ޔޫރޯ މާކެޓިން ޕްރައިވެޓް ލިމިޓެޑްގެ އޮފީހުން ލެޕްޓޮޕެއްް ވަގަށް ނެގި މީހަކު ހޯދަން ފުލުހުން އާންމުންގެ އެހީއަށް އެދިއްޖެއެވެ.
ފުލުހުން ވަނީ، މި މީހާއާ ބެހޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓްގެ ނަމްބަރު 9631696 އަށް ގުޅައި މައުލޫމާތު ހިއްސާކުރުމަށް އެދިފައެވެ. އެގޮތުން ފުލުހުން ވަނީ އެ މީހާ ޔޫރޯ އޮފީހަށް ވަނދެ ލެޕްޓޮޕެއް ހިފައިންގެންދާ މަންޒަރު ފެންނަ ސީސީޓީވީ ފޫޓޭޖް އާންމުކޮށްފައެވެ.
އެ ވީޑިއޯއިން ފެންނަ ގޮތުން، އޮފީހަށް ވަނދެ ލެޕްޓޮޕް ހިފައިގެން ދިޔަ މީހާ ހުރީ ސޯޓު ބުރިއަކާއި ޓީޝާޓެއް ލައިގެންނެވެ. އަދި މާސްކެއް އަޅައިގެން ހުރުމުގެ ސަބަބުން އޭނާގެ މޫނު ވަނީ ފޮރުވިފައެވެ. މަޑުމަޑުން އޭނާ އޮފީހަށް ވަނދެގެން ދިޔައީ އެއްވެސް އިތުރި ތަނެއްގައި އަތް ނުލުމަށް ސަމާލުކަން ދީގެންނެވެ. އޮފިހަށް ވަން ދޮރާއި، ލެޕްޓޮޕް ހުރި ކެބިންގެ ދޮރު ނޫން އެހެން ތަނެއްގައި އޭނާ އަތް ޖައްސާފައެއް ނުވެއެވެ. ކެބިންގެ ދޮރަކީ ކަހާލެވޭގޮތަށް ހުރި ދޮރަށްވުމުން، އޭނާ އެދޮރު ހުޅުވީ އެއް އިނގިލި ޖައްސައިގެންނެވެ.
އަދި އޮފީހުގައި އުޅެދާނެ މީހަކަށް އޭނާ ފެނިދާނެތީ، ވަރަށް މަޑުމައިތިރި ކަމާއެކު ދެކޮޅު ބަލާ ހޯދަމުން އޭނާ ވަނީ އޮފީހުގައި ހުރި ލެޕްޓޮޕް ނަގައިގެން ނިކުމެގެން ގޮސްފައެވެ.
މިގޮތަށް މީހުން ހޯދުމަށް ފުލުހުން ދަނީ ސީސީޓީވީ ފޫޓޭޖްތައް ބޭނުންކޮށްގެން އާންމުންގެ އެހީއަށް އެދެމުންނެވެ. އެގޮތުން ދާދިފަހުން އައިޖީއެމްއެޗް ސަރަހައްދު މޫދުގައި ނިޔާވެފައި އޮތް މީހަކުގެ މަރާ ގުޅޭ މައުލޫމާތު ހޯދުމަށް ވެސް ފުލުހުން ވަނީ އޭނާ ދަތުރުކުރި މަގުތައް ސީސީޓީވީ ފޫޓޭޖް ތަކުން ބަލައި، އެ ފޫޓޭޖުތައް އާންމުކޮށްފައެވެ.
މީގެ އިތުރުން ވެސް މިދިޔަ އާދިއްތަ ދުވަހު ބޭންކް އޮފް ސިލޯނަށް ގެންދިޔަ ފައިސާތަކެއް ފޭރެން އުޅެނިކޮށް، އެ މަންޒަރު ފެންނަ ސީސީޓީވީ ފޫޓޭޖެއް ވަނީ އާންމުވެފައެވެ. އެ މައްސަލާގައި، ފުލުހުން ވަނީ ރޭގެ ވަގުތެއްގައި މީހަކު ހައްޔަރުކޮށްފައެވެ.
