ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ވެކްސިނެއް އަންނަ ހިސާބުން، އެ ވެކްސިން ފޯރުކޮށްދިނުމުގައި ފާމަސިސްޓުންގެ ދައުރު ބޮޑު ކަމަށް، އެމެރިކާގެ ސެންޓާޒް ފޮ ޑިޒީޒް ކޮންޓްރޯލް (ސީޑީސީ)ގެ ޑައިރެކްޓާ ޑރ ރޮބާޓް ރެޑްފީލްޑް ވިދާޅުވެއްޖެއެވެ.
ފޯނު މެދުވެރި ކުރައްވާ ނޫސްވެރިންނަށް މައުލޫމާތު ދެއްވަމުން ޑރ ރެޑްފީލްޑް ވިދާޅުވީ، ކޮވިޑް-19ގެ ވެކްސިން އަންނަ ހިސާބުން، ފާމަސިސްޓުންނަކީ ކުޑަކުދިންނާ ބޮޑެތި މީހުންނަށްވެސް އެ ވެކްސިން ޖަހާދޭނެ ބައެއް ކަމަށެވެ.
އެމެރިކާގެ ހެލްތް އެންޑް ހިއުމަން ސާވިސަސް ޑިޕާޓްމަންޓްއިން ވަނީ، ދައުލަތުގެ ލައިސަންސް ލިބިފައިވާ ކޮންމެ ފާމަސިސްޓަކީވެސް ކުޑަކުދިންނަށް ވެކްސިން ދިނުމުގެ ހުއްދަ އޮތް ބައެއް ކަމުގައި ހަދާނެ ކަން ހާމަކޮށްފައެވެ.
މިފަދަ އިސްލާހެއް ގެނައުމަކީ، އާބާދީއަށް ވެކްސިން ފޯރުކޮށްދިނުމަށް އާންމު ސިއްހަތުގެ ދާއިރާއިން ނިންމުނު އެންމެ މުހިންމު އެއް ނިންމުން ކަމަށްވެސް ޑރ ރެޑްފީލްޑް ވަނީ ފާހަގަކުރައްވާފައެވެ. އެހެންކަމުން، ވެކްސިން ފޯރުކޮށްދިނުމުގެ ޕްލޭންގައި، ފާމަސީތަކުން މުހިންމު ދައުރެއް އަދާކުރާނެ ކަމަށްވެސް ޑރ ރެޑްފީލްޑް ވަނީ ފާހަގަކުރައްވާފައެވެ.
ކޮވިޑް-19އަށް ވެކްސިނެއް ތަރައްގީ ކުރުމުގެ މަސައްކަތް ހަލުވި ދުވެއްޔެއްގައި ދުނިޔޭގެ އެކި ކަންކޮޅުތަކުގައި ކުރިއަށް ގެންދާއިރު، އަދި މިހާތަނަށް އެއްވެސް ވެކްސިނެއް އާންމު ބޭނުމަށް ދޫކުރުމަށް ލައިސަންސް ދޫކުރި ކަމެއް، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)އިން ހާމަކޮށްފައެއް ނުވެއެވެ.
