މިދިޔަ ސެޕްޓެމްބަރު މަހު ހެންވޭރު އަބަދަށްފެހި މަގުގައި ހިނގި އަލިފާނުގެ ހާދިސާގައި ނިޔާވި، ތ. ބުރުނީ، ފެންފިޔާޒުގެ، އައިޝަތު ޝައުނާގެ ފޯނު ކޯލުތައް އަޑުއެހުމާއި މެސެޖުތައް ބެލުމުގެ އަމުރު ފުލުހުންނަށް ދެވެން ނެތް ކަމަށް ހައިކޯޓުން ނިންމައިފިއެވެ.

ޝައުނާ ނިޔާވުމުގެ ކުރިން ކޮށްފައިވާ ފޯނު ކޯލުތައް އަޑުއެހުމުގެ ހުއްދަ ދިނުމަށް ކޮމިއުނިކޭޝަން މިނިސްޓްރީގެ މައްޗަށް އަމުރުކުރުމަށް އެދިފައި ވަނީ ފުލުހުންގެ ފަރާތުންނެވެ. މިކަމަށް އެދިފައި ވަނީ 2019، ސެޕްޓެމްބަރު 20 ވަނަ ދުވަހުގެ 19:21 ހާއިރު ހިނގި އަލިފަނުގެ ހާދިސާ ތަހުގީގު ކުރުމުގެ ގޮތުންނެވެ.

ނަމަވެސް، ޝައުނާއަކީ އެއްވެސް ކުށަކަށް ތުހުމަތުވާ ފަރާތެއް ނޫން ކަމަށް ވުމުން އޭނާގެ ޒާތީ މުއާމަލާތު އަޑުއަހާ ބެލުމުގެ ހުއްދަ ދެވެން ނެތް ކަމަށް ކްރިމިނަލް ކޯޓުން ވަނީ މީގެ ކުރިން ނިންމާފައެވެ. މިހެން ނިންމާފައި ވަނީ ފުލުހުން ތަހުގީގު ކުރަމުން ދަނީ އަލިފާނުގެ ހާދިސާ ކަމަށް ވުމާއެކު، މި މައްސަލާގައި ޝައުނާއަކީ ތުހުމަތު ކުރެވޭ ފަރާތެއް ނޫން ކަމަށް ކްރިމިނަލް ކޯޓުން ނިންމާފައި ވުމުންނެވެ.

ކްރިމިނަލް ކޯޓުގެ ނިންމުން ޕްރޮސެކިއުޓާ ޖެނެރަލްގެ ފަރާތުން އިސްތިނާފު ކުރުމަށް ހައި ކޯޓަށް ހުށަހެޅުމުން، ހައިކޯޓުން މިއަދު ނިންމީ ކްރިމިނަލް ކޯޓުގެ ނިންމުމަށް ތާއިދު ކުރާ ގޮތަށެވެ.

ކްރިމިނަލް ކޯޓެކޭ އެއްގޮތަށް މި އަމުރު ދެވެން ނެތް ކަމަށް ހައި ކޯޓުގެ ހުކުމުގައި ވެސް ބުނަނީ ޖިނާއީ އިޖުރާއާތުގެ ގާނޫނުގެ ދަށުން ސަވައިލަންސް ކުރުން ނޫން ގޮތަކަށް މީހެއްގެ ޒާތީ މުއާސަލާތްތައް ބެލުމުގެ އަމުރުތައް ދެވޭނީ ކުށެއްގެ ތުހުމަތު ކުރެވޭ ހާލަތުގައި އެކަނި ކަމަށް ވުމެވެ.

ހައި ކޯޓުގެ ހުކުމުގައި ބުނީ ފޯނަކީ ޒާތީ މުވާސަލާތު ކުރާ ވަސީލަތަކަށް ވެފައި، ޒާތީ މުއާސަލާތު ތަކަކީ ހުރުމަތްތެރި ވެގެންވާ އެއްޗެއް ކަމަށް ގާނޫނުއަސާސީގެ 24 ވަނަ މާއްދާގައި ބަޔާން ކޮށްފައިވާ ކަމަށެވެ. އަދި އެފަދަ ހައްގެއް ހަނި ކުރެވޭނީ ގާނޫނަކުން ކަމަށާއި، ގާނޫނަކުން އެފަދަ ބާރެއް ނުދެނީސް، ކޯޓުތަކުން އަމިއްލަ އަށް ހައްގެއް ހަނި ކުރެވޭނެ ގޮތެއް ނޯންނާނެ ކަމަށް އެ ހުކުމުގައި ވެއެވެ.

ހެންވޭރުގައި ހިނގި ބޮޑު އަލިފާނުގެ ހާދިސާގައި ޝައުނާގެ ހަށިގަނޑު ފެނުނީ އަލިފާން ރޯވިތާ 4 ގަޑިއިރެއް ހާއިރު ފަހުންނެވެ. މިއީ މިފަހުން މާލޭގައި ހިނގި އެންމެ ބޮޑު އަލިފާނުގެ ހާދިސާއެވެ.

ހަބަރު ހައި ކޯޓް އަލިފާނުގެ ހާދިސާ ޕޮލިސް