ރޭޕްކޮށް ބަލިވެއިން 17 އަހަރުގެ ކުއްޖާގެ މައްސަލައިގައި މީހަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.

ފުލުހުން ބުނީ، އަަންހެން ކުއްޖެއް ރޭޕް ކުރި މައްސަލައިގައި ކޯޓު އަމުރެއްގެ ދަށުން މިއަދު ހައްޔަރު ކޮށްފައި ވަނީ 23 އަހަރުގެ ދިވެހި ފިރިހެނެއް ކަމަށެވެ.

އެ މައްސަލަ، ކުއްޖާ ރޭޕް ކޮށްފައިވާ މައްސަލައެއްގެ ގޮތުގައި ފުލުހުންގެ ކްރައިމް އެގެއިންސްޓް ޗިލްޑްރެން ޑިޕާޓްމެންޓްގެ ތަހުގީގު ޓީމަކުންނާއި ޖެންޑާ މިނިސްޓްރީއިން ތަހުގީގު ކުރަމުންދާ ކަމަށް ފުލުހުން ވަނީ ބުނެފައެވެ. މިހާރު އެ ކުއްޖާ ހުރީ ރައްކާތެރި މާހައުލަކަށް ބަދަލުކުރެވިފައި ކަމަށް ވެސް ޖެންޑާއިން ބުނެއެވެ.

މައުލޫމާތު ލިބިފައިވާ ގޮތުގައި މިއީ މެދު ރާއްޖެތޭރޭގައި ހިމެނޭ ރަށެއްގައި ހިނގާފައިވާ ކަމެކެވެ. އަދި އެ ކުއްޖާގެ އާއިލާއަކީ ދީނީ ގޮތުން ހަރުކަށި ފިކުރުގެ ބައެއް ކަމަށް ވެސް މައުލޫމާތު ލިބެއެވެ. އަދި އެ ކުއްޖާ ކޯޓުން ބޭރުން ކައިވެނި ކޮށްފައިވާ ކަމަށް ވެސް މައުލޫމާތު ލިބެއެވެ.

މީގެ ކުރިންވެސް މެދުރާއްޖެތެރެއިން 13 އަހަަރުގެ އަންހެން ކުއްޖަކާ ކޯޓުން ބޭރުގައި ކައިވެނިކޮށްގެން ދަރިއަކު ލިބިފައިވާ މައްސަލައެއް ވަނީ ފެންމަތިވެފައެވެ. މިދިޔަ އަހަރު ފަހުކޮޅުގައި އެ މައްސަލަ ފެންމަތިވެފައި ވަނީ ލަނޑާ ނަގަން ދިޔަ ދޯންޏެއްގައި ހިނގި މާރާމާރީއެއްގެ މައްސަލައަކާ ގުޅިގެންނެވެ. އެ މައްސަލައާ ގުޅިގެން އެ ކުއްޖާގެ މައިން ބަފައިން ވަނީ ކުއްޖާއަށް އިހުމާލުވި ކަމުގެ މައްސަލައިގައި ފުލުހުންގެ ބެލުމުގެ ދަށަށް ގެންގޮސްފައެވެ. އަދި އެ ކުއްޖާގެ އިތުރުން އާއިލާގައި ތިބި އިތުރު 5 ކުދިން ވަނީ ޖެންޑާގެ ބެލުމުގެ ދަށަށް ވެސް ގެންގޮސްފައެވެ.

މި މައްސަލައިގެ އިތުރުން މެދުރާއްޖެތެރޭ ރަށެއްގައި ކިޔަވާ ކުއްޖަކު ބަނޑުބޮޑުވި މައްސަލައެއްވެސް ވަނީ ފެންމަތިވެފައެވެ. އެ މައްސަލައިގައި ކުއްޖާ ބަނޑުބޮޑުކަން އެނގިފައި ވަނީ ކުއްޖާ ބަލިވެގެން ޑޮކްޓަރަށް ދެއްކުމުންނެވެ. އަދި އެކުއްޖާ ރޭޕްކުރި ކަމަށް ތުހުމަތު ކުރެވޭ ފަރާތެއް ކަމަށް މައުލޫމާތު ލިބިފައި ވަނީ އެ ކުޖާގެ ދައްތަގެ ފިރިމީހާ (ޅިއަނު) އެވެ.

ހަބަރު ރޭޕް ޕޮލިސް ޖެންޑާ މިނިސްޓްރީ