އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައި ހިމަނާފައި ހުރި ކަންކަމަށް ބޭނުންވާ ފައިސާ ހޯދައިގެން އެކަންކަން ކުރެވިދާނެކަމަށް ގަބޫލު ކުރާނެ މީހަކު ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ، ބަޖެޓުގައި ހުރި ކަންކަން ކުރެވިދާނެ ކަމަށް ގަބޫލު ކުރާނެ މީހަކު މި ރާއްޖޭގައި ނެތް ކަމަށެވެ. ނަމަވެސް މި ކަންކަން ކުރެވިދާނެ ކަމަށް ބަލައިގެން ބަޖެޓު ފާސް ކުރެވިދާނެ ކަމަށާއި، ނަމަވެސް އެއީ ވަރަށް ޒިންމާދާރުކަން ކުޑަ އަމަލެއް ކަމަށް އެމަނކިކުފާނު ފާހަގަ ކުރެއްވިއެވެ.
ނަޝީދު މިހެން ވިދާޅުވީ ބަޖެޓު ބަހުސްގައި ބިލެއްދޫ ދާއިރާގެ މެންބަރު އަހްމަދު ހަލީމް (ދޮންބިލެއް) އުފެއްދެވި ސުވާލަކާ ގުޅިގެންނެވެ. އެގޮތުން އޭނާ ވަނީ ބަޖެޓުގައި ހިމަނާފައި ވަނީ ކުރަން ހިތުލާފައި ހުންނަ ކަންތައްތޯ ނުވަތަ ފޮތް ފުރާލަން ލިޔެފަ ހުންނަ އެއްޗެހިތޯ ސުވާލު އުފައްދާފައެވެ.
މީގެ އިތުރުން، ބަހުސް ކުރައްވަމުން ބައެއް މެންބަރުން ވަނީ ނުވާނެ ކަންތައް ބަޖެޓުގައި ޖެހުމުގެ ބޭނުމެއް ނެތް ކަމަށާއި، ބަޖެޓު އަނބުރާ ގެންގޮސް، ކުޑަ ކުރުމަށް ގޮވާލައްވާފައެވެ. މިކަމާ ގުޅިގެން ވެސް ނަޝިދު ވަނީ ވާހަކަފުޅު ދައްކަވާފައެވެ.
ނަޝީދު ވިދާޅުވީ ސީދާ ކުރެވެން ހުރި ކަންކަމަށް ބަޖެޓު އެކުލަވާލީމައި ޑެފިސިޓް ކުޑަވާނެ ކަމަށާއި، އެކަން ކުރެވުމުން ބަޖެޓް ރީތިކޮށް ފެންނާނެ ކަމަށެވެ. އަދި ބަޖެޓް ރީތިކޮށް ފެނުނު ވަރަކަށް ރާއްޖޭގެ މާލީ އިދާރާތަކަށް އިތުބާރު ކުރެވޭނެ ކަމަށް އެމަނިކުފާނު ވިދާޅުވިއެވެ. އަދި މިހާރު ބަޖެޓް އޮތް ގޮތަށް ފާސްކޮށްފި ނަމަ ރާއްޖޭގެ މާލިއްޔަތަށް އޮތް އިތުބާރު ކުޑަ ވާނެ ކަމަށް ވެސް ނަޝީދު ވިދާޅުވިއެވެ.
