ހެންވޭރު ރާޅުގަނޑު ސަރަހައްދު ގެއަކުން ނިޔާވެފައި އޮތް ބިދޭސީއަކު ފެނިއްޖެއެވެ.
މިކަމާ ގުޅިގެން 'ދަ ޕްރެސް' އަށް މައުލޫމާތު ދެއްވަމުން ފުލުހުން ބުނީ، މިއަދު ހެނދުނު 10:47 ހާއިރު ގެއަކުން ނިޔަވެފައިވާ މީހަކު ފެނިގެން ރިޕޯޓް ކޮށްފައިވާ ކަމަށެވެ. އަދި އެއީ އުމުރުން 40 އަހަރު ބިދޭސީ ފިރިހެނެއް ކަމަށް ފުލުހުން މައުލޫމާތު ދެއެވެ.
ނިޔާވެފައި އޮއްވާ ފެނުނު ބިދޭސީމީހާގެ ހަށިގަނޑު ނެރެގެން ގެންދާ މަންޒަރު ފެންނަނީ ރާޅުގަނޑު ސަރަހައްދު ބޭރުމަގުގައި ހުރި ބިދޭސީން އުޅޭ ގެއަކުންނެވެ.
ވީޑިއޯއިން ފެންނަނީ ނިޔާވެފައިވާ މީހާގެ ހަށިގަނޑު ޕީޕީއީގައި ތިބި ބަޔަކު ގޮސް ބޮޑީ ބޭގެއްގައި ގެންގޮސް އެމްބިއުލާންސަށް އަރުވާ މަންޒަރެވެ.
މިފަދައިން ފެންނަ ނިޔާވެފައި ތިބި މީހުން ކޮވިޑް-19 އަށް ޓެސްޓު ކުރެއެވެ. އެގޮތުން، ނިޔާވި 7 މީހަކު ކޮވިޑަޑް ޓެސްޓުކޮށް ޕޮޒިޓިވްވެފައިވާ ކޭސް ވަނީ ރާއްޖެއިން ފެނިފައެވެ. ގޮތްނޭނގޭ ގޮތްގޮތަށް ނިޔާވެފައި ތިބޭ މީހުން ޓެސްޓު ކުރުމަކީ މި ބަލިމަޑުކަމުގެ ހާލަތުގައި އާންމުކޮށް އަމަލު ކުރާ އުސޫލެވެ.
