އެމްޓީސީސީގެ މައްޗަށް ކުރަމުން އަންނަ ކޮރަޕްޝަންގެ ތުހުމަތު ބަލައި ދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފިއެވެ.
އެ މައްސަލަ އޭސީސީ އަށް ހުށަހަޅާފައި ވަނީ އެމްޓީސީސީ އިސްވެއެވެ. އެކުންފުނިން ބުނީ އެކުންފުނިން ހަވާލު ކޮށްފައިވާ އެއްވެސް މަސައްކަތެއްގައި ކޮރަޕްޝަންގެ އެއްވެސް އަމަލެއް މިހާތަނަށް ހިންގާފައި ނުވާނެ ކަމަށެވެ.
އަދި އެކުންފުންޏާއި އެކުންފުނީގެ މުވައްޒަފުންނަށް ކުރަމުން އަންނަ އިތުބާރު ގެއްލުވާލުމަށް އެފަދަ ދޮގު ހަބަރުތައް ނުފެތުރުމަށް އެކުންފުނިން ވަނީ އިލްތިމާސް ކޮށްފައެވެ. އެކުންފުނިން ބުނީ އެކަމާ ގުޅިގެން މީޑިއާއަކުން ކަމުގެ ހަގީގަތް އޮޅޭ ގޮތަށް ހަބަރު ފަތުރާފައިވާ ކަމަށެވެ.
އެމްޓީސީސީގެ މައްޗަށް ކުރާ ތުހުމަތަކީ ސެންޓާރާ ހޮޓެލްސް އެންޑް ރިޒޯޓްސް އިން އެމްޓީސީސީ އާ ހަވާލުކޮށްގެން ހިއްކާ ރިސޯޓް ޕްރޮޖެކްޓަށް ބޭނުންވާ 300،000 ޓަނުގެ ބޮޑު ހިލަ ގެނައުމަށް އަމިއްލަ ކުންފުންޏަކާ ހަވާލުކުރުމުގެ މައްސަލައެކެވެ.
އެ މީޑިއާ އިން ރިޕޯޓު ކޮށްފައިވާ ގޮތުގައި ސެންޓާރާ އިން އެމްޓީސީސީ އަށް ހަވާލު ކުރި ބިން ހިއްކުމުގެ މަޝްރޫއުގެ ޖުމްލަ އަގަކީ 23.9 މިލިޔަން ޑޮލަރު (368.5 މިލިއަން ރުފިޔާ) އެވެ. ނަމަވެސް އެ ޕްރޮޖެކްޓަށް ބޭނުންވާ ބޮޑު ހިލަ ގެނައުމަށް އެމްޓީސީސީން އަމިއްލަ ކުންފުންޏެއް ކަމަށްވާ އެމްއެމް އެކްސްޕޯޓަށް ހަވާލު ކުރީ 11.1 މިލިޔަން ޑޮލަރު (171.2 މިލިޔަން ރުފިޔާ) އަށެވެ.
ނަމަވެސް އެމްޓީސީސީން ވަނީ އެ މަސައްކަތް ހަވާލު ކުރުމުގައި ކޮރަޕްޝަންގެ އެއްވެސް އަމަލެއް ހިންގާފައި ނުވާނެ ކަމަށް ބުނެފައެވެ.
އެމްޓީސީސީގެ މައްޗަށް ތުހުމަތު ކުރާ ކޮރަޕްޝަންގެ މައްސަލަ އެކުންފުނިން ދޮގުކުރާއިރު ޗީފް ފައިނޭންސް އޮފިސަރު މުހަންމަދު ހިލްމީ އާއި ޖެނެރަލް މެނޭޖަރު، ޓްރޭޑް އިސްމާއިލް އަދުހަމް ވަނީ ކުއްލި ގޮތަކަށް މަގާމުން ވަކިކޮށްފައެވެ. އެ ދެ މީހުންވެސް މަގާމުން ވަކިކުރީ ކުންފުނީގެ އުސޫލުތަކުގެ ބޭރުން އަމަލު ކޮށްފައިވާ މައްސަލައަކާ ގުޅިގެންނެވެ. ނަމަވެސް އެ މައްސަލައަކީ މިހާރު ފެންމަތިވެފައިވާ މައްސަލަ ކަމެއް ނޭނގެއެވެ.
