ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގެ އެންމެ ހިތި ދުވަސްތަކެއް ތަޖުރިބާކުރި ވިލާތު ބައްރު އަލުން ހުޅުވާލަން ފެށުމާއެކު އެ ސަރަހައްދުން ކަންބޮޑުވާ ދަރަޖައަކަށް ކޮވިޑް-19ގެ ކޭސްތައް ފެންނަމުން އަންނަ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އިންޒާރުކޮށްފިއެވެ.
ޑަބްލިއުއެޗްއޯގެ ރީޖަނަލް ޑައިރެކްޓާ ޑރ ހާންސް ހެންރީ ކްލޫގޭ ވިދާޅުވީ، ވިލާތުގެ 11 މަންޒިލެއްގައި ކޮވިޑް-19ގެ ޓްރާންސްމިޝަން އިންތިހާއަށް ހިނގަމުންދާކަމަށާ، މިކަމުގެ ސަބަބުން ބޮޑު އަދަދަކުން ކޭސްތައް އިތުރުވަމުން އަންނަ ކަމަށެވެ.
ޑރ ކްލޫގޭ ވިދާޅުވީ، ކޮވިޑް-19އަކީ މަޑުޖެހިލުމަށްފަހު އަނެއްކާވެސް ފެތުރިގެން ހިނގައިދާނެ ބަލިމަޑުކަމެއްކަމަށް އޭނާ ކުރިން ވިދާޅުވި ވިދާޅުވުން މިހާރު ހަގީގަތަކަށް ވެފައިވާކަމަށެވެ. މިކަމަށް ސަމާލުވެ، ފިޔަވަޅުތަކެއް ނާޅައިފިނަމަ ސިއްހީ ނިޒާމު އަނެއްކާވެސް އިނދަޖެހުމުގެ އަނދަވަޅަކަށް މިސްރާބު ޖަހާފާނެ ކަމުގެ އިންޒާރުވެސް ޑރ ކްލޫގޭ ވަނީ ދެއްވާފައެވެ.
54 ގައުމެއް ހިމެނޭ ވިލާތު ބައްރުން 2.6 މިލިއަން މީހުންނަށް ކޮވިޑް-19 ޖެހިފައިވާއިރު، އެ ސަރަހައްދުން 195000 މީހެއްގެ ފުރާނަ ގެއްލުނު ކަމަށް ވަނީ ރިޕޯޓްކޮށްފައެވެ. އަދުގެ ހާލަތަށް ބަލާއިރު، މިސަރަހައްދުން ދަނީ ދުވާލެއްގެ މައްޗަށް 20000 އާ ކޭހާ، 700 މަރުގެ ކޭސްތައް ރިޕޯޓް ކުރަމުންނެވެ.
ކަންމިހެން އޮތްއިރު މިދަނޑިވަޅަކީ އިގުތިސޯދީ ނެގެހެއްޓުމަށްކަމަށް ބުނެ ގައުމުތަކުން ބޯޑަރުތައް ހުޅުވާ، ބައިނަލްއަގުވާމީ ދަތުރުތައް ފެށުމުގެ މަރުހަލާތައް ފަށާފައިވާ ދަނޑިވަޅެއްކަން ފާހަގަކުރަންޖެހެއެވެ. ކޮވިޑް-19ގެ ބަލިމަޑުކަން ފެތުރިގެން ދިއުން ކޮންޓްރޯލް ކުރުމަށް ބޮޑެތި މާކެޓްތަކަށް އެތެރެވުމުގައި ހަރުކަށި ފިޔަވަޅުތަކެއް ތަންފީޒު ކުރާއިރު، ބައެއް ގައުމުތަކުގައި މިފަދަ ފިޔަވަޅުތަކަށް އިންތިހާއަށް ލުއީ ދީފައިވާކަންވެސް ފާހަގަކުރަންޖެހެއެވެ. ނަމަވެސް، ފިޔަވަޅުތަކަށް ލުއި ދޭންވީ މަރުހަލާތަކަށް ބަހާލައިގެން، ލަސް ދުވެއްޔެއްގައި ކަމަށް ކަމާބެހޭ ތަޖުރިބާކާރުން ދަނީ ތަކުރާރުކޮށް ބުނަމުންނެވެ.
ކޮވިޑް-19 އިން ދިފާއުވުމަށް ވެކްސިނެއް ހޯދިފައި ނުވާއިރު، މި ބައްޔަށް ވަކި ފަރުވާއެއްވެސް އޮތް ކަމަކަށް އަދި ސާބިތުކޮށްދެވިފައެއް ނެތެވެ. މި ބަލި ޖެހޭ މީހުންނަށް ފަރުވާ ދެމުންދަނީ، އެމީހުންގެ ހަށިގަނޑުން ފެންނަ އަލާމާތްތަކަށް ބަލައިގެންނެވެ. ނަމަވެސް، އެންމެނަކީ ހަށިގަނޑުގެ ބޭރު ފުށުން ބަލީގެ އެއްވެސް އަލާމާތެއް ނުފެނި، އިތުރު މީހުންނަށް ބަލި ފަތުރާ އެސިމްޓޮމެޓިކް މީހުންނަށް ވުމުން، ގިނަ ބަޔަކު މި ބައްޔަށް އިންފެކްޓްވުމުގެ ނުރައްކާވެސް އިންތިހާއަށް އެބައޮތެވެ.
