ދ. މާއެނބޫދޫ މޮނިޓަރިންގެ ހާލަތަށް ގެންގޮސްފައި ވަނީ ޓޫރިސްޓެއްގެ ގައިން ކޮވިޑްގެ އަލާމަތް ފެނިގެން ކަން ހާމަވެއްޖެއެވެ.
'ދަ ޕްރެސް' އަށް މައުލޫމާތު ދެމުން މާއެނބުދޫ ކައުންސިލުން ބުނީ، އެ ރަށް މޮނިޓަރިންގެ ހާލަތަށް ލާފައި ވަނީ އެ ރަށުގައި ހުރި ޓޫރިސްޓެއްގެ ސަބަބުން ނޫން ކަމަށެވެ. އެއީ އެރަށް ކައިރީގައި އޮންނަ ނިޔަމަ ރިސޯޓުގައި ހުރި ޓޫރިސްޓެއްގެ ގައިން ބަލީގެ އަލާމާތް ފެނިގެން ކަމަށް ކައުންސިލުން ބުނެއެވެ.
އެ އަތޮޅުން މާއެނބޫދޫގެ އިތުރުން ކުޑަހުވަދޫގެ ގިނަ ޒުވާނުންތަކެއް ވަޒީފާ އަދާ ކުރަމުންދާ ނިޔަމަ ރިސޯޓުން ކޮވިޑް އަލާމާތް ހުރި ޓޫރިސްޓެއް ފެނުމުން އެ ދެ ރަށް ވެސް ވަނީ މޮނިޓަރިންއަށް ލާފައި ކަމަށް މާއެނބޫދޫ ކައުންސިލުން ބުނެއެވެ. އެ ރަށް މޮނިޓަރިންއަށް ލާފައި ވަނީ ނިޔަމަ ރިސޯޓުގައި މަސައްކަތް ކުރާ އެރަށުގެ ބައެއް މީހުން ކޮންމެ ދުވަހެއްގެ ޑިއުޓީ ފުރިހަމަ ކުރުމަށްފަހު އެނބުރި ރަށަށް އަންނަ ބަޔަކަށް ވާތީ އާއި އެ މީހުންގެ ފަރާތުން ކޮވިޑް އެރަށަށް ފެތުރިދާނެ ކަމަށް ބެލެވޭތީ ކަމަށް މާއެނބޫދޫ ކައުންސިލުން ބުނެއެވެ.
މިހާތަނަށް އައި އިރު އަދި ކޮވިޑަށް މާއެނބޫދޫން އެއްވެސް މިހަކު ޕޮޒިޓިވްވެފައެއް ނުވެއެވެ. ނަމަވެސް މިއަދު ކުޑަހުވަދޫން 1 މަހުގެ ތުއްތު ފިރިހެން ކުއްޖަކާއި 3 އަހަަރުގެ ފިރިހެން ކުއްޖެއްގެ އިތުރުން 24 އަހަރުގެ އަންހެނަކާއި، 34 އަހަރުގެ ފިރިހެނަކު ކޮވިޑަށް ޕޮޒިޓިވް ވެފައިވާ ކަމަށް ހެލްތް ޕްރޮޓެކްޝަން އެޖެންސީން ވަނީ ބުނެފައެވެ.
