ދުނިޔޭގެ އެކި ކަންކޮޅުތަކަށް ހަލުވި ކަމާއެކު ފެތުރިގެން ގޮސްފައިވާ ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވި މީހުންގެ ތެރެއިން ޝިފާ ލިބި، ބަލިން ރަނގަޅު ވީ މީހުންގެ އަދަދު 4 މިލިއަނަށް ވުރެ މައްޗަށް އަރައިފިއެވެ.
ލިބިފައިވާ އެންމެ ފަހުގެ ތަފާސް ހިސާބުތަކަށް ބަލާއިރު މި ހާތަނަށް ބަލިޖެހުނު 7.8 މިލިއަން މީހުންގެ ތެރެއިން 4035790 މީހަކަށް ވަނީ ޝިފާ ލިބިފައެވެ. މި ބައްޔަށް ކަނޑައެޅިގެން ވަކި ފަރުވާއެއް އަދި ދެނެގަނެވިފައި ނުވާއިރު، ބަލި ޖެހޭ މީހުންނަށް ފަރުވާ ދެނީ އެމީހުންގެ ހަށިގަނޑުން ފެންނަ އަލާމާތްތަކަށް ބަލައިގެންނެވެ.
މިވަގުތު އެކްޓިވް ކޭހުގެ ގޮތުގައި 3392758 ކޭހެއް ރެކޯޑް ކޮށްފައިވާއިރު މީގެ ތެރެއިން 3338676 މީހެއްގެ ހަށިގަނޑުން ބަލީގެ އަލާމާތްތައް ފެންނަމުންދަނީ ވަރަށް ކުޑަ ކޮށެވެ. ހާލު ސީރިއަސް ނުވަތަ ކުރިޓިކަލް ކަމަށް ރިޕޯޓްކޮށްފައިވަނީ އެކްޓިވް ކޭސްތަކުގެ ތެރެއިން 2 ޕަސެންޓް ނުވަތަ 54082 ކޭހެވެ.
ކޮވިޑް-19 ޖެހިގެން މަރުވި މީހުންގެ އަދަދު 432200 އަށް އަރާފައިވާ ކަމަށް ތަފާސް ހިސާބުތަކުން ދައްކައެވެ. މި ބަލީގައި އެންމެ ގިނަ ބަޔަކު މަރުވެ ގޮސްފައިވަނީ އެމެރިކާ، ބްރެޒިލް، އިނގިރޭސިވިލާތް، އިޓަލީވިލާތް އަދި ފަރަންސޭސިވިލާތުންނެވެ.
