ސިޔާސީ މީހުންނަށް ޖުޑީޝަލް ސާވިސް ކޮމިޝަން (ޖޭއެސްސީ)ގައި ނުތިބެވޭ ގޮތަަށް އެ ކޮމިޝަނުގެ ފޯމޭޝަން ބަދަލުކުރަން ގާނޫނުއަސާސީއަށް އިސްލާހު ގެންނަން މަހިބަދޫ ދާއިރާގެ މެންބަރު އަހުމަދު ތޯރިގް (ޓޮމް) ހުށަހަޅުއްވައިފިއެވެ.
ޓޮމް ހުށަހެޅުއްވި ބިލުގައި ބުނީ، ގާނޫނު އަސާސީ މިހާރު އޮތް ގޮތަށް ޖޭއެސްސީއަށް މެންބަރުން އައްޔަން ކުރުމުން އެކޮމިޝަނުން ބަލާ މައްސަލަތަކާއި ނިންމާ ނިންމުންތަކުގައި ވެރިކަން ހިންގުމުގެ ބާރާއި ގާނޫނު ހެދުމުގެ ބާރުގެ ނުފޫޒު ވަރަށް ބޮޑަށް ވަދެފައި ވާކަން ފާއިތުވި 12 އަހަރު ތެރޭ ފާހަގަ ވެފައިވާ ކަމަށެވެ. އަދި އެއީ ގާނޫނު އަސާސީން ދީފައިވާ އަދުލު އިންސާފު ގާއިމް ކުރުމުގެ ބާރަށް ލިބޭ މިނިވަންކަމާއި މުސްތަގިއްލުކަމަށް ހުރަސް އެޅޭ ކަމެއް ކަމަށް ބިލުގައި ބުނެފައިވެއެވެ.
ގާނޫނު އަސާސީން މިނިވަން ކަމާއެކު ތިން ބާރު ވަކިން ހިނގުމުގެ ފުރުސަތު ލިބިފައި ވާއިރު އަދުލު އިންސާފު ގާއިމް ކުރުމުގެ ބާރު ހަމަ މަގުގައި ހިފަހައްޓަން ފަރުމާކޮށްފައިވާ ޖޭއެސްސީ އެކުލަވާލުމުގައި، ވެރިކަން ކުރާ ބާރާއި ގާނޫނު ހެދުމުގެ ބާރުގެ ފަރާތުން ތަމްސީލުކުރަނީ ސިޔާސީ ފަރާތްތަކެވެ. އެހެން ކަމުން އެ ފަރާތްތަކުން ބައިވެރިވެގެން ޖޭއެސްސީން ބަލާ މައްސަލަތަކާއި ނިންމާ ނިންމުންތަކުގައި ނުރަނގަޅު، ސިޔާސީީ ނުފޫޒާއި ބާރު ވެސް އެކުލެވޭ ކަމަށް ބިލުގައި ވަނީ ފާހަގަ ކޮށްފައެވެ.
އެ ބިލުގައި ބުނީ، ދުނިޔޭގައި ކުރިއަރާފައިވާ ގައުމުތަކުގެ ޖުރިސްޑިކްޝަންތަކުގެ ޖުޑީޝަލް ކައުންސިލްތަކާއި ޖުޑީޝަލް ކޮމިޝަންތައް އެކުލަވާލުވުމުގައި ރިއާޔަތްކޮށްފައި ވާ ހަމަތަކަށް ބަލައި، ނުރަނގަޅު ސިޔާސީ ނުފޫޒާއި ބާރުން އެކަހެރިވާން ޖެހޭ ކަމަށެވެ. އަދި މި ބިލް ހުށަހެޅީ ޕްރޮފެޝަނަލް ގޮތެއްގައި ޖޭއެސްސީ މަސައްކަތް ކުރުމުގެ މާހައުލު ގާއިމްކުރުމުގެ ގޮތުން އެ ކޮމިޝަން އެކުލަވާލެވިގެންވާ ގޮތް ބަދަލު ކުރުމަށް ކަމަށް ޓޮމް ވިދާޅުވިއެވެ.
މިހާރު ޖޭއެސްސީ އެކުލަވާލާފައިވާ ގޮތުން، އެ ކޮމިޝަނުގައި ތިބެން ޖެހެނީ 10 މެންބަރުންނެވެ. އެއީ، ރައްޔިތުންގެ މަޖިލީހުގެ ރައީސް، ރައްޔިތުންގެ މަޖިލީހުގެ މެންބަރުންގެ ތެރެއިން މަޖިލީހުން ކަނޑައަޅާ މެންބަރަކު، އާންމުންގެ ތެރެއިން ރައްޔިތުންގެ މަޖިލިހުން ކަނޑައަޅާ މެންބަރެއް، ރައީސް ކަނޑައާޅާ މެންބަރަކު، ބަންޑާރަ ނައިބު، ސިވިލް ސާވިސް ކޮމިޝަންގެ ރައީސް، އުއްތަމަ ފަނޑިޔާރު ފިޔަވައި ސުޕްރީމްކޯޓްގައި ހިމެނޭ ފަނޑިޔާރުންގެ ތެރެއިން، އެކޯޓުން އިންތިހާބު ކުރާ ފަނޑިޔާރަކު، ދަށުކޯޓުތަކުގެ ފަނޑިޔާރުންގެ ތެރެއިން އެކޯޓުތަކުން އިންތިހާބު ކުރާ ފަނޑިޔާރަކު، ހައިކޯޓުގައި ހިމެނޭ ފަނޑިޔާރުންގެ ތެރެއިން އެކޯޓުން އިންތިހާބު ކުރާ ފަނޑިޔާރަކު އަދި ވަކީލުންގެ ފަރާތުން އިންތިހާބު ކުރާ މެންބަރެކެވެ.
ޓޮމް އިސްލާހު ހުށަހަޅާފައި ވަނީ، މަޖިލިސް ރައީސާއި މަޖިލިސް މެންބަރު، ރައީސް ކަނޑައާޅާ މެންބަރު، ބަންޑާރަނައިބު އަދި ސިވިލް ސާވިސް ކޮމިޝަންގެ ރައީސް ނުހިމަނާ ޖޭއެސްސީ އެކުލެވިގެންވާ ގޮތަށް ބަދަލު ގެނައުމަށެވެ.
ޓޮމް ވަނީ، މި މެންބަރުންގެ ބަދަލުގައި ޖޭއެސްސީއަށް އުއްތަމަ ފަނޑިޔާރާއި ހައި ކޯޓުގެ ފަނޑިޔާރަކާއި ދަށު ކޯޓުގެ ފަނޑިޔާރަކާއި ރިޓަޔާކޮށްފައިވާ ފަނޑިޔާރުންގެ ތެރެއިން އިންތިހާބުކުރާ ބޭފުޅަކާއި ވަކީލުންގެ ތެރެއިން އިންތިހާބުކުރަ ވަކީލަކާއި ރާއްޖޭގެ ޔުނިވާސިޓީތަކުގައި އިސްލާމީ ޝަރީއަތް ކިޔަވައިދޭ ލެކްޗަރާއަކާއި ގާނޫނީ ފަންނު ފިޔަވައި އެހެން ފަންނުތަކުގެ ތަޖުރިބާކާރުންގެ ތެރެއިން ރައީސް ހުށަހަޅުއްވައި، މަޖިލީހުން ރުހުންދޭ މެންބަރަކު ހިމެނުމަށް އިސްލާހު ހުށަހަޅާފައެވެ.
އެ އިސްލާހުގައި ބުނީ، އުއްތަމަ ފަނޑިޔާރު ފިޔަވައި ބާކީ ތިއްބެވި ފަރާތްތަކަށް ޖޭއެސްސީގެ މެންބަރުކަން ކުރެއްވޭނީ ފަސް އަހަރުގެ އެއް ދައުރުގައި ކަމަށެވެ. އަދި ދައުރު ހަމަވުމުން އެ ފަރާތަކަށް ޖޭއެސްސީގެ މެންބަރުކަމުގެ އިތުރު ދައުރެއް އަދާ ނުކުރެވޭނެ ކަމަށް އިސްލާހުގައި ވެއެވެ.
