މި ހިނގާ 2020 ވަނަ އަހަރު މުޅި ދުނިޔޭގެ ނިސްބަތުންވެސް އިންފެލޭޝަން ރޭޓް އެންމެ މަތީ މިންވަރަކަށް ރެކޯޑްކުރި ގައުމަކީ ޕާކުސްތާން ކަމަށް އެގައުމުގެ މަރުކަޒީ ބޭންކުން ހާމަކޮށްފިއެވެ.
ސްޓޭޓް ބޭންކް އޮފް ޕާކިސްތާން (އެސްބީޕީ) އިން ބުނީ މިއަހަރުގެ ޖަނަވަރީ މަހު އެކަނިވެސް ޕާކިސްތާނުގެ އިންފްލޭޝަން ރޭޓް ނުވަތަ ބާޒާރުގައި ތަކެތީގެ އަގު އުފުލިގެންދާ މިންވަރު 14.6 ޕަސެންޓަށް އަރާފައި ވާކަމަށާ، މިއީ ފާއިތުވީ 12 ވަރަކަށް އަހަރު ދުވަހުގެ ތެރޭގައި އެގައުމުން ރެކޯޑް ކުރި އެންމެ މަތީ އަދަދު ކަމަށެވެ. މިއާއެކު އިންޓްރެސްޓް ރޭޓް އުފުލުމަށް، ސިޔާސަތު އެކުލަވާލައި މަސްއޫލުވެރިންނަށް މަޖުބޫރު ވެފައި ވާ ކަމަށް ވެސް އެސްބީޕީއިން ބުނެއެވެ.
މިއަހަރުގެ އޭޕްރިލް މަހަށް ބަލާއިރު ޕާކިސްތާނުގެ އިންފްލޭޝަން ރޭޓް އުފުލިފައި ވަނީ ތަރައްގީ ވެފައި ވާ އިގުތިސޯދު ތަކާ އަޅާ ބަލާއިރު އެކަނި ނޫން ކަމަށާ، ކުރިއަރަމުން އަންނަ އިގުތިސޯދު ތަކާ އަޅާ ބަލާއިރުވެސް ޕާކިސްތާނުގެ އިންފްލޭޝަން ރޭޓް އުޅެނީ އެންމެ މަތީގައި ކަމަށް އެސްބީޕީގެ އިންފްލޭޝަން މޮނިޓާ އިން ދައްކާ ކަމަށް ޕާކިސްތާނުގެ މީޑިއާއިން ވަނީ ރިޕޯޓް ކޮށްފައެވެ. މެއި މަހު 8.2 ޕަސެންޓަށް މިއަދަދު ދަށަށް ގޮސްފައި ވާ ކަމަށް ވެސް މައުލޫމާތު ލިބެއެވެ.
އިންފްލޭޝަން ރޭޓް ދަށްކުރުމަށް ޕާކިސްތާނުގެ ކަމާބެހޭ ފަރާތްތަކުން ވަނީ ފިޔަވަޅު ތަކެއް އަޅާފައެވެ. އެގޮތުން ޕެޓްރޯލްގެ އަގުތައް، 2 މަސް ދުވަހުގެ ތެރޭގައި 3 ފަހަރަށް ދަށްކުރިކަން ފާހަގަ ކުރެވެއެވެ. ނަމަވެސް މި ދުވަސްވަރަކީ ކޮރޯނާވައިރަސް ޑިޒީޒް (ކޮވިޑް-19) ގެ ސަބަބުން އިގުތިސޯދުތައް އިނދަޖެހިފައި އޮތުމާ އެކު، މިމައްސަލަ ހައްލު ކުރުމަށް އިތުރު ގޮންޖެހުން ތަކަކާ ހުރަސްތަކެއް ވަނީ ކުރިމަތި ވެފައެވެ.
މިނޫހަށް ޕާކިސްތާނުގެ ރަނގަޅު ކުޑަކަމެއްވެސް ލިޔަން އެނގޭތަ؟ އިންޑިޔާގެ ދަށުގައި ވިޔަސް ބޮޑުވަރު