އަވަށްޓެރި އިންޑިއާއިން، ގާތްގަނޑަކަށް ބައި މިލިއަނެއްހާ މީހުން ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވް ވެފައިވާކަމަށް ރެކޯޑްތަކުން ދައްކައިފިއެވެ.
އިންޑިއާއިން މިހާތަނަށް 491992 މީހަކު ކޮވިޑް-19އަށް ޕޮޒިޓިވްވެފައިވާއިރު، ފާއިތުވީ 24 ގަޑިއިރެއްހާއިރު ތެރޭގައި އެކަނިވެސް 17296 ކޭހެއް ވަނީ ފެނިފައެވެ. މިއީ އެއް ދުވަހާ މިހާ ގިނަ އަދަދެއްގެ ކޭސް ރިޕޯޓްކުރި ދުވަސްވެސްމެއެވެ.
އިންޑިއާގެ ސިއްހަތާ ބެހޭ ވުޒާރާއިން ވަނީ، ފާއިތުވީ 24 ގަޑިއިރެއްހާއިރުގެ ތެރޭގައި، ކޮވިޑް-19 ޖެހިގެން އެގައުމުން 407 މީހެއްގެ ފުރާނަ ގެއްލިފައިވާކަމަށް ރިޕޯޓް ކޮށްފައެވެ. އިންޑިއާއިން މި ބަލީގައި މަރުވި މީހުންގެ އަދަދު 15319 އަށް އަރާފައިވާއިރު، އާބާދީގެ ކޮންމެ 1 މިލިއަން މީހަކުން 11 މީހެއްގެ ފުރާނަ ގެއްލިފައިވާކަމަށް ތަފާސް ހިސާބުތަކުން ދައްކައެވެ.
އިންޑިއާގައި މިވަގުތު އެކްޓިވް ކޭހުގެ ގޮތުގައި ރެކޯޑް ކޮށްފައިވަނީ 190654 ކޭހެކެވެ. މީގެ ތެރޭގައި ކުރިޓިކަލް/ސީރިއަސް ހާލުގައި އޮތް 8944 ޕޭޝަންޓަކު ހިމެނޭ ކަމަށް މައުލޫމާތު ލިބެއެވެ. 1.3 ބިލިއަން މީހުންގެ އާބާދީއެއް އޮތް އިންޑިއާގައި މިހާތަނަށް ކޮވިޑް-19އަށް ޓެސްޓު ކޮށްފައިވަނީ ގާތްގަނޑަކަށް 7.7 މިލިއަން ސާމްޕަލް ކަމަށްވާއިރު، މިއީ ކޮންމެ 1 މިލިއަން މީހަކަށް 5636 ޓެސްޓެވެ.
އިންޑިއާގައި ކޮވިޑް-19 ފެތުރުން ކޮންޓްރޯލް ކުރުމަށް ތަންފީޒު ކުރަމުންދާ ފިޔަވަޅުތަކަށް ލުއި ދެމުންދާ ދިއުމުގެ ތެރެއިން މިމަހުގެ 30 ވަނަ ދުވަހު ރޭލުގެ ފުރިހަމަ ހިދުމަތްތައް ފަށަން އޮތީ ހަމަޖެހިފައެވެ. ނަމަވެސް ހަލުވި މިނެއްގައި ކޭސް އިތުރުވަމުންދާ ދިއުމާ ގުޅިގެން އޯގަސްޓް މަހުގެ 12 ވަނަ ދުވަހުގެ ނިޔަލަށް މިކަން ވަނީ ފަސްކޮށްފައެވެ.
