ކޮވިޑަށް ގދ. ހޯޑެއްދޫން ޕޮޒިޓިވްވި 21 މީހުންގެ ކޮންޓެކްޓް ޓްރޭސިންގްގެ ގޮތުގައި 111 މީހުން ފެނިފައިވާ ކަމަށް އެޗްއީއޯސީގެ ތަރުޖަމާނު ޑރ. ފާތުމަތު ނަޒްލާ ރަފީގް ވިދާޅުވެއްޖެއެވެ.
މިރޭ ކޮވިޑްއާ ގުޅިގެން ބާއްވާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ، ހޯޑެއްދޫން ޕޮޒިޓިވް ވި 21 މީހުންގެ ކޮންޓެކްޓް ޓްރޭސް ދެނެގަތުމުގެ މަސައްކަތް ކުރިއަށް ދާ ކަމަށާއި މިހާތަނަށް އައި އިރު 111 ކޮންޓެކްޓުން ފެނިފައިވާ ކަމަށެވެ.
އެމީހުންގެ ތެރެއިން ބަލީގެ އަލާމަތްހުރި 60 ފަރާތެއް ހިމެނޭ ކަމަށް ނަޒްލާ ފާހަގަ ކުރެއްވިއެވެ. އަދި އުމުރުން 50 އަހަރުން މަތީގެ 6 ފަރާތަކާއި އަދި އެއް އަހަރުން ދަށުގެ 2 ކުދިން ހިމެނޭކަމަށް ނަޒްލާ ވިދާޅުވިއެވެ. މިހާތަނަށް އައިއިރު މި ހުރިހާ ކޮންޓެކްޓުން ވަނީ ކަރަންޓިން ކުރެވިފައި ކަމަށާއި އެ ފަރާތްތަކުގެ ސާމްޕަލް ނަގައި ޓެސްޓު ކުރުމުގެ މަސައްކަތް ކުރިއަށްދާ ކަަމަށް ނަޒްލާ ވިދާޅުވިއެވެ. އަދި އެ ދެ ރަށަށް ބަލި ފެތުރެން ދިމާވި ސަބަބު ދެނެގަތުމަށް ތަހުގީގު ކުރަމުންދާ ކަމަށް ވެސް އޭނާ ވިދާޅުވިއެވެ.
މިމަހުގެ 4 ވަނަ ދުވަހު ފުރަބަންދާ ގުޅިގެން ހޯޑެއްދޫން ކޮވިޑްގެ 2 ކޭސް ފެނޮފައިވާ ކަމަށް ނަޒްލާ ވިދާޅުވިއެވެ. އަދި މީގެ އިތުރުން މި މަހުގެ 5 ވަނަ ދުވަހު އިތުރު 19 ކޭސް ވަނީ ފެނިފައި ކަމަށް ނަޒްލާ ވިދާޅުވިއެވެ. އަދި މި 19 ކޭސް ގުޅިފައިވަނީ އެރަށުގެ 4 ގެއަކާ ކަމަށް އޭނާ ވިދާޅުވިއެވެ.
މިވަގުތު އެކްޓިވް ކޭސްގެ ގޮތުގައި 35 ރަށަކާއި 22 ރިސޯޓެއް ވާއިރު، ރިސޯޓުތަކުން ހިމެނެނީ 19 ޓޫރިސްޓަކާއި 48 ސްޓާފުންނެވެ.
ރާއްޖޭގައި މިވަގުތު އެކްޓިވް ކޭސް ފެނިފައިވާ ރަށްރަށުގެ ތެރޭގައި ހިމެނެނީ ހއ. ދިއްދޫ، ށ. އަތޮޅުން ޅައިމަގާއި ފީވަށް، ނ. އަތޮޅުން މިލަދޫއާއި ކުޑަފަރިއާއި މާޅެންދޫ، ބ. އަތޮޅުން ހިތާދޫއާއި ތުޅާދޫއާއި އޭދަފުށި، ރ. އަތޮޅުން ރަސްމާދުއާއި އިނގުރައިދޫއާއި ދުވާފަރާއި، ކިނޮޅަސް، ޅ. އަތޮޅުން ނައިފަރާއި ކުރެންދޫއާއި ކ. އަތޮޅުން ދިއްފުއްޓާއި ތުލުސްދޫއާއި ހިންމަފުއްޓާއި މާފުށި، އއ އަތޮޅުން މަތިވެރި، ފ. އަތޮޅުން ބިލެއްދޫއާއި ނިލަންދޫއާއި ދަރަބޫނދޫ، ދ. އަތޮޅުން ކުޑަހުވަދޫއާއި މީދޫ، ލ. ފޮނަދޫ އާއި ގަން، ގއ. އަތޮޅުން ވިލިނގިލި، ގދ. އަތޮޅުން ފަރެސްމާތޮޑާއާއި ހޯޑެއްދޫއާއި ތިނަދޫ، ސ. އަތޮޅުން ފޭދުއާއި ގަމާއި، ހިތަދޫ އަދި މަރަދޫއެވެ.
މި ރަށްރަށުގެ ތެރެއިން މޮނިޓަރިންގެ ހާލަތުގައި އޮތީ ގދ. ހޯޑެއްދޫ އާއި ގދ. މަޑަވެލި އެކަނި ކަމަށް އެޗްޕީއޭއިން ބުނެއެވެ. އަދި ސަރަހައްދީ ކޮވިޑް ފެސިލިޓީތަކުގެ ތެރެއިން އެކްޓިވް ކޭސްތަކަށް ފަރުވާ ދެމުން ދަނީ ބ އަތޮޅު ކޮވިޑް ފެސިލިޓީ އާއި ލ ގަން ކޮވިޑް ފެސިލިޓީގެ އިތުރުން ގއ. ވިލިގިނލި ކޮވިޑް ފެސިލިޓީއެވެ.
