މައްކާ ފިޔަވާ ސައުދީ އަރަބިއްޔާގެ އެހެން ހުރިހާ ސަރަހައްދެއް، އަންނަ އާދީއްތަ ދުވަހުން ފަށައިގެން އާންމު ހާލަތަށް ގެންދަން ހަމަޖައްސައިފިއެވެ.
އެގޮތުން، ކޮރޯނާވައިރަސް ޑިޒީޒް (ކޮވިޑް-19) ފެތުރުން ކޮންޓްރޯލް ކުރުމަށް ސައުދީގައި ކާފިއު ތަންފީޒު ކުރަން ފެށުމުގެ ކުރިން އަމަލު ކުރަމުން އައި އުސޫލުން އާންމު ހާލަތަށް ބަދަލުވާން ފަށާނެ ކަމަށް މައުލޫމާތު ލިބެއެވެ.
ސައުދީ އަރަބިއްޔާގެ ދާހިލީ ވުޒާރާއިން އާންމުކޮށްފައިވާ ބަޔާނެއް ބުނާ ގޮތުގައި، ސައުދީ އަރަބިއްޔާގައި ތަންފީޒު ކުރަމުންދާ ކޮވިޑް-19ގެ ހަރުކަށި ފިޔަވަޅުތަކަށް، ރަސްގެފާނު ސަލްމާން ބިން ޢަބްދުލްޢަޒީޒުގެ އިޒުނަފުޅާއެކު ލުއިދީ، އިގުތިސޯދީ އަދި ވިޔަފާރީގެ ހަރަކާތްތައް އަލުން ފަށާ، އާންމު ހާލާތަށް ރުޖޫއަށްވަމުން ދާނެއެވެ.
އާންމު ހާލަތަށް ސައުދީ ގެންދިއުމުގެ މަސައްކަތް ކުރިއަށް ގެންދަނީ މައިގަނޑު 2 ކަމަކަށް ބަލައިގެންނެވެ. އެއީ ސާޖެއް އަންނަ ހިނދެއްގައި ފަރުވާ ދެވޭނެ ކެޕޭސިޓީއާ، ދުރާލާ ބަލިމަޑުކަން ދެނެގަތުމަށް ޓެސްޓުކުރާ މިންވަރު އިތުރު ކުރުމުގެ މައްޗަށެވެ.
އާންމު ހާލަތުގެ ދަށުން ސައުދީ ހުޅުވާލާއިރު ސަލާމަތާ ރައްކާތެރި ކަމުގެ ގޮތުން އަޅަންޖެހޭ ފިޔަވަޅުތައްވެސް ތަންފީޒު ކުރެވިގެންދާނެއެވެ.
މައްކާގެ ހާލަތަށް ބަލާއިރު އާދީއްތަ ދުވަހު ތަންފީޒު ކުރަން ފަށާނީ، ކޮވިޑް-19ގެ ފިޔަވަޅުތަކަށް ލުއި ދިނުމުގެ ދެވަނަ މަރުހަލާގެ ފިޔަވަޅުތަކެވެ. މަސްޖިދުލް ޙަރަމްގައި ހުކުރު ނަމާދާ ފަރުޟު ނަމާދުތައް ޖަމާއަތުގައި ކުރުން ކުރިއަށް ދާނެ ކަމަށާ، މި ހުއްދަ އޮންނާނީ މިސްކިތުގެ އިމާމުންނާ މުވައްޒަފުންނަށް ކަމަށް މައުލޫމާތު ލިބެއެވެ.
ޢުމްރާ ދަތުރުތައް އަދިވެސް އޮތީ މެދުކަނޑާލާފައެވެ. އަދި މަދީނާގައި ހުންނަ މަސްޖިދު އަލް-ނަބަވީއަށް ޒިޔާރަތްކުރުންވެސް އޮތީ މަޑުޖައްސާލާފައެވެ.
މީގެ އިތުރުން ސައުދީގެ ބައިނަލްއަގުވާމީ ދަތުރުތައްވެސް އަދި އޮތީ ވަކި އެއްޗެއް އަންގަންދެން މަޑުޖައްސާލާފައެވެ.
