އިސްރާއީލުން މިހާރުވެސް ވެރިވެގެންފައިވާ ފަލަސްތީނުގެ ހުޅަނގު އައްސޭރީގެ ބިންތަކުގެ ފުރިހަމަ މިލްކުވެރިކަން ހޯދުމަށް އިސްރާއީލުން ރާވަމުންދޭ ރޭވުންތަކައިގެން ކުރިއަށް ނުދިއުމަށް އދގެ ސެކްރެޓަރީ ޖެނެރަލް، އެންޓޯނިއޯ ގުޓެރޭޒް ގޮވާލައްވައިފިއެވެ.
މި ޕްލޭންތައް ދޫކޮށްލުމަށް އިސްރާއީލަށް ގޮވާލައްވަމުން ގުޓެރޭޒް ވިދާޅުވީ، ފަލަސްތީނުގެ ބިންތައް އިސްރާއީލުން ފޭރިގަތުން ވެގެންދާނީ ބައިނަލްއަގުވާމީ ގާނޫނާ ހިލާފަށް ހިންގޭ އެންމެ ސީރިއަސް ޖަރީމާއަށް ކަމަށެވެ.
އިސްރާއީލުގެ ގުޅިފައިވާ ސަރުކާރުގެ ޚުދުމުޚުތާރު ބޮޑުވަޒީރު، ބެންޖަމީން ނަތަންޔާހޫ ވަނީ ބިންތައް މިލްކުކުރުމުގެ މަސައްކަތް، ޖުލައި މަހުގެ 1 ވަނަ ދުވަހުވެސް ފެށިދާނެ ކަމުގެ އިންޒާރު ދީފައެވެ. މި ބިންތައް އިސްރާއީލު ސަރުކާރުގެ ކޮންޓްރޯލްގެ ދަށަށް ގެންދިއުމަށް އިސްރާއީލުގެ ގުޅިފައިވާ ސަރުކާރުން ވަނީ ވައުދުވެފައެވެ.
ނަމަވެސް މި ޕްލޭނައިގެން އިސްރާއީލުން ކުރިއަށް ދިއުން ވާނީ ފަލަސްތީނަށް ގެއްލުންދެނިވި ނިންމުމަކަށް ކަމަށާ، މިއީ ވަކިވެފައިވާ މިނިވަން 2 ދައުލަތުގެ ގޮތުގައި އިސްރާއީލާ ފަލަސްތީނު އުފެދިގެން އައުމަށް ކުރެވޭ އުއްމީދު ވިއްސިވިހާލި ކޮށްލަނިވި ކަމަކަށް ކަމަށެވެ. އިސްރާއީލާ ފަލަސްތީނުގެ އިތުރުން މިއީ މުޅި ސަރަހައްދަށްވެސް އޮތް ނުރައްކަލެއް ކަމަށް ގުޓެރޭޒް ވަނީ ސިފަކުރައްވާފައެވެ.
ގުޓެރޭޒް މިފަދަ ރޫހެއްގައި ވާހަކަދައްކަވާފައި މިވަނީ، އިސްރާއީލުގެ ރޭވުންތަކާ ދެކޮޅަށް ފަލަސްތީނުގެ ރައްޔިތުން ކުރިއަށްގެންދިޔަ ވަރުގަދަ ރެލީއަކަށް ފަހުގައެވެ. މި ރެލީގައި، ބޭރު ގައުމުތަކާ އިދާރާތަކުގެ އިސް ޑިޕްލޮމެޓުންތަކެއްވެސް ވަނީ ބައިވެރިވެވަޑައިގެންފައެވެ.
ކަންމިހެން އޮތްއިރު، ފަލަސްތީނުގެ ލީޑާޝިޕުންވަނީ ފަލަސްތީނުގެ މިނިވަން ދައުލަތް އުފެއްދުމާ ބެހޭ ޕްރޮޕޯސަލެއް ހުށަހަޅާފައެވެ. މި ޕްރޮޕޯސަލުގައި ފަލަސްތީނަށް މިނިވަންކަމާ އިސްތިގުލާލު ލިއްބައިދޭއިރު، ހަތިޔާރުވެސް ނެތި، ސުލްހަ ގާއިމު ކުރުމަށް ބާރުދެއެވެ. އަދި ފަލަސްތީނުގެ ވެރިރަށަކީ އިރުމަތީ ގުދުސްކަމުގައިވެސް ބަޔާންކޮށްފައެވެ. މީގެ އިތުރުން ސަރަހައްދީ އިމުގެ މިލްކިއްޔާތަށް ބަދަލުތަކެއް ގެނައުމަށް މި ޕްރޮޕޯސަލް ފުރުސަތު ތަނަވަސްކޮށްދެއެވެ. ނަމަވެސް އެއީ އިސްރާއީލާ ފަލަސްތީނަށް ހަމަހަމަ އުސޫލަކުން ބިން، ބައިކުރަނިވި އުސޫލަކުން ކަމަށްވެސް މި ޕްރޮޕޯސަލްގައި ބުނެފައިވެއެވެ.
މި ޕްރޮޕޯސަލަކީ، މެދުއިރުމަތީގައި ސުލްހަ ގާއިމުކުރުމުގެ ނަމުގައި އެމެރިކާގެ ރައީސް ޑޮނާލްޑް ޓްރަމްޕް އިސްކޮށް ހުންނަވައިގެން އެކުލަވާލާފައިވާ މެދުއިރުމަތީގެ ސުލްހައިގެ ޕްލޭނަށް، ގޮންޖަހާ، ފަލަސްތީނުން ތައްޔާރުކުރި ޕްރޮޕޯސަލެކެވެ. ފަލަސްތީނާ ބައިނަލްއަގުވާމީ މުޖުތަމައުން ދަނީ ޓްރަމްޕްގެ ޕްލޭނަށް އިންކާރު ކުރަމުންނެވެ.
