ކޯވިޑް-19 އާ ބެހޭގޮތުން މިހާތަނަށް ހޯދިފައިވާ ސައެންޓިފިކް ހޯދުންތަކުން ކޯވިޑް-19 އަށް ޕޮޒިޓިވްވެ، ބަލިން ރަނގަޅުވެފައިވާ މީހުންގެ ފަރާތުން ބަލިފެތުރޭކަން ކަށަވަރުކުރެވިފައި ނުވާތީ، ރާއްޖޭގައި ކޯވިޑް-19 އަށް ޕޮޒިޓިވްވެ ބަލިންރަނގަޅުވެފައިވާ މީހުން ބައެއް ކަންކަމުން އިސްތިސްނާވާނެއެވެ.
ކޯވިޑް-19 އަށް ޕޮޒިޓިވްވެ ރަނގަޅުވެފައިވާ މީހުންނަށް، އިސްތިސްނާތައް ހިނގާނީ ކޯވިޑް-19 އަށް ޕޮޒިޓިވްވި ދުވަހުން ފެށިގެން 3 (ތިނެއް) މަސްދުވަހުގެ މުއްދަތަށް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ބުނެފައެވެ.
އިސްތިސްނާ ވާ ކަންކަން:
1. ކޯވިޑް-19 އަށް ޕީސީއާރު ޓެސްޓް ކުރުން:
- ވަޒީފާއަށް ނުވަތަ މަސައްކަތަށް ނިކުތުމުގެ ބޭނުމުގައި ޓެސްޓް ކުރުން.
- ކޯވިޑް-19 ގެ އަލާމާތެއް ނެތް ނަމަ، ކޯވިޑް-19 އަށް ޕޮޒިޓިވްފައިވާ މީހެއްގެ ކޮންޓެކްޓަކަށް ވާތީ ޓެސްޓްކުރުން.
- ކޯވިޑް-19 ކޮންޓްރޯލް ކުރުމުގެ ގޮތުން ކުރިއަށް ގެންދެވޭ ސާވައިލެންސްގެ ތެރެއިން ޓެސްޓް ކުރުން
2. ކަރަންޓީނު ކުރުން:
- ކޯވިޑް-19 ގެ އަލާމާތެއް ނެތް ނަމަ، ކޯވިޑް-19 އަށް ޕޮޒިޓިވްވެފައިވާ މީހެއްގެ ކޮންޓެކްޓެއް ކަމުގައިވުމުން ކަރަންޓީނު ކުރުން.
- ރާއްޖޭގެ އެއްރަށުން އަނެއް ރަށަށް ދަތުރުކުރުމުގައި ކުރާ ކަރަންޓީނު ކުރުން.
- ކޯވިޑް-19 އާ ގުޅިގެން އެމީހަކު ދިރިއުޅޭ ގެއަށް ވަދެ ނުކުތުން މަނާކުރެވިފައިވާ ހާލަތުގައި ކަރަންޓީނުގައިހުރުން.
3. އައިސޮލޭޓް ކުރުން:
- އެހެން އެއްވެސް ކަމަކާ ގުޅިގެން ޓެސްޓްކޮށް ކޯވިޑް-19 އަށް ޕޮޒިޓިވްވުމުން އައިސޮލޭޓް ކުރުން / އެކަހެރިކުރުން.
އިއްޔެ ވަނީ 109 މީހުން އެބަލިން ރަނގަޅުވެފައެވެ. އަދި މުޅިއެކު މި ބަލިން ރަނގަޅުވި މީހުންގެ އަދަދު 4222 އަށް އަރާފައެވެ. މި ބައްޔަށް ޕޮޒިޓިވްވި 6779 މީހުންގެ ތެރެއިން 24 މީހަކު ވަނީ ނިޔާވެފައެވެ.
މިހާރު އެކްޓިވް ކޭސްތަކުގެ ތެރޭގައި ހިމެނެނީ 2531 މީހެކެވެ. އޭގެ ތެރެއިން 162 މީހަކު މިހާރު ވަނީ ހޮސްޕިޓަލުގައެވެ. އަދި 1457 މީހަކު އައިސޮލޭޝަން ފެސިލިޓީތަކުގައި އެބަ ތިއްބެވެ.
