އޮގަސްޓް މަސް ފެށުނީއްސުރެ ރާއްޖެއިން ޕޮޒިޓިވްވާ މީހުންގެ އަދަދު 100 އިން މަތީގައި އުޅުމަށްފަހު، އިއްޔެ ޕޮޒިޓިވްވި މީހުންގެ އަދަދު ދަށްވެއްޖެއެވެ.
މި މަހު 6 ދުވަސް ފާއިތުވެފައިވާއިރު، ޕޮޒިޓިވްވި މީހުންގެ އަދަދު އުޅެނީ 100 އިން މަތީގައެވެ. އަދި މި އަދަދު ދަށްވިއިރު، އެއީ މި މަހު މިހާތަނަށް އެންމެ ގިނަ ސާމްޕަލް ނެގި ދުވަހެވެ. އެގޮތުން އިއްޔެ 1443 ސާމްޕަލް ނެގިއިރު އޭގެ ތެރެއިން ޕޮޒިޓީވްވީ 83 ސާމްޕަލެވެ.
ރާއްޖެއިން ޕޮޒިޓިވްވާ މީހުންގެ ނަންބަރުތައް ދުވަހެއް ދުވަހަކަށް އިތުރުވަމުން ދިއުމާ ގުޅިގެން ގިނަ ބައެއްގެ ފާޑުކިއުން ވަނީ ސަރުކާރަށާއި އަދި ދިވެހިންނަށް ވެސް އަމާޒުވެފައެވެ. އެގޮތުން މިއީ ފަރުވާކުޑަކަމާއި ފަރުދީ ޒިންމާ އަދާ ނުކުރުމުގެ ނަތީޖާ ކަމަށް ވެސް ގިނަ ބަޔަކު ދަނީ ބުނަމުންނެވެ.
އެއާއެކު، ކޮވިޑާ ދެކޮޅަށް އަޅާފައިވާ ފިޔަވަޅުތައް ވެސް ވަނީ ހަރުކަށިކޮށްފައެވެ. މާސްކު އެޅުން މަޖުބޫރު ކުރުމާއި ކާފިއު ވަގުތެއް އެކުލަވާލުމުގެ އިތުރުން ގައިގޯޅިވެ ކުޅޭ ކުޅިވަރުތައް ހުއްޓާލަން އެންގުން ވެސް މެއެވެ. މި ުރިހާ ކަމަކާ އެކުވެގެން ފަރުދީ ޒިންމާ އަދާ ކުރުމުގައި ދިވެހިން ދެމިތިބެއްޖެނަމަ ރާއްޖޭގެ ނަންބަރުތައް މިހާރު ހުރި ވަރަށް ވުރެވެސް އިތުރަށް ދަށްކުރެވޭނެ ކަމަށް ލަފާ ކުރެވެއެވެ.
އިއްޔެ ޕޮޒިޓިވްވި 86 މީހުންގެ ތެރެގައި ހިމެނެނީ 56 ދިވެހިންނާއި ބަންގްލަދޭޝްގެ 27 މީހުންގެ އިތުރުން އިންޑިއާ މީހަކާއި ފިލިޕީންގެ މީހެއްގެ އިތުރުން ލަންކާ މީހެކެވެ. އަދި މި 86 މީހުންގެ ތެރެއިން 85 މީހުން މާލެ ސަރަހައްދުން ޕޮޒިޓިވްވެފައިވާއިރު އެކަކު ޕޮޒިޓިވްވެފައި ވަނީ އަތޮޅުތެރެއިންނެވެ.
ރާއްޖެއިން ޖުމްލަ ޕޮޒިޓިވްވި މީހުންގެ އަދަދު 4680 އަށް އަރާފައިވާއިރު، އިއްޔެ 19 މީހަކު ބަލިން ރަނގަޅުވެ، ޖުމްލަ ރަނގަޅުވި މީހުންގެ އަދަދު ވަނީ 2725 އަށް އަރާފައެވެ. މިހާރު ރާއްޖޭގައި ކޮވިޑް ކޭސްތައް އިތުރު ވަމުންދާއިރު އެކްޓިވް ކޭސްގެ ގޮތުގައި ޖުމްލަ 1936 ކޭސް އަށް ވަނީ އިތުރުވެފައެވެ. އޭގެ ތެރެއިން 128 މީހަކަށް ހޮސްޕިޓަލުގައި ފަރުވާ ދެމުންދާއިރު، އައިސޮލޭޝަން ފެސިލިޓީގައި ޖުމްލަ 1391 މީހުން އެބަ ތިއްބެވެ.
