުންނަށް ވަގުތީ ހިޔާ އާއި ކާނާ ހަމަޖައްސާފައި ވާއިރު، އެފަދަ ފަރާތްތަކަށް އަނބުރާ އެމީހުންގެ ރަށްރަށަށް ދެވޭނެ އިންތިޒާމް ހަމަޖެއްސުމަށް ރަށު ކައުންސިލްތަކާއެކު މަސައްކަތް ކޮށްފައިވާ ކަމަށް ވެސް ޖެންޑާ މިނިސްޓަރު ވިދާޅުވިއެވެ.
މިނިސްޓަރު އައިޝާ ވިދާޅުވީ، ވަގުތީ ހިޔާތަކުގެ މަސައްކަތް މިދިޔަ އޮގަސްޓް މަސް ތެރޭގައި މެދު ކަނޑާލި ނަމަވެސް، ވަގުތީ ޑީޓޮކްސްގެ މަސައްކަތް މާލޭގައި އަދިވެސް ކުރިއަށް ގެންދަމުންދާ ކަމަށެވެ. އަދި ހޯމް މިނިސްޓްރީއާ ގުޅިގެން އަނެއްކާވެސް ވަގުތީ ހިޔާ ގާއިމް ކުރުމުގެ މަސައްކަތް ކުރަމުންދާ ކަމަށް މިނިސްޓަރު އައިޝާ ވިދާޅުވިއެވެ. އެހެންކަމުން ކުރިއެކޭ އެއްފަދައިން މަލޭ މާރުކޭޓު ސަރަހައްދާއި މަގުމަތީގައި ދިރިއުޅެމުންދާ މީހުންނަށް އެހީތެރިކަން ފޯރުކޮށް ދޭނެ ކަމަށް އޭނާ ވިދާޅުވިއެވެ.
މީގެ އިތުރުން، ވަޒީފާތައް ގެއްލުމުގެ ސަބަބުން މާލީ ދަތިތައް ކުރިމަތި ވެފައިވާ އާއިލާތަކަށް މާލެ ނޫން އެހެން ތަންތަނަށް ދިރިއުޅުން ބަދަލު ކުރުމަށް އެންސްޕާއާ ގުޅިގެން މަސައްކަތް ކުރަމުންދާ ކަމަށް ވެސް ޖެންޑާ މިނިސްޓަރު ވިދާޅުވިއެވެ.
މިސްކިތްތަކުގައި ނިދާ ކައިބޮއި ހަދާ މީހުންގެ މައްސަލައަށް ހައްލެއް ހޯދުމަށް މަސައްކަތްތަކެއް ފަށައިފައިވާ ކަމަށް އިއްޔެ ހޯމް މިނިސްޓްރީން ވެސް ވަނީ ހާމަ ކޮށްފައެވެ.
