ހަނިމާދޫ އެއާޕޯޓަށް އަސްކަރީ މަތިންދާ ބޯޓެއް މިއަދު ޖެއްސީ ހުއްދަ ނަގައިގެން ކަމަށް މޯލްޑިވްސް އިމިގްރޭޝަނުން ބުނެފިއެވެ.
އެއީ ސިލްސިލާކޮށް ރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް) ބެލުމަށް އެމްއެންޑީއެފް ކޯސްޓްގާޑުން ކުރިއަށް ގެންދާ އޮޕަރޭޝަނުގައި ބައިވެރިވުމަށް އައި އަސްކަރީ 2 ބޯޓު ކަމަށް އެމްއެންޑީއެފުން ބުނެއެވެ.
އިމިގްރޭޝަނުން ބުނީ، އިމިގްރޭޝަނަށް އެނގުމަކާ ނުލާ މިއަދު ހަނިމާދޫ އެއާޕޯޓަށް އަސްކަރީ މަތިންދާ ބޯޓެއް ޖެއްސިކަމަށް ބުނެ، ހަބަރު ފަތުރާ ބައެއް ނޫސްތަކުގައި ލިޔެފައިވާ ލިޔުންތަކަކީ ސައްހަ މައުލޫމާތެއް ނޫން ކަމަށެވެ. އެ އުޅަނދަށް އިމިގްރޭޝަން ކްލިއަރެންސް ދީފައި ވަނީ، އިމިގްރޭޝަނަށް ހުށަހަޅަންޖެހޭ ލިޔެކިޔުން ފުރިހަމަކޮށް، ހޯދަންޖެހޭ ހުއްދަތައް ހޯދާފައި ވުމުން ކަމަށް އިމިގްރޭޝަނުން ބުނެއެވެ.
ފްލައިޓު ހަނިމާދޫ އެއާޕޯޓުގައި ޖައްސާފައި ވަނީ މިއަދު ހެނދުނުގެ ވަގުތެއްގައެވެ. އިންޑިއާއިން އައި ދެ ފްލައިޓުގެ ތެރެއިން އެއް ފަލައިޓަކީ އެ އޮޕަރޭޝަނަށް އައި ފްލައިޓު ކަމަށާއި ދެވަނަ ފްލައިޓަކީ ބެކްއަޕް ފްލައިޓެއް ކަމަށް އެމްއެންޑީއެފުން ވަނީ ބުނެފައެވެ. އެ ގޮތުން މިއަދު ހެނދުނު އައި ދެ ފްލައިޓްގެ ތެރެއިން ބެކްއަޕް ފްލައިޓު ވަނީ މެންދުރުފަހު 1:30 ހާއިރު ރާއްޖެއިން ފުރާފައެވެ.
މި ފްލައިޓުގައި އައި މީހުން ރާއްޖޭގައި 16 ދުވަހު މަޑުކުރުމަށް ހަމަޖެހިފައި ވާ ކަމަށް އެމްއެންޑީއެފުން ބުނެއެވެ. އަދި އެ ފްލައިޓުގައި އައި މީހުން އެޗްޕީއޭގެ ގައިޑްލައިނާ އެއްގޮތަށް އަމަލު ކުރާނެ ކަމަށް އެމްއެންޑީއެފުން ވަނީ ބުނެފައެވެ.
