ބޮޑުކަންނެލި މަސްވެރިންނަށް އިންކަމް ސަޕޯޓް އެލަވެންސް ނުލިބޭކަމުގެ ކަންބޮޑުވުން ފާޅުކޮށްފިއެވެ.
ބޮޑު ކަންނެލި މަސްވެރިންގެ ޔޫނިޔަން (ބީކޭއެމްޔޫ) އިން ނެރުނު ބަޔާނެއްގައި ބުނީ މަސްގަނެވޭނެ އެންމެ ދަށް އަގެއް ކަނޑައެޅިފައި ނެތުމުގެ ކަންބޮޑުވުމާއި، އެކަށީގެންވާ މިންވަރަށް ދިވެހިރާއްޖެއަށް ބާނާ މަސް އެކްސްޕޯޓު ކުރެވޭނެ މާކެޓްތަށް ނެތުމާއި، ވާދަވެރި މާހައުލެއްގައި މަސް ގަންނަމުން ނުދިއުމާއި ބޮޑުކަންނެލި މަސްވެރިކަމުގެ މުޅިސިނާއަތް މަދު ބަޔަކު ކޮންޓުރޯލް ކޮށްފައި އޮތް އޮތުމުގެ ސަބަބުން ގޮންޖެހުންތަކެއް ކުރިމަތިވެފައި ވާ ކަމަށެވެ.
އަދި މަސްވެރިންގެ މެދުގައި ތަފާތުކުރުން ގެންގުޅޭ މައްސަލަތަށް ފާހަގަކޮށް ރައްޔިތުންގެ މަޖިލީހާއި ބައްދަލުކޮށް ޕެޓިޝަން އެއް ހުށަހެޅިފައިވާ ކަމާއި، އެތަށް ފަހަރަކު މަސްވެރިކަމުގެ މިނިސްޓްރީއާ ބައްދަލު ކުރެވި ކަންބޮޑުވުންތަށް ހިއްސާ ކުރެވިފައި ވާ ކަމަށާއި މަސްގަންނަ ފަރާތްތަކާ އެކުވެސް ފުރުސަތު ލިބޭވަރަކުން މަޝްވަރާ ކުރަމުން ދާ ކަމަށެވެ.
ބޮޑުކަންނެލި މަސްވެރިންނަށް އިންކަމް ސަޕޯޓުގައި ބައިވެރި ނުވެވުމުން، މިއަހަރުގެ އޭޕްރީލް މަހުން ފެށިގެން ޖުލައި މަހާ ހަމައަށް، ކޮވިޑް-19 ގެ ސަބަބުން ބޮޑުކަންނެލި މަސްވެރިން ބާނާ މަސް ގަންނަމުން ގޮސްފައި ވަނީ 35 ރުފިޔާ އަށް ވުރެ ދަށް އަގުތަކެއްގައި ކަމަށް ބީކޭއެމްޔޫ އިން ބުނެފައި ވެއެވެ.
އަދި ބައެއް ފަހަރު 20 ރުފިޔާ އާއި 25 ރުފިޔާއަށް ވެސް މަސްގަނެފައި ވާނެ ކަމަށާއި އާންމުގޮތެއްގައި މަހުގެ އަގު އެވްރެޖްކޮށް ހުންނަނީ 40 ރުފިޔާ އާއި 50 ރުފިޔާ ގެ ދަށް އަގެއްގައި ކަމުން ދެބައިކުޅަ އެއްބަޔަށް މަސްގަންނަ އަގު ދަށްވުމުން ފާއިތުވި މަސްތަކުގައި ލިބިފައި ވަނީ ދިރިއުޅުމުގެ ހަރަދުތަށް ފޫނުބެއްދޭ ވަރުގެ އާމްދަނީއެއް ކަމަށް ވުމުން އެކަމުގެ ކަންބޮޑުވުންވެސް ވަނީ ފާޅު ކޮށްފައެވެ.
އަދި އެވްރެޖްކޮށް ބޮޑުކަންނެލީގެ މަސްވެރިންނަށް މަހެއްގެ މައްޗަށް 5000 ރުފިޔާގެ އާމްދަނީ އެއް ނުލިބޭ ކަމަށާއި، ކޮވިޑް-19 ގައި މަސްގަންނަ ފަރާތްތަކާއި އާމްދަނީއަށް އަސަރު ކޮށްފައިވާ ފަރާތްތަކަށް ދޭ އިންކަމް ސަޕޯޓަށް ބޮޑުކަންނެލީގެ މަސްވެރިން ޝަރުތު ހަމަނުވާނެ ކަމަށް ނިންމާފައި ވާތީ އެކަމުގެ ކަންބޮޑުވުންވެސް ވަނީ ފާޅުކޮށްފައެވެ.
އަދި އެ ނިންމުން ވަގުތުން ވަގުތަށް ބަދަލުކޮށް ބޮޑު ކަންނެލީގެ މަސްވެރިންގެ ތެރެއިންވެސް 5000 ރުފިޔާގެ އާމްދަނީ އެއް ނުލިބޭ މަސްވެރިންނަށް އާމްދަނީގެ އެހީތެރިކަން ލިބޭނޭ އިންތިޒާމް ހަމަޖަށްސައި ދިނުމަށް ބީކޭއެމްއައި އިން ވަނީ ގޮވާލާފައެވެ.
ބޮޑުކަންނެލީގެ މަސްވެރިކަމުގުގެ ނަފާ ސީދާ ގޮތުންނާއި ނުސީދާގޮތުން 5000 އެއްހާ އާއިލާ އަށް ބެހިގެންދެއެވެ.
