މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ކުށުގެ ދައުވާ، މާލޭ ސިޓީ ކައުންސިލްގެ ކުރީގެ ޑެޕިއުޓީ މޭޔާ އިބްރާހީމް ސުޖާއުގެ މައްޗަށް ޕްރޮސެކިއުޓާ ޖެނެރަލް (ޕީޖީ) އޮފީހުން އުފުލައިފިއެވެ.

ޕީޖީން ބުނީ 2014 ވަނަ އަހަރުން ފެށިގެން މާލެ ސިޓީ ކައުންސިލްގެ ޑެޕިއުޓީ މޭޔަރުގެ މަގާމުގައި ހުރެ، މަގާމުގެ ނުފޫޒު ބޭނުންކޮށްގެން، މާލޭ ޕްލޭނިންގް ގަވާއިދުގައި ހުއްދަކޮށްފައިވާ މިންވަރަށްވުރެ އުސްކޮށް ގެއެއް އިމާރާތްކުރުމަށް ހުއްދަދިން މައްސަލާގައި ކ. މާލެ، ގ. ޗާންދަނީމާގެ، އިބްރާހީމް ޝުޖާއުގެ މައްޗަށް ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ ދަށުން މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ކުށުގެ ދައުވާ ކުރުމަށް މިއަދު ކްރިމިނަލް ކޯޓަށް ހުށަހަޅައިފައިވާ ކަމަށެވެ.

އެ ދައުވާ ސާބިތުވެއްޖެނަމަ އަދަބަކީ 3 އަހަރު ދުވަހުގެ މުއްދަތަށް ޖަލަށްލުން، ނުވަތަ އަރުވާލުން، ނުވަތަ ގޭގައި ބަންދުކުރުން ކަމަށްވެސް ޕީޖީ އޮފީހުން މައުލޫމާތު ދެއެވެ.

އެ މައްސަލާގައި ކަން ހިނގާފައި ވާގޮތަށް ބަލާއިރު، މާލޭ ސިޓީގައި އިމާރާތް ކުރުމުގެ ހުއްދައަށް އެދޭ ބިމުގެ ބޮޑުމިނަކީ 250 އަކަފޫޓު ކަމާއި އެ ބިމުގައި، މާލޭ ޕްލޭނިން ގަވާއިދާ އެއްގޮތަށް އިމާރާތް ކުރުމުގެ ހުއްދަ ދެވޭނީ 6.27 މީޓަރަށް ކަން މައްސަލައިގެ ލިޔުންތަކުން އެނގެއެވެ.

ހަވާލާދެވުނު ބިމުގައި މާލޭ ޕްލޭނިން ގަވާއިދާ ހިލާފަށް 12 މީޓަރަށް އިމާރާތް ކުރުމުގެ ހުއްދަ ދީ ޖަނަވަރީ 15، 2014 ގައި މާލޭ ސިޓީކައުންސިލްގެ އިދާރާއިން "އިމާރާތުގެ ކުރެހުން ފާސްކުރިކަމުގެ ލިޔުން" އަދި "އިމާރާތް ކުރުމުގެ ހުއްދަ" ދޫކޮށްފައި ވެއެވެ. ހަވާލާދެވުނު ހުއްދަތަކަކީ މާލޭ ސިޓީކައުންސިލްގެ ކުރީގެ ޑެޕިއުޓީ މޭޔާ އިބްރާހީމް ސުޖާއު ސޮއިކޮށް ދޫކޮށްފައިވާ ހުއްދަތަކެއް ކަމަށް އޭސީސީން ވަނީ ބުނެފައެވެ.

މައްސަލާގައި ހަވާލާދެވޭ ބިމުގައި އިމާރާތް ކުރުމުގެ ހުއްދަ ދޫކޮށްފައި ވަނީ، އެ ބިމުގައި "4 ބުރިއަށް އިމާރާތް ކުރުމަށް މާލޭ ސިޓީކައުންސިލްގެ އިދާރާއިން 1995 ވަނަ އަހަރު ހުއްދަ ދީފައި ވާކަމަށް" ސުޖާއު، ޖަނަވަރީ 14، 2014 ސޮއިކޮށްފައިވާ ލިޔުމަކަށް ބިނާކޮށެވެ. އެހެންނަމަވެސް، އެބިމުގައި އިމާރާތް ކުރުމަށް އެފަދަ ހުއްދައެއް ދީފައި ނުވާކަމާއި، އެލިޔުމަކީ، މާޅޭ ޕްލޭނިންގް ގަވާއިދާ އެއްގޮތަށް އެ ބިމުގައި އިމާރާތް ކުރެވޭ އުސްމިނަށް ވުރެ އުސްކޮށް އިމާރާތް ކުރުމުގެ ހުއްދަ ދިނުމަށް ސުޖާއު ސޮއިކޮށްފައިވާ ލިޔުމެއް ކަން ތަހުގީގަށް އެނގިފައިވާ ކަމަށްވެސް އޭސީސީން ވަނީ ބުނެފަވެ.

އެހެންކަމުން، އެ ބިމުގައި 4 ބުރިއަށް އިމާރާތް ކުރުމަށް 1995 ވަނަ އަހަރު ހުއްދަ ދީފައި ވާކަމަށް ބުނެ ލިޔުމެއް ދޫކޮށް، މާލޭ ޕްލޭނިން ގަވާއިދުގައިވާ މިނަށް ވުރެ އުސްކޮށް އިމާރާތް ކުރުމުގެ ހުއްދަ ދީފައި ވަނީ، އިބްރާހީމް ސުޖާއު އަށް އެނގި ހުރެ، މަގާމުގެ ނުފޫޒު ބޭނުން ކޮށްގެން ވަކި ފަރާތަކަށް ފައިދާ ހޯދައިދިނުމަށް ކަން ޝައްކެއް ނެތް މިންވަރަށް އެ ކޮމިޝަންގެ ތަހުގީގަށް ސާބިތުކުރެވޭތީ، އިބްރާހީމް ސުޖާއުގެ މައްޗަށް، ދަޢުވާ ކުރުމަށް، ޕްރޮސެކިއުޓާ ޖެނެރަލްގެ އޮފީހަށް މި މައްސަލަ ފޮނުވުމަށް ނިންމީ ކަމަށްވެސް އޭސީސީން ބުނެފައި ވެއެވެ.