ކޮވިޑް-19އިން ރައްކާތެރި ވުމަށް އިއުލާން ކޮށްފައިވާ ލޮކްޑައުން އަށް ލުއިދީ، އާ އާންމު ހާލަތު ނުވަތަ ނިއު ނޯމަލްގައި ޖަމާއަތުގައި ނަމާދު ކުރެވޭނެ ގޮތައް ހެދުމަށް މަޝްވަރާ ކުރަމުން ދާ ކަމަށް އިސްލާމިކް މިނިސްޓްރީން ބުނެފިއެވެ.
"ދަ ޕަރެސް" އަށް މައުލޫމާރު ދެއްވަމުން އިސްލާމިކް މިނިސްޓްރީގެ މީޑިއާ އޮފިޝަލް، އިސްމާއިލް އަފްރާހް ވިދާޅުވީ ނިއު ނޯމަލް އަށް ލުއި ދިނުމުގެ ގޮތުން ޖަމާއަތުގައި ނަމާދު ކުރެވޭނެ ގޮތް ހެދުމަށް މަޝްވަރާ ކުރަމުން ދާ ކަމަށެވެ.
އަދި އަންނަ ހޯމަ ދުވަހުން ފެށިގެން މާލެ ސަހަރައްދު ފިޔަވާ ހުރިހާ ރަށެއްގެ މިސްކިތްތައް ހަމާއަތުގައި ނަމާދު ކުރަން ހުޅުވާލާކަންވެސް "ދަ ޕްރެސް" އަށް ވަނީ އެނގިފައެވެ.
މާލެ ސަރަހައްދުގައި އިއުލާން ކޮށްފައިވާ ލޮކްޑައުންގެ މުއްދަތު މިއަދަށް ހަމަވެފައި ވާއިރު، މިހާރު ވަނީ އިތުރު ތިން ދުވަހަށް (މިމަހުގެ 15 ވަނަ ދުވަހަށް) އިތުރު ކޮށްފައެވެ. އާ އާންމު ހާލަތު ނުވަތަ ނިއު ނޯމަލް އަށް 15 ވަނަ ދުވަހުން ފެށިގެން ލުއިތަކެއް ދޭނެ ކަމަށްވެސް އެޗްޕީއޭން ބުނެއެވެ.
ރާއްޖޭގެ ހުރިހާ ރިސޯޓުތަކާއި މާލެ ސަރަހައްދުގެ ހުރިހާ މިސްކިތް ތަކެއްގައި ޖަމާއަތުގައި ނަމާދުކުރުން މެދުކަނޑާލީ މިދިޔަ މާޗު މަހުގެ 18 ވަނަ ދުވަހުގެ މެންދުރު ނަމާދުން ފެށިގެންނެވެ.
ނަމަވެސް ފަހުން މުޅި ރާއްޖޭގައި ޖަމާއަތުގައި ނަމާދު ކުރުން ހުއްޓާލުމަށް އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން އޭޕްރީލް 19 ވަނަ ދުވަހު ނިންމުމާއި ގުޅިގެން އިސްލާމިކް މިނިސްޓްރީން ފަހުން ވަނީ ވިޑް-19 ގެ އެއްވެސް އަސަރެއް ނެތް ރަށްރަށުގެ މިސްކިތްތައް ހުޅުވާލައި އެރަށްރަށުގައި ޖަމާއަތުގައި ނަމާދުކުރަން ހުޅުވާލާފައެވެ.
އިސްލާމިކް މިނިސްޓްރީން މިހާރު ނިންމާފައި ވަނީ މާލެ ސަރަހައްދު ފިޔަވާ އެހެން ހުރިހާ ރަށެއް އަންނަ ހޯމަ ދުވަހުން ފެށިގެން ހުޅުވާލާށެވެ. އަދި މާލެ ސަރަހައްދުގެ މިސްކިތްތަކުގައި ޖަމާއަތުގައި ނަމާދު ކުރަން ހުޅުވާލާނެ ވަކި ތާރީހެއް އަދި ނިންމާފައި ނުވި ނަމަވެސް މިސްކިތްތަކުގައި މިހާރުވެސް އަންނަނީ ބަންގި ގޮވަމުންނެވެ. އަދި ބަންގީގެ ފަހުގައި ހުރިހާ އެންމެން ވެސް ގޭގައި ނަމާދުކުރުމަށް ވެސް އަންނަނީ ގޮވަމުންނެވެ.
މި ދަނޑިވަޅުގައި ކަމާބެހޭ ފަރާތްތަކުންދޭ އިރުޝާދުތަކާ އެއްގޮތަށް އަމަލު ކުރުމަށާއި، މިސްކިތުގެ ޖަމާއަތުގައި ނަމާދު ނުކުރި ނަމަވެސް ފަރުޟު ފަސް ނަމާދު ބަރާބަރަށް އަދާކުރުމަށާއި ސުންނަތް ނަމާދު ގިނަކޮށް، ކީރިތި ގުރްއާން ކިޔަވައި، ﷲ ގެ ރަޙްމަތުން މާޔޫސްނުވެ، ސަބަބު ތަކުގައި ހިފާ، ފުރިހަމައަށް ﷲ އަށް ވަކީލުކޮށް ގިނަގިނައިން ދުއާކޮށް، އިސްތިޣްފާރު ކުރުމަށް ވެސް އިސްލާމިކް މިނިސްޓަރު ވަނީ ރައްޔިތުންގެ ކިބައިން އެދިވަޑައިގެންފައެވެ.
