ރާއްޖޭގައި ޗުއްޓީ ހޭދަކުރުމަށްފަހު ފުރާ ފަތުރުވެރިން ކޮވިޑް-19 އަށް ޓެސްޓު ކުރުމަށް 5 ހޮސްޕިޓަލެއް ހަމަޖައްސާ، އެ ހޮސްޕިޓަލުތަކުން ޓެސްޓު ހެއްދޭނެ އަގު އާންމުކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މި މައުލޫމާތު ހާމަކޮށްފައި ވަނީ ރޭގެ ވަގުތެއްގައެވެ. އެގޮތުން ފަތުރުވެރިންގެ ޓެސްޓު ހެއްދުން ހަމަޖައްސާފައި ވަނީ މާލެ ސަރަހައްދުގެ ތިން ހޮސްޕިޓަލަކުންނާއި އުތުރުގެ ހޮސްޕިޓަލެއްގެ އިތުރުން ދެކުނުގެ ހޮސްޕިޓަލަކުންނެވެ.
އެ ހޮސްޕިޓަލްތަކަކީ އައިޖީއެމްއެޗް، އޭޑީކޭ، ޓްރީޓޮޕް، ކުޅުދުއްފުށީ ރީޖަނަލް ހޮސްޕިޓަލް، އައްޑޫ އިކިއުޓޯރިއަލް ހޮސްޕިޓަލެވެ. މި ހޮސްޕިޓަލްތަކުން ކޮވިޑަށް ޓެސްޓު ކޮށްދިނުމުގެ އަގު އުޅެނީ 1500 ރުފިޔާއާއި 2000 ރުފިޔާއާ ދެމެދުއެވެ.
އެގޮތުން އައޖީއެމްއެޗުން 1534 ރުފިޔާއަށް ޓެސްޓު ކޮށްދޭއިރު، އޭޑީކޭން 1500 ރުފިޔާއަށް އަދި ޓްރީޓޮޕުން 2000 ރުފިޔާއަށް ޓެސްޓުކޮށްދެއެވެ. އަދި ކުޅުދުއްފުށީ ރީޖަނަލް ހޮސްޕިޓަލާއި އައްޑޫ އިކިއުޓޯރިއަލް ހޮސްޕިޓަލުން ކޮވިޑަށް ޓެސްޓު ކޮށްދެނީ އައިޖީއެމްއެޗާއި އެއް އަގެއްގައި 1534 ރުފިޔާއަށެވެ.
އެޗްޕީއޭން ވަނީ ފަތުރުވެރިން ޓެސްޓު ކުރުމަށް ހޮސްޕިޓަލްތަކަށް ގުޅޭނެ ނަންބަރު ވެސް އާންމުކޮށްފައެވެ. އެ އެޖެންސީން ބުނީ، ފުރުމުގެ ކުރިން ޓެސްޓުގެ ނަތީޖާ ބޭނުންވާ ފަރާތްތަކުގެ ސާމްޕަލް، ފުރުމުގެ މަދުވެގެން 48 ގަޑިއިރު ކުރިން ލެބަށް ލިބެން ވާނެ ކަމަށެވެ.
އަދި ޓެސްޓު ކުރަން ބޭނުންވާ ފަރާތްތަކުން ދަތުރުކުރާ ކަމުގެ ލިޔުމުގެ ކޮޕީއާއި ޓެސްޓު ކުރާ ލެބަކުން އެދޭ މައުލޫމާތާއި ތަކެތި/ލިޔެކިއުން ފޯރުކޮށްދޭން ޖެހޭނެ ކަމަށެވެ.
ރާއްޖެއިން ފުރާ ފަތުރުވެރިން ޓެސްޓު ކުރުމުގެ އިންތިޒާމް ހަމަޖައްސާފައިވާއިރު،
ރާއްޖެއަށް އަންނަ ފަތުރުވެރިންގެ ތެރެއިން ސަފާރީ ތަކުގައި ޗުއްޓީ ހޭދަ ކުރުމަށްފަހު ފުރާ ފަތުރުވެރިންގެ ޕީސީއާރު ޓެސްޓު ހެދުމުގެ އިންތިޒާމުތައް ނެޝަނަލް ބޯޓިން އެސޯސިއޭޝަން އޮފް މޯލްޑިވްސް އިން ވަނީ ހުޅުމާލޭގައި ހަމަޖައްސާފައެވެ.
