ބިދޭސީންގެ ފަރާތުން މިހާރު ފެންމަތިވަމުން ދާ މައްސަލަ ތަކަކީ ގައުމީ ސަލާމަތަށް އޮތް ބޮޑު ނުރައްކަލެއް ކަމަށް ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ސިފަ ކުރައްވާ އިންޒާރު ކުރައްވައިފިއެވެ.
ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގައި ވާހަކަ ދައްކަވަމުން ޝަމާލް ވިދާޅުވީ ބިދޭސީންގެ ސަބަބުން ރާއްޖެއިން މިހާރު ފެންނަނީ ބޭރުގެ އިސްއިތުމާރީ ބާރަކުން އަރާ މި ގައުމު ހިފުމުން ފެންނާނެ ކަހަލަ މަންޒަރުތަކެއް ކަމަށާއި ގައުމީ ސަލާމަތަށް އޮތް ބޮޑު ނުރައްކަލެއް ކަމަށެވެ. އަދި މި މައްސަލަ ގައުމީ ސަލާމަތަށް އޮތް ނުރައްކަލަށް ވަނީ ކީއްވެގެންތޯ ބެލުމަކީވެސް މުހިންމު ކަމަށް ޝަމާލް ވިދާޅުވިއެވެ.
ޝަމާލް ވިދާޅުވީ ގަވައިދާ ހިލާފު ބިދޭސީންގެ މައްސަލައަކީ އެތައް އަހަރެއް ވެފައި އޮތް މައްސަލައެއް ކަމަށާއި ސިފައިން ހޯދާފައިވާ މައުލޫމާތުގެ މައްޗަށް ބިނާކޮށް ރާއްޖޭގައި މިއަދު 179،954 ބިދޭސީން ރަޖިސްޓާ ވެފައިވާއިރު 66،000 އަށް ވުރެ ގިނަ ބިދޭސީން ޑޮކިއުމަންޓެއް ނެތި އުޅޭ ކަމަށެވެ.
މީގެ އިތުރުން ޝަމާލް ވިދާޅުވީ ގައުމީ ސަލާމަތަށް މި މައްސަލަ ވެގެން ދަނީ އެހެން ގައުމެއްގެ ބަޔަކު އަރާ އަދި އެ މީހުންގެ މައްޗަށް ގާނޫނެއް އަދި ގަވައިދެއް ވެސް ނުހިންގޭ ގަވައިދާ ހިލާފު މީހުން ކަމަށްވާތީ ކަމަށާއި މިހާރު މިކަން ރާއްޖޭގެ މިނިވަންކަމަށް ބުރޫއަރާ ހިސާބަށް ގޮސްފައިވާއިރު ރާއްޖޭގެ ޒުވާނުންގެ އާބާދީއަށް ވުރެ ރާއްޖޭގައި އޮތް ބިދޭސީންގެ އާބާދީ ބޮޑު ކަން ވެސް ޝަމާލް ފާހަގަ ކުރެއްވިއެވެ.
ބިދޭސީންގެ މައްސަލައަކީ ސީރިޔަސް މައްސަލަ އެއް ކަމަށާއި އެ މައްސަލަ ހައްލު ކުރަން ގައުމުގެ ދިފާއީ ބާރުތަކުގެ އިތުރުން ދައުލަތުގެ ހުރިހާ މުއައްސަސާތަކާއި އިދާރާތައް ގުޅިގެން މަސައްކަތް ކުރަން ޖެހޭ ކަމަށް ޝަމާލް ވިދާޅުވިއެވެ.
