އެމެރިކާއިން މިހާތަނަށް 20 މިލިއަނެއްހާ މީހުންނަށް ކޮރޯނާވައިރަސް ޑިޒީޒް (ކޮވިޑް-19) ޖެހިފައިވާނެ ކަމަށް ސިއްހީ އޮފިޝަލުން ލަފާ ކުރައްވައިފިއެވެ.
އެމެރިކާގެ ސެންޓާޒް ފޮ ޑިޒީޒް ކޮންޓްރޯލް (ސީޑީސީ) އިން ބުނީ، ކޮވިޑް-19އަށް އިންފެކްޓް ވެފައިވާ މީހުންގެ ހަގީގީ އަދަދު، މިހާރު ރިޕޯޓްތަކުން ފެންނަން އޮތް އަދަދަށް ވުރެ 10 ގުނަ އިތުރުވެފައި އޮތުމަކީ އެކަށީގެންވާ ކަމެއް ކަމަށެވެ.
އެންމެ ފަހުން ލިބިފައިވާ ތަފާސް ހިސާބުތަކަށް ބަލާއިރު އެމެރިކާއިން 2.5 ލިއަނަށްވުރެ ގިނަ މީހުން ކޮވިޑް-19އަށް ޕޮޒިޓިވްވެފައިވާއިރު، 126780 މީހެއްގެ ފުރާނަ ވަނީ ގެއްލިފައެވެ.
ޔުނިވާސިޓީ އޮފް ވޮޝިންގްޓަން އިން ލަފާ ކުރާ ގޮތުގައި މިއަހަރުގެ އޮކްޓޯބަރު މަސް އަންނައިރު ކޮވިޑް-19 ޖެހިގެން އެމެރިކާއިން 180000 މީހުން މަރުވާނެއެވެ. އަދި އާބާދީގެ 95 ޕަސެންޓް މީހުން މާސްކު ބޭނުން ކުރަންވާ ގޮތަށް އެކަން ކޮށްފި ނަމަ، މިއަދަދު 146000 އަށް ދަށްވާނެ ކަމަށްވެސް އެ ޔުނިވަސިޓީއިން ވަނީ ލަފާކޮށްފައެވެ.
ކަންމިހެން އޮތްއިރު، ސީޑީސީގެ ޑައިރެކްޓާ، ޑރ ރޮބާޓް ރެޑްފީލްޑް ވިދާޅުވީ މިހާރު ރިޕޯޓް ކުރަމުންދާ ކޮންމެ 1 ކޭހަކަށް، އިތުރު 10 ކޭސް (ރިޕޯޓް ނުކޮށް) އޮތުމުގެ ފުރުސަތު އޮތް ކަމަށެވެ. އެހެނީ، ޓެސްޓު ކުރަމުންދަނީ ބޭރު ފުށުން ބަލީގެ އަލާމާތްތައް ފެންނަ މީހުންނަށް ވާތީ ކަމަށެވެ.
ޑރ ރެޑްފީލްޑް ވިދާޅުވީ އެމެރިކާގެ އާބާދީގެ 5 ޕަސެންޓްއާއި 8 ޕަސެންޓްއާއި ދެމެދު އަދަދެއްގެ ބަޔަކު މިހާރުވެސް ވައިރަހަށް ހުށަހަޅިފައިވާކަމަށެވެ. މިއާއެކު ޖިސްމާނީ ގައިދުރުކަމާ، މާސްކު އެޅުމާ، ރަނގަޅަށް އަތް ދޮވުން ފަދަ ކަންކަން ތަންފީޒު ކުރުމަށް އޭނާ ވަނީ އެމެރިކާއަށް ގޮވާލައްވާފައެވެ.
ދުނިޔޭގެ ނިސްބަތުން ބަލާއިރު ކޮވިޑް-19ގެ ކޭސްތައް އެންމެ ގިނަ އަދަދަކަށް ރިޕޯޓް ކުރަމުންދަނީ އެމެރިކާއިންނެވެ. މިއާއެކު ވިލާތުގެ އިއްތިހާދުން ދަނީ، އެ ސަރަހައްދުގެ ބޯޑަރުތައް ބައިނަލްއަގުވާމީ މުޖުތަމައަށް ހުޅުވާލާއިރު، އެމެރިކާއިން އަންނަ ފަރާތްތަކަށް މިވަގުތު ފުރުސަތު ނުދިނުމަށް ވިސްނަމުންނެވެ.
