ބޯކޮށްވާރޭވެހި ޅ. ނައިފަރުގައި ފެންބޮޑުވެއްޖެއެވެ.
އެމްއެންޑީއެފުން ބުނީ އުތުރުގެ އަތޮޅުތަކަށް ކުރަމުންދާ ވިއްސާރައިގައި ނައިފަރުގެ ބައެއް ސަރައްދުތަކުގައި ފެންބޮޑުވެފައިވާކަމުގެ ރިޕޯޓް ލިބިފައި ވަނީ މިއަދު 13:55 ހާއިރު ކަމަށެވެ.
އެގޮތުން މިހާރު ފެން ހިންދުމުގެ މަސައްކަތުގައި އެމްއެންޑީއެފް ނޮދަން އޭރިއާ ސިފައިން ހަރަކާތްތެރިވަމުންދާ ކަމަށެވެ.
މޯލްޑިވްސް މީޓިއޮރޮލޮޖިކަލް ސާވިސް އިން ވަނީ ހއ އަތޮޅުން ޅ އަތޮޅާ ދެމެދަށް ވައިޓް އެލާޓް ނެރެފައެވެ. މެޓް އޮފީހުން ބުނީ، ހަވީރު 4:00 އިން ފެށިގެން މިރޭ 9:00 އާ ދެމެދު މި ސަރަހައްދަށް ބޯކޮށް ވާރޭ ވެހުމާއެކު ގުގުރުން އެކަށީގެން ވާކަމަށެވެ.
މީގެ އިތުރުން މޫސުމާ ބެހޭ އިދާރާއިން މިއަދުގެ މޫސުން ލަފާކޮށް ބުނެފައިވަނީ، އުތުރާއި މެދުރާއްޖެތެރޭ އަތޮޅުތަކަށް އިރު އުތުރާއި އިރުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި އަދި ދެކުނު އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު 3 މޭލާއި 13 މޭލާ ދެމެދުގެ ބާރުމިނުގައި ވައިޖެހޭނެ ކަމަށައި ވިލާގަނޑުގައި ގަޑިއަކު 35 މޭލު ބާރުމިނަށް ވައި ގަދަވުން އެކަށީގެންވާ ކަމަށެވެ.
ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް މެޓް އޮފީހުން ބުނެއެވެ.
