ރާއްޖޭގެ އާބާދީ އާއި ދިރިއުޅޭ ތަންތަނުގެ ބޯހިމެނުން 2022 ވަނަ އަހަރު ކުރިއަށް ގެންދަން ނިންމައިފިއެވެ.
ދުނިޔޭގެ ތަފާސްހިސާބު ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ހައުސިން އަދި ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވީ 2022 ވަނަ އަހަރު ބޯހިމެނުމަށްޓަކައި ވާން ޖެހޭ ތައްޔާރީތައް މިހާރު ވަމުން އަންނަކަމަށެވެ.
ބޯހިމެނުން ފުރިހަމަވާނީ ހުރިހާ ރައްޔިތުންގެ ބައިވެރިވުމާއެކުކަން ފާހަގަކުރައްވާ އެކަމަށް އެއްބާރުލުން ދިނުމަށް މިނިސްޓާ ވަނީ އިލްތިމާސްކުރައްވާފައެވެ.
އެންމެ ކުރިން އެކިކަންކަމުގެ ތަފާސްހިސާބުތައް ފަސޭހައިން ނަގަމުން އައިނަމަވެސް މިހާރު އެހާ ފަސޭހައިން ތަފާސްހިސާބުތައް ލިބެން ނުހުންނަކަންވެސް މިނިސްޓަރ ވަނީ ފާހަގަކުރައްވާފައެވެ. އަދި ކޮންމެ 5 އަހަރަކުން އެއްފަހަރު ދުނިޔޭގެ ފެންވަރުގައި ފާހަގަކުރަމުން އަންނަ ތަފާސްހިސާބު ދުވަސް ކުރިއަށްއޮތްތަނުގައި ވަރަށް ކުލަގަދަކޮށް ރާއްޖޭގައި ފާހަގަކުރައްވާނެކަމަށް މިނިސްޓަރ ވިދާޅުވިއެވެ.
ރާއްޖޭގައި އެންމެ ފުރަތަމަ ބޯހިމަނާފައިވަނީ 1911 ވަނަ އަހަރެވެ. އެގޮތުން ކޮންމެ 10 އަހަރަކުން އެއް އަހަރު ބޯހިމަނަމުން ގޮސްފައިވާއިރު 1931 ވަނަ އަހަރު މެދުކެނޑުމެއް އައިސް އެންމެފަހުން ބޯހިމެނުމެއް ކުރިއަށް ގެންގޮސްފައިވަނީ 2014 ވަނަ އަހަރެވެ. ރާއްޖޭގެ އާބާދީ އާއި ދިރިއުޅޭ ތަންތަނުގެ ބޯހިމެނުމުން ދައްކާގޮތުގައި ރާއްޖޭގައި ދިރިއުޅޭ މީހުންގެ އާބާދީއަކީ 402071 މީހުންނެވެ.
ނަމަވެސް ނޭޝަނަލް ބިޔުރޯ އޮފް ސްޓެޓިސްޓިކްސްގެ އެންމެ ފަހުގެ ހޯދުންތައް ދައްކާ ގޮތުން ރާއްޖޭގެ ޖުމްލަ އާބާދީއަކީ މިހާރު 557،426 މީހުންނެވެ. އޭގެ ތެރެއިން 40 ޕަސަންޓު މީހުން މާލޭގަ އުޅޭއިރު އެއީ ޖުމްލަ 227،486 މީހުންނެވެ.
އެންމެ ގިނަ މީހުން އުޅޭ ކ. އަތޮޅުގައި ދިރިއުޅެނީ 41،382 މީހުންނެވެ. އަދި އެންމެ މަދު މީހުން އުޅެނީ ވ. އަތޮޅުގައި ކަމަށްވާއިރު، އެއީ 2،688 މީހުންނެވެ.
