މާލޭ ސަރަހައްދުގައި އާންމު ދަތުރުފަތުރުގެ ހިދުމަތް ތަރައްގީ ކުރުމަށް ވަމުންދާ ތައްޔާރީތައް ނައިބު ރައީސް ފައިސަލް ނަސީމް މިއަދު ބައްލަވާލައްވައިފިއެވެ.
ރައީސް އޮފީހުން ބުނީ ނައިބު ރައީސް މިއަދު ހަވީރު ވަނީ، މާލެ ސަރަހައްދުގެ އާންމު ދަތުރުފަތުރުގެ ހިދުމަތް ފުޅާކުރުމުގެ ގޮތުން ވެސްޓުޕާކު ސަރަހައްދުގައި ސްޓޭޓް ޓްރޭޑިންގް އޮގަނައިޒޭޝަން (އެސްޓީއޯ) އިން ތަރައްގީކުރަމުން ގެންދާ ބަސްހުއްޓި ބިނާކުރުމުގެ މަސައްކަތް ގޮސްފައިވާ ހިސާބު ބައްލަވާލައްވާފައި ކަމަށެވެ.
އަދި ކުރީގެ ދަރުމަވަންތަ ސްކޫލް ހުރި ސަރަޙައްދު ސާފުކުރުމަށްފަހު އެ ސަރަޙައްދުގައި މާލޭ ސިޓީ ކައުންސިލްގެ ފަރާތުން އަލަށް ހަދަމުންދާ ޕާކިންގް ޒޯނުގެ މަސައްކަތް ކުރިއަށްދާގޮތް ބައްލަވާލައްވާފައިވާ ކަމަށައި ނައިބު ރައީސްގެ އެ ޒިޔާރަތުގައި ވަނީ އާންމު ދަތުރުފަތުރުގެ ނިޒާމު ހަރުދަނާކުރުމުގެ މަސައްކަތުގައި ޝާމިލުވާ އެސްޓީއޯ އާއި މާލެ ސިޓީ ކައުންސިލްގެ އިސް ބޭފުޅުންނާ ބައްދަލުކުރައްވާފައި ކަމަށެވެ.
އެ ބޭފުޅުންނާއި ބައްދަލުކުރައްވާ މަޝްވަރާ ކުރައްވާފައިވާއިރު، މާލެ ސަރަހައްދުގެ އާންމު ދަތުރުފަތުރުގެ ނިޒާމުގެ މަސައްކަތުގެ ތެރެއިން މާލޭގެ ކާރޫބާރޫ ބޮޑު ޓްރެފިކަށް ލުޔެއް ލިބޭނޭހެން ކަންތައްތައް އިންތިޒާމް ކުރަމުން ގެންދިއުމަށް ނައިބު، އެ ބޭފުޅުންނަށް އިރުޝާދުދެއްވާފައިވާ ކަމަށްވެަސް ރައީސް އޮފީހުން ބުނެއެވެ.
ނައިބުގެ އެ ޒިޔާރަތުގައި އަރިހުގައި ވަޑައިގަތީ، މިނިސްޓާ އޮފް ހެލްތު އަހްމަދު ނަސީމާއި، މިނިސްޓާ އޮފް ސްޓޭޓް ފޯ ޓްރާންސްޕޯޓް އެންޑް ސިވިލް އޭވިއޭޝަން އަހްމަދު އާދިލާއި، މާލޭ ސިޓީ ކައުންސިލްގެ މޭޔަރު ޝިފާ މުހައްމަދާއި ރައީސްގެ އޮފީހުގެ މިނިސްޓަރު އަހްމަދު ސަމީރެވެ.
