ފުޅާދާއިރާއެއްގައި ކޮންސްޓްރަކްޝަން މަސައްކަތް ކުރާ ކުންފުނި، އާރުސީސީގެ ބިދޭސީ މުވައްޒަފުން މުޒާހަރާ ކޮށްފައިވާ ކަމަށް ބުނެ ސޯޝަލްމީޑިއާގައި ފަތުރާފައިވަވީ ދޮގު ވާހަކަތަކެއް ކަމަށް ބުނެ މައްސަލަ ފުލުހަށް ހުށަހަޅަން އެ ކުންފުނިން ނިންމައިފިއެވެ.

ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) ކުންފުނިން ބުނީ އެ ވާހަކަތައް ދޮގުކުރާ ކަމަށައި ކުންފުނީގެ އަގު ވެއްޓޭގޮތަށް މައުލޫމާތު ފަތުރާފައިވާތީ އެކަންކުރި މީހުންގެ މައްސަލަ ފުލުސް އޮފީހަށް ހުށައަޅާނެ ކަމަށެވެ.

އާރުސީސީގެ ޗެއާމަން އަދި ދަނގެތީ ދާއިރާގެ މެންބަރު ކާނަލް މުހައްމަދު ނާޒިމް ވިދާޅުވީ ފޭކް ނިއުސްއަށް ރާއްޖޭގައި ފުރުސަތެއް ނެތް ކަމަށާއި އެ ކުންފުންޏާ ގުޅޭގޮތުން ދޮގު ހަބަރު ފަތުރާފައި ވާތީ އެ މައްސަލަ މިރޭ ފުލުހަށް ހުށަހަޅުއްވާނެ ކަމަށެވެ.

އާރުސީސީގެ މުވައްޒަފުންތަކެއް ފޮޓޯ ނަގަން މާފަންނުގައި ހުންނަ ފޮޓޯ ފްރެންޑް ކައިރީގައި ކިއު ހަދައިގެން ތިއްބާ، އެ މުވައްޒަފުން މުސާރަ ނުދީގެން މުޒާހަރާ ކުރަނީ ކަމަށް ބުނެ، ސޯޝަލް މީޑިއާ ޕްލެޓްފޯމެއް ކަމަށް ވާ އެމްވީ ކްރައިސިސްގައި، ފޮޓޯއެއް އާންމު ކުރި ކަމަށް އާރުސީސީން ބުނެއެވެ.

އާރުސީސީގެ ބިދޭސީ މުވައްޒިފުން މުޒާހަރާ ކޮށްފައިވާ ކަމަށް ބުނެފައި ވާއިރު، މުސާރަ ނުލިބުމުން ހުޅުމާލޭގައި މިއަދު ވަނީ ބިދޭސީންތަކެއް މުޒާހަރާ ކޮށްފައެވެ. އެއީ ހުޅުމާލޭގައި ފުލުހުންނާއި ސިފައިންނަށް ފްލެޓް ހެދުމުގެ މަސައްކަތުގައި އުޅޭ ބިދޭސީ ބައެކެވެ.

މީގެ އިތުރުން މިދިޔަ ބުރާސްފަތި ދުވަހު، ރައްޔިތުންގެ މަޖިލީހުގެ ށ. މިލަންދޫ ދާއިރާގެ މެންބަރު އަލީ ރިޒާގެ ކުންފުނިން ބ އަތޮޅުގައި ތަރައްގީކުރާ ރިސޯޓެއް ކަމަށްވާ ބޮޑުފިނޮޅުގައި މަސައްކަތްކުރާ، ބިދޭސީންތަކެއް ވަނީ ދިވެހިން ރަހީނުކޮށް ހަމަނުޖެހުން ހިންގާފައެވެ. އެމީހުން ހަމަނުޖެހުން ހިންގީ 6 މަހުގެ މުސާރަ ނުލިބޭ ކަމަށް ބުނެއެވެ.

ހަބަރު ބިދޭސީން ކާނަލް ނާޒިމް