ލޯކަލް ޓޫރިޒަމަށް ބިން ދޫކުރަން ނިންމާފައިވާ ރަށްތަކުގެ ކުލި ކުޑަކުރަން ނިންމައިފައި ވާ ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެއެވެެ.
ފައްޔާޒް ވިދާޅުވީ ރާއްޖޭގެ އުތުރާއި ދެކުނުގައި ޓޫރިޒަމް ކުރިއެރުވުމުގެ ގޮތުން ނުވަ ސަރަހައްދަކުން ޓޫރިޒަމަށް ނަގާ ކުލި ކުޑަކުރަން ނިންމާފައިވާ ކަމަށެވެ.
އެގޮތުން އައްޑޫ އާއި ފުވައްމުލަކުގައި އަކަމީޓަރަކަށް ނަގަން ހަމަޖެހިފައި ވަނީ ދެ ޑޮލަރު ކަމަށާއި އެންމެ ގިނަވެގެން ކުލީގެ ގޮތުގައި ނަގަން ހަމަޖެހިފައި ވަނީ 800،000 ޑޮލަރު ކަމަށެވެ. އަދި ހއ އާއި ހދ ނަމަ ކޮންމެ އަކަމީޓަރުކަށް ދެ ޑޮލަރު ކަމަށާއި އެންމެ ގިނަވެގެން ކުލީގެ ގޮތުގައި ނަގަން ހަމަޖެހިފައި ވަނީ 1 މިލިއަން ޑޮލަރެވެ. އަދި ށ އަތޮޅާއި ގއ، ގދ، ތ އަދި ލ އިން ކޮންމެ އަކަމީޓަރަކަށް ތިން ޑޮލަރު ނަގަން ހަމަޖެހިފައި ވާއިރު، އެންމެ ގިނަވެގެން ކުލީގެ ގޮތުގައި ނަގަން ހަމަޖެހިފައި ވަނީ 1.5 މިލިއަން ޑޮލަރެވެ. ދެން ބާކީ ހުރި އަތޮޅު ތަކުގެ ރަށްތަކަށް އަކަމީޓަރަކަށް ހަތަރު ޑޮލަރު ކަމަށާއި އެންމެ ގިނަވެގެން ކުލީގެ ގޮތުގައި ނަގަން ހަމަޖެހިފައި ވަނީ 1 މިލިއަން ޑޮލަރުގެ ރޭޓުން ކަމަށްވެސް ފައްޔާޒް ވިދާޅުވިއެވެ.
ޓޫރިޒަމް މިނިސްޓަރުގެ މަގާމުގައި ހުންނެވި އަލީ ވަހީދު އެ މަގާމުން ވަކިކޮށް، އެ މިނިސްޓްރީގެ ހިންގުން ވަގުތީ ގޮތުން އިކޮނޮމިކް މިނިސްޓަރު ފައްޔާޒް އިސްމާއިލާ ހަވާލުކޮށްފައި ވަނީ މިމަހުގެ 9 ވަނަ ދުވަހެވެ.
އަލީ ވަހީދު މަގާމުން ވަކިކޮށްފައި ވަނީ ޖިންސީ ގޯނާގެ ތުހުމަތު ތަކެއްގައެވެ. އެގޮތުން، އަލީ ވަހީދު ޓޫރިޒަމް މިނިސްޓްރީގެ 12 މުވައްޒަފަކަށް ޖިންސީ ގޯނާ ކޮށްފައި ވާ ކަމަށް ދަނީ އަޑުފެތުރެމުންނެވެ. މި މައްސަލަ މިހާރު ޖެންޑާ މިނިސްޓްރީންނާއި ފުލުހުން ދަނީ ތަހުގީގު ކުރަމުންނެވެ.
