ކޮވިޑް-19އާ ގުޅިގެން ދިން ވަގުތީ ބޯހިޔާވަހި ކަމުގައި މިވަގުތު ތިބި އާއިލާއަކުން ރަށަަށް ދިއުމާ ދެކޮޅު ހަދާފައިވާ ކަމަށް މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސް އިން ބުނެފިއެވެ.
ޖެންޑާ މިނިސްޓްރީން ބުނީ ކޮވިޑް-19އާ ގުޅިގެން ވަގުތީ ރައްކާތެރިކަން ފޯރުކޮށް ދެމުން ގެންދިޔަ ފަރާތްތަކުގެ ތެރެއިން މި ވަގުތު ވަގުތީ ހިޔާގައި ތިބީ އެއް އާއިލާއަކަށް ނިސްބަތްވާ 13 މީހުން ކަމަށެވެ.
އެ މިނިސްޓްރީން މިހާރު ނިންމާފައި ވަނީ ވަގުތީ ބޯހިޔާވަހިކަން ނިމުމަކަށް ގެންނަން ކަމަށް ވުމުން އެތާނގައި ތިބި އާއިލާ އެތަނުން ނުކުމެ، ރަށަށް ދާން އެދުމުން އެކަމާ އިންކާރު ކޮށްފައި ވާ ކަމަށާއި، އައި ދިރިއުޅުމުގެ ހަރަދުތައް އަމިއްލައަށް ހަމަޖެއްސުމަށް އެތައް ފަހަރަކު އެދުނު ނަމަވެސް އެކަންވެސް ކޮށްފައި ނުވާ ކަމަށް މިނިސްޓްރީން ބުނެއެވެ.
އެ އާއިލާގެ ތެރޭގައި ހަތަރު ކުޑަކުދިން ހިމެނޭ ކަމަށާއި އެ 13 ފަރާތުގެ އިޖުތިމާއި އަދި އިގްތިސޯދީ ހާލަތު ދެނެގަތުމަށް ހެދި އެސެސްމަންޓް ތަކަށް ރިއާޔަތް ކުރާ އިރު، އެ ފަރާތްތަކުގެ އިގުތިސާދީ ހާލަތު ބަދަލުވެފައި ވާ ކަމަށްވެސް މިނިސްޓްރީން ބުނެއެވެ.
މާލެ ސަރަހައްދުގެ ފުރަބަންދުގެ ހާލަތަށް ހެލެތް ޕްރޮޓެކްޝަން އެޖެންސީ (އެޗްޕީއޭ) ގެ ފަރާތުން ލުއިތަކެއް ދިނުމާއި ސަރުކާރުގެ މުއައްސަސާތަކުން ކޮވިޑް-19އާ ގުޅިގެން ހިންގި ހަރަކާތްތައް ޖުލައި މަހުގެ އެއް ވަނަ ދުވަހުން ފެށިގެން ވަނީ ނިމުމަކަށް ގެނެސްފައެވެ. އެއާއެކު ވަގުތީ ހިޔާތަކުން ދެމުން ގެންދިޔަ ހިދުމަތްތަކަށް ނިމުމެއް ގެނައުމަށް އެ މިނިސްޓްރީންވެސް ނިންމައިފައިވާ ކަން އިއުލާން ކޮށްފައި ވަނީ މިއަދެވެ.
އެ މިނިސްޓްރީން ދެމުން ގެންދިޔަ ހިދުމަތްތައް ހުއްޓާލަން ނިންމާފައިވާ ނަމަވެސް ވަގުތީ ހިޔާގައި އަންހެނުންނާއި ކުޑަކުދިން ހިމެނޭ ގޮތަށް އާއިލާއެއް ތިބުމާއެކު، އެ ފަރާތްތައް ނިސްބަތްވާ ރަށަށް ދިއުމަށް އެދޭ ނަމަ، އެ ކަންކަން މިނިސްޓްރީން ހަމަޖައްސައި ދޭނޭ ކަމަށާއި، އެ ނޫން ގޮތެއް ހަމަޖެއްސުމަށް ބޭނުންވާ ނަމަ، އެ ނޫން އިންތިޒާމެއް ހަމަޖެއްސުމުގެ ފުރުސަތު މިއަދާ ހަމައަށް ވެސް އެ ފަރާތްތަކަށް ދީފައިވާނެ ކަމަށް އެ މިނިސްޓްރީން ބުނެއެވެ.
އަދި މިހާރު ވަގުތީ ހިޔާތަކުގައި ތިބި ފަރާތްތަކުގެ ތެރެއިން ވަޒީފާ ގެއްލިފައިވާ ފަރާތްތަކަށް މިނިސްޓްރީ އޮފް އިކޮނޮމިކް ޑިވަލޮޕްމަންޓްގެ "ޖޮބް ޕޯޓަލް"ގައި ރަޖިސްޓްރީކޮށް، އެ މިނިސްޓްރީން އެހީތެރިކަން ހޯދުމަށް ލަފާ ދީފައިވާނެ ކަމަށާއި ދިގުމުއްދަތެއް ވަންދެން މާލެގައި ދިރިއުޅުން ބިނާކޮށްފައި ވާ އާއިލާތައް އެނބުރި ރަށަށް ދިއުމަށް އުޒުރުވެރި ވާތީ، އެ ފަރާތްތަކަށް ވެދެވޭނެ އެހީތެރިކަމާ ގުޅޭގޮތުން ވެސް ކަމާ ގުޅޭ މުއައްސަސާތަކާ މަޝްވަރާ ކުރެވި، އެ އާއިލާތަކަށް ފޯރުކޮށް ދެވޭނެ އެހީތެރި ކަމާމެދު ގޮތްތަކެއް ނިންމުމުގެ މަސައްކަތް ވެސް އެ މިނިސްޓްރީން ކުރަމުން ގެންދާ ކަމަށް ވަނީ ބުނެފައެވެ.
ޖެންޑާއިން މި ފިޔަވަޅު އަޅާއިރު އެތާ ތިބި އާއިލާ ހެދި ގޮތެއް ސާފެއް ނުވެއެވެ.
ކޮވިޑް-19އާ ގުޅިގެން، މި ބަލި ފެތުރޭ މިންވަރު ކޮންޓްރޯލް ކުރުމަށް ޓަކައި އެޗްޕީއޭ އިން މާލެ ސަރަހައްދު ފުރަބަންދުގެ ހާލަތަށް ގެނައުމާ ގުޅިގެން 253 ފަރާތަކަށް ވަނީ ވަގުތީ ބޯހިޔާވަހިކަން ފޯރުކޮށްދީފައެވެ. އެއީ 103 ފިރިހެނުންނާއި 144 އަންހެނުން އަދި އެއްމަސް ނުފުރޭ 6 ކުދިންނެވެ. އަދި މިހާރު މިނިސްޓްރީން ނިންމާފައިވަނީ އެމީހުން ތިބި ތަން އަނބުރާ ޔޫތު މިނިސްޓްރީއާ ހަވާލު ކުރަން ކަމަށްވެސް ޖެންޑާއެިން ބުނެއެވެ.
އަމިލައް ބިން އެބަހުރި، ފިހާރައެއް ހުރެޔޯ، އަމިއްލަ ޕްރައިވެޓް ކާރެއް އޮވެޭ، މިވަރުން ވެސް މިކިޔަނީ އެއްވެސް ގޮތެއް ހަމަނެތޯ????♀️