ބެންކް އޮފް ސިލޯނަށް ފައިސާ ޖަމާކުރުމަށް ދިޔަ ރޫޓް ގެ ވެހިކަލްގައި ތިބި މުވައްޒަފުންނަށް ހަމަލާދީ، އެ ވެހިކަލްގައި ހުރި ފައިސާ ފޭރެން އުޅުނު މީހުން ހުއްޓުވައި އެ ފޭރުން ނާކާމިޔާބު ކޮށްލި އެބްސޮލިއުޓް ސެކިއުރިޓީ އެންޑް އެޑްވާންސް ޕްރޮޓެކްޝަން ޕްރައިވެޓް ލިމިޓެޑްގެ ސެކިއުރިޓީ ގާޑު އަހްމަދު ހަސަން މަނިކުގެ އަގުވަޒަންކޮށް ފުލުހުންގެ ފަރާތުން ހަނދާނީ ލިޔުން ދީފިއެވެ.
ފުލުހުން ބުނީ އެ ހަނދާނީ ލިޔުން ހަސަން މަނިކާ ހަވާލުކޮށްދެއްވާފައި ވަނީ އެކަމަށްޓަކައި އިއްޔެ އިސްކަންދަރު ބިލްޑިންގގައި ބޭއްވި ރަސްމިއްޔާތުގައި އެސިސްޓެންޓް ކޮމިޝަނާ އޮފް ޕޮލިސް އިސްމާއީލް ނަވީން ކަމަށެވެ.
އަގު ވަޒަންކޮށް ހަނދާނީ ލިޔުން ހަވާލުކޮށްދެއްވާ އިސްމާއީލް ނަވީން ދެއްކެވި ވާހަކަގައި، އަޙްމަދު ހަސަން މަނިކުގެ ޖެހިލުންކުޑަކަމާ ހިތްވަރު ފާހަގަ ކުރައްވާ އެކަމަށް ޝުކުރު އަދާކުރެއްވިއެވެ.
އަދި ދިވެހިންގެ ތެރޭގައި މަދުންނަމަވެސް މިކަހަލަ ކަންކަން ހުއްޓުވަން މަސައްކަތްކުރާ މީހުން އުޅޭ ކަން ފާހަގަކުރެއްވާ، ބޮޑެތި ހާދިސާ ތަކުގައި ފުލުހުންނަށް ވެސް އެހީތެރިކަން ފޯރުކޮށްދެމުންދާކަން ވަނީ ފާހަގަކުރައްވާފައެވެ. އާންމު ރައްޔިތުންގެ ފަރާތުން ފުލުހުންނަށް ލިބެމުންދާ އެއްބާރުލުމަށް ނަވީން ވަނީ ޝުކުރު އަދާކުރައްވާފައެވެ.
އެ ބައްދަލުވުމުގައި ފުލުހުންގެ ބައެއް އޮފިސަރުންނާއި، އެބްސޮލިއުޓް ސެކިއުރިޓީ އެންޑް އެޑްވާންސް ޕްރޮޓެކްޝަން ޕްރައިވެޓް ލިމިޓެޑްގެ އިސްވެރިންގެ އިތުރުން ރޫޓްގެ ފަރާތުން ބައިވެރިވިއެވެ.
ފުލުހުން ހަސަން މަނިކްގެ އަގުވަޒަން ކޮށްފައިވާއިރު، ސައިކަލެއްގައި އައި ހަތަރު މިހަކު ފޭރެން އުޅުމުން އެކަން ހުއްޓުވަން މަަސައްކަތް ކުރި 4 މީހުންގެ އަގުވަޒަންކޮށް ރޫޓް ފިހާރައިން ވަނީ ފައިސާގެ އިނާމު ދީފައެވެ. އެގޮތުން ސެކިއުރިޓީ ގާޑަށް ރޫޓްގެ ފަރާތުން ވަނީ 50،000 ރުފިޔާ ދީފައެވެ. އަދި ތިން މުވައްޒަފުންނަށް ވަނީ 10.000 ރުފިޔާ ދީފައެވެ. އެ ތިން މުވައްޒަފުންނަކީ، ފޭރެން އައި މީހެއްގެ ލޮލަށް ބޮޑީ ސްޕްރޭ ޖެހި މަރިޔަމް ޖީލާ އާއި އެ ކުންފުނީގެ ޑްރައިވަރު ބާދުޝާހު އާއި ލޭބަރެއްގެ ގޮތުގައި މަސައްކަތްކުރާ ޖަލާލުއްދީނެވެ.
