އެންސިސް މަސް ފެކްޓްރީގެ މުވައްޒަފަކު ކޮވިޑް-19 އަށް ޕޮޒިޓިވްވެއްޖެއެވެ.
އެ ކުންފުނީގެ ފަރާތުން އޮފިޝަލަކު 'ދަ ޕްރެސް' އަށް ވަނީ ކަށަވަރު ކޮށްދެއްވާފައެވެ. އޭނާ ވިދާޅުވީ، ޕޮޒިޓިވްވެފައި ވަނީ މަސް ފެކްޓްރީގައި ވަގުތީ ގޮތުން ގެންގުޅޭ އަންހެން މުވައްޒަފެއް ކަމަށެވެ. އަދި އޭނާ ޕޮޒިޓިވް ވިކަން އެނގިފައި ވަނީ މިއަދު ކަމަށް ވެސް އޭނާ ވިދާޅުވިއެވެ.
އޮފިޝަލް ވިދާޅުވީ، މުވައްޒަފަކު ޕޮޒިޓިވްވުމާ ގުޅިގެން ކޮންޓެކްޓް ޓްރޭސިންގެ މަސައްކަތް ކުރަމުންދާ ކަމަށެވެ. އަދި މަސް ފެކްޓްރީގެ ވަކި ސަރަހައްދެއް ބަންދުކޮށް، ޑިސްއިންފެކްޓް ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
އޭނާ ވިދާޅުވީ ފެކްޓްރީ އެއްކޮށް ބަންދު ނުކުރާ ކަމަށާއި، ފެކްޓްރީގައި މަސައްކަތް ކުރަމުންދާ ކަމަށެވެ. ކޮވިޑާ ގުޅިގެން ނޫނަސް ބައިނަލްއަގްވާމީ މިންގަނޑުތަކާ އެއްގޮތަށް ކޮންމެ ދުވަހެއްގެ މަސައްކަތް ނިންމުމަށް ފަހު އެ ފެކްޓްރީ އަބަދުވެސް ސާފު ކުރާކަމަށް އޭނާ ވިދާޅުވިއެވެ.
އޮފިޝަލް ވިދާޅުވީ އަދި މިހާތަނަށް އެއްވެސް މުވައްޒަފަކު އައިސޮލޭޓް ކޮށްފައި ނުވާ ކަމަށެވެ.
މިހާތަނަށް އައިއިރު، ރާއްޖެއިން ކޮވިޑަށް ޕޮޒިޓިވް ވީ 2150 މީހެކެވެ. އަދި 1769 މީހުން ބަލިން ރަނގަޅުވެ، 8 މީހަކު މަރުވެފައި ވާއިރު، މިހާރު މި ބަލީގައި ފަރުވާ ކުރަމުން ދަނީ 371 މީހުންނަށެވެ.
