މާލެ ސަރަހައްދުން ކޮވިޑް19 ފެނިފައިވުމާއި ގުޅިގެން އިއުލާން ކޮށްފައިވާ ލޮކްޑައުން އަމުރާ ހިލާފުވެގެން އިއްޔެ އެކަނިވެސް ފުލުހުންގެ ބެލުމުގެ ދަށަށް 15 މީހަކު ގެނެސްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ އިއްޔެ 15 މީހަކު އަމުރާ ހިލާފުވެގެން ފުލުހުންގެ ބެލުމުގެ ދަށަށް ގެނެސްފައިވާއިރު މިހާތަނަށް 420 މީހަކު އަމުރާ ހިލާފުވެގެން ފުލުހުން ހައްޔަރުކޮށްފައިވާ ކަމަށެވެ. މިހާތަނަށް ލޮކްޑައުން އަމުރާ ހިލާފުވެގެން އެންމެ ގިނަ މީހުން ހައްޔަރުކުރީ މާލެއިންނެވެ. އެއީ 377 މީހުންނެވެ.
ފުލުހުން ބުނީ މިހާތަނަށް 247 މީހަކު ލޮކްޑައުން އަމުރާ ހިލާފުވެގެން ޖޫރިމަނާ ކޮށްފައިވާ ކަމަށެވެ. މިހާތަނަށް ލޮކްޑައުން އަމުރާ ހިލާފުވެގެން 7398 މީހަކު ޖޫރިމަނާކޮށްފައިވާއިރު އޭގެތެރެއިން 6555 މީހަކު ވަނީ ޖޫރިމަނާކޮށްފައި ވަނީ ވެރިރަށް މާލެއިންނެވެ.
މިހާތަނަށް ޖޫރިމަނާ ކުރި މީހުންގެ ތެރެއިން މޯލްޑިވްސް އިންލެންޑު ރެވެނިއު އޮތޯރިޓީއަށް ޖޫރިމަނާ ފައިސާ ދައްކަނީ މަދު ބައެއް ކަމަށް އެ އިދާރާއިން ވަނީ ހާމަކޮށްފައެވެ. ނޫސްވެރިންގެ ބައްދަލުވުމުގައި ފުލުހުން ވަނީ ހައްޔަރުކުރި ބައެއް މީހުން ދޫކޮށްލާފައިވާ ކަމަށާއި އެހެންނަމަވެސް އެމީހުންގެ މައްޗަށް ދައުވާ އުފުލުމަށް ޕްރޮސިކިއުޓަރު ޖެނެރަލް އޮފީހަށް ފޮނުވާފައިވާ ކަމަށް ބުނެފައެވެ.
