ކޮވިޑް-19 އަށް ޕޮޒިޓިވްވެ، ހުޅުމާލޭ މެޑިކަލް ފެސިލިޓީގައި ފަރުވާ ދެމުންދިޔަ 90 އަހަރުގެ މީހަކު ނިޔާވެއްޖެއެވެ.
ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނީ ކޮވިޑް ޖެހިގެން ނިޔާވެފައި ވަނީ، 90 އަހަރުގެ ދިވެހި ފިރިހެނަކު ކަމަށާއި، އޭނާ ނިޔާވީ ހުޅުމާލޭ މެޑިކަލް ފެސިލިޓީގައި އެޑްމިޓްކޮށް، ފަރުވާ ދެމުން ދަނިކޮށް ކަމަށެވެ. އަދި އޭނާ ނިޔާވީ ރޭ 1:25 ހާއިރު ކަމަށް ވެސް އެޗްއީއޯސީން މައުލޫމާތުދެއެވެ.
މިއީ ކޮވިޑް ޖެހިގެން ރާއްޖެއިން ނިޔާވި 34 ވަނަ މީހާއެވެ.
މިބަލީގައި މިމަހު ވެސް 6 މީހަކު ނިޔާވެފައިވެއެވެ. އެގޮތުން، މިމަހު 1 ވަނަ ދުވަހު ދަރުމަވަންތަ ހޮސްޕިޓަލުގެ އައިސީޔޫގައި ފަރުވާ ދެމުން ދަނިކޮށް 79 އަހަރުގެ ފިރިހެނަކު ނިިޔާވެފައި ވާއިރު، މިމަހު 9 ވަނަ ދުވަހު ހުޅުމާލެ މެޑިކަލް ފެސިލިޓީގެ އައިސީޔޫގައި ފަރުވާ ދެމުން ދިޔަ 60 އަހަރުގެ ފިރިހެނަކު ވެސް ވަނީ ނިޔާވެފައެވެ.
ހަމައެއާއެކު، މިމަހު 8 ވަނަ ދުވަހު ކުޅުދުއްފުށި ރީޖަނަލް ހޮސްޕިޓަލްގައި ކެންސަރަށް ފަރުވާ ދެމުން ދަނިކޮށް ނިޔާވި 58 އަހަރުގެ މީހާވެސް ނިޔާވީ ކޮވިޑްގައި ކަމަށް ވަނީ ނިންމާފައެވެ. އަދި މިމަހު 13ވަނަ ދުވަހު ވަނީ ހުޅުމާލެ މެޑިކަލް ފެސިލީޓީގެ އައިސީޔޫގައި ފަރުވާދެމުންން ދަނިކޮށް 58 އަހަރުގެ އަންހެނަކު ވެސް ނިޔާވެފައެވެ. އަދި މިމަހު 14 ވަނަ ދުވަހު ދަރުމަވަންތަ ހޮސްޕިޓަލުގެ އައިސީޔޫގައި ފަރުވާ ދެމުން ދަނިކޮށް 79 އަހަރުގެ ފިރިހެނަކު ވެސް ވަނީ ނިޔާވެފައެވެ.
މިހާތަނަށް މިބައްޔަށް 9725 މީހަކު ޕޮޒިޓިވް ވެފައި ވާއިރު، 34 މީހަކު ނިޔާވެ، 8261 މީހަކު ވަނީ ބަލިން ރަނގަޅު ވެފައެވެ. އަދި 1424 އެކްޓިވް ކޭސް އުޅޭއިރު، އޭގެ ތެރެއިން 107 މީހުން ހޮސްޕިޓަލުގައި ތިބި އިރު 686 މީހުން ތިބީ އައިސޮލޭޝަނުގައެވެ.
މީގެ އިތުރުން ވެސް މި ބައްޔަށް ޕޮޒިޓިވްވި 6 މީހަކު ވަނީ ނިޔާވެފައެވެ. ނަމަވެސް އެމީހުން ނިޔާވީ ކޮވިޑްގައި ނޫން ކަމަށް ވަނީ ނިންމާފައެވެ.
