ކޮރޯނާވައިރަސް ޑިޒީޒް (ކޮވިޑް-19) ފެތުރުން ކޮންޓްރޯލް ކުރެވިފައި ނުވާ އެމެރިކާގެ ނޮދާން ކެލިފޯނިއާއޭ ކިއުނު ސަރަހައްދުގައި އާއިލީ އެއްވުމެއް ބޭއްވި އެއް އާއިލާއެއްގެ 13 މެމްބަރުން، ކޮވިޑް-19 އަށް ޕޮޒިޓިވްވެފައި ވާ ކަމަށް އެމެރިކާގެ އޮފިޝަލުން ހާމަ ކުރައްވައިފިއެވެ.
މިއީ އެމެރިކާގައި މިހާރުވެސް ހަލުވިކަމާއެކު ފެތުރެމުންދާ ބަލިމަޑުކަމުގެ ލިސްޓަށް އިތުރުވި މިފަދަ ބައިވަރު އެތައް ބޮޅުތަކެއްގެ ތެރެއިން އެއް ބޮޅެވެ.
އޮރެގަން ބޯޑަރު ސަރަހައްދުގައި އޮންނަ ޝޭސްޓާ ކައުންޓީގައި އާއިލީ ޕާޓީ ކުރިއަށް ދިޔައީ މިމަހުގެ ކުރީ ކޮޅުގައެވެ. ޕާޓީއަށް ހާޒިރު ވި މީހުންގެ ތެރެއިން އެންމެ ފުރަތަމަ ކޮވިޑް-19އަށް ޕޮޒިޓިވްވީ ޒުވާން ފިރިހެނެކެވެ. އޭނާ ޕޮޒިޓިވްވީ ޖޫން 14 ވަނަ ދުވަހުއެވެ. އޭގެ ފަހުން 11 މީހަކު ޖޫން 19ގައި ކޮވިޑް-19އަށް ޕޮޒިޓިވްވިއިރު، ޖޫން 21 ވަނަ ދުވަހުވެސް އެ އާއިލާގެ މެމްބަރަކު ކޮވިޑް-19އަށް ޕޮޒިޓިވްވި ކަމަށް ޝޭސްޓާ ކައުންޓިގެ ހެލްތް އެންޑް ހިއުމަން ސާވިސަސް އޭޖެންސީއިން ޚަބަރު ދެއެވެ. ސިއްހަތާ ބެހޭ އޮފިޝަލުންވަނީ، 20 މީހަކު އަމިއްލައަށް ކަރަންޓީނުވެގެން މަޑުކުރުމަށް ގޮވާލާފައެވެ.
އާއިލީ ޕާޓީއަށް ކޮވިޑް-19އަށް ޕޮޒިޓިވްވި ގިނަ މީހުންގެ ހަށިގަނޑުން ބަލީގެ އަލާމާތްތައްވެސް ފެންނަމުންދާކަމަށް ސިއްހަތާ ބެހޭ އޭޖެންސީއިން ޚަބަރު ދެއެވެ. މި އާއިލާއިން ޕޮޒިޓިވްވި މީހުންގެ ތެރޭގައި ފުރާވަރު އުމުރުގެ ކުއްޖެއްގެ އިތުރުން، 60 އަހަރުން މަތީގެ އަންހެނަކުވެސް ހިމެނެއެވެ.
ކެލިފޯނިއާގައި މިހާރު ބަލި ފެތުރެމުންދާ ގޮތަށް ބަލާއިރު، އެއް އާއިލާއަކާ، ރަހުމަތްތެރިންގެ ސާކަލްތަކުގެ ތެރޭގައި ބަލި ފެތުރޭ މިންވަރު ދަނީ އިތުރުވަމުންނެވެ. ކަންމިހެން އޮތްއިރު، ސިއްހީ އޮފިޝަލުން ވަނީ އެއްވުންތައް ބޭއްވި ކަމުގައި ވީ ނަމަވެސް، ވީހާވެސް މަދު އަދަދެއްގެ މީހުން ބައިވެރި ކުރުމަށް ގޮވާލާފައެވެ.
އެމެރިކާގެ އަދުގެ ހާލަތަށް ބަލާއިރު އެގައުމުން ކޮވިޑް-19އަށް ޕޮޒިޓިވްވި މީހުންގެ އަދަދު މިހާރު ވަނީ 2.5 މިލިއަނަށްވުރެ މައްޗަށް އަރާފައެވެ. އަދި މި ބަލީގައި 127640 މީހެއްގެ ފުރާނަ ގެއްލިފައެވެ.
