ކޮވިޑް-19 އަށް ޕޮޒިޓިވްވެ، އައިސޮލޭޓް ކުރުމުގެ ގޮތުން ފެސިލިޓީތަކަށް މީހުން ގެންދިއުމަށްފަހު އަނބުރާ އެމީހުން ފޮނުވާލާއިރު، ފެސިލިޓީގެ ކޮޓަރިއަށް އެކި ކަހަލަ ގެއްލުންދޭ މައްސަލަ އަނެއްކާވެސް ފެންމަތިވެއްޖެއެވެ.
ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ރޭ ބެއްވު ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގް ވިދާޅުވީ ފަރުދާ ކަފާލާފައި ހުރުމާއި ބެޑްޝީޓް ހަލާކު ކޮށްލުން އަދި ކޮޓަރީގައި ހުންނަ އެކި އެއްޗިއްސަށް ގެންލުންދީފައި ހުންނަ ކަން ފާހަގަ ވެފައިވާ ކަމަށެވެ. އަދި ނުތާހިރުކޮށް ތަކެތި ގެންގުޅެފައިވާ ކަން ވެސް ފާހަގަވެފައިވާ ކަމަށެވެ.
ޑރ. ނަޒްލާ ވަނީ މިކަން މިފަދައިން ނުކުރުމަށް އިލްތިމާސް ކުރައްވާފައެވެ. އޭނާ ވިދާޅުވީ، މިފަދަ ކަންކަމުގައި އެއްވެސް ފަރާތަކަށް ގާނޫނީ ގޮތުން ފިޔަވަޅު އަޅަން ޖެހޭ ހިސާބަށް ދާން ބޭނުން ނުވާ ކަމަށެވެ.
ޑރ. ނަޒލް ވިދާޅުވީ އައިސޮލޭޝަން ފެސިލިޓީތަކުގައި މީހުން ބައިތިއްބަނީ، ސަރުކާރުން ފެސިލިޓީތައް ކުއްޔަށް ނަގައިގެން ހޭދަވެސް ކޮށްގެން ކަމަށެވެ. އަދި ގެއްލުން ލިބިއްޖެނަމަ އޭގެ ބަދަލު ދޭން ޖެހޭނީ ސަރުކާރުން ކަމަށް އޭނާ ވިދާޅުވިއެވެ. ނަމަވެސް މިކަން ތަކުރާރުވަމުންދާނަމަ ފިޔަވަޅު އަޅަން މަޖުބޫރުވާނެ ކަމަށެވެ.
މިދިޔަ އޭޕްރިލް މަހު ވެސް ވަނީ ކަރަންޓީން ފެސިލިޓީއެއްގައި ހުރި މީހަކު ކަރަންޓީނު ނިންމާ ދިޔައިރު، ކޮޓަރިއަށް ގެއްލުންދީފައިވާ މައްސަލައެއް ފެންމަތިވެފައެވެ. ޑރ. ނަޒްލާ ވިދާޅުވީ، އޭރު އެވާހަކަ ދެއްކުމުން އެކަން ވަރަށް ބޮޑަށް ރަނގަޅުވެފައިވާ ކަމަށެވެ. ނަމަވެސް އަނެއްކާ އެ މައްސަލަ ފެންމަތިވެފައިވާ ކަމަށެވެ.
