ރާއްޖޭގައި ޗުއްޓީ ހޭދަކުރުމަށް ފަހު ފުރާ ފަތުރުވެރިން ކޮވިޑް-19 އަށް ޓެސްޓު ކުރުމަށް ހަމަޖައްސާފައިވާ ތަންތަނަށް ބަދަލު ގެނެސްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކުރިން ހާމަ ކޮށްފައިވާ ގޮތުގައި، ފުރާ މީހުންގެ ޓެސްޓު ހެދުމުގެ ކަންކަން ކުރިއަށް ދާނީ، އައިޖީއެމްއެޗް، އޭޑީކޭ، ޓްރީޓޮޕް، ކުޅުދުއްފުށީ ރީޖަނަލް ހޮސްޕިޓަލް، އައްޑޫ އިކިއުޓޯރިއަލް ހޮސްޕިޓަލުންނެވެ. ނަމަވެސް، މި ލިސްޓުން ޓްރީޓޮޕް ހޮސްޕިޓަލް އުނިކުރުމަށް ފަހު މިހާރު ވަނީ ފުލުހުންގެ ލެބް އިތުރުކޮށްފައެވެ.
އޭރު އެޗްޕީއޭއިން ވަނީ ފުރާ މީހުން ޓެސްޓު ކުރުމަށް ނަގާ އަގު ވެސް އާންމުކޮށްފައެވެ. ނަމަވެސް މިފަހަރު ކުރި އިއުލާނުގައި އަގު ހާމަކޮށްފައިި ނުވާއިރު، އެ އިއުލާނުގައި ވަނީ، ޓެސްޓު ހެދުމަށް ފުރާ މީހުން ގުޅަން ޖެހެނީ ސީދާ ލެބޯޓްރީ ތަކަށް ކަމަށެވެ.
އެޗްޕީއޭން ވަނީ ފަތުރުވެރިން ޓެސްޓު ކުރުމަށް ލެބޯޓްރީތަކަށް ގުޅޭނެ ނަންބަރު ވެސް އާންމުކޮށްފައެވެ. އެ އެޖެންސީން ބުނީ، ފުރުމުގެ ކުރިން ޓެސްޓުގެ ނަތީޖާ ބޭނުންވާ ފަރާތްތަކުގެ ސާމްޕަލް، ފުރުމުގެ މަދުވެގެން 48 ގަޑިއިރު ކުރިން ލެބަށް ލިބެން ވާނެ ކަމަށެވެ.
އަދި ޓެސްޓު ކުރަން ބޭނުންވާ ފަރާތްތަކުން ދަތުރުކުރާ ކަމުގެ ލިޔުމުގެ ކޮޕީއާއި އައިޑީކާޑު ނުވަތަ ޕާސްޕޯޓުގެ މައުލޫމާތުގެ އިތުރުން ގުޅޭނެ ފޯނު ނަންބަރަކާއި ހުރި ތަނެއްގެ މައުލޫމާތު ވެސް ދޭން ޖެހޭނެ ކަމަށް އެ އެޖެންސީން ބުނެއެވެ.
