ކުދި ޖަޒީރާ ރަށްތައް އޭގެ ޒާތުގައި ސަލާމަތްތެރިކަމާއެކު އޮތުން ވަނީ ގުދުރަތީ ވެއްޓާއި އަދި ވަކިން ހާއްސަކޮށް ފަރުގެ ވެއްޓާއި ވަރަށް ބޮޑަށް ގުޅިލާމެހިފައި ކަމަށް އެންވަޔަރަމަންޓު މިނިސްޓްރީން ބުނެފިއެވެ.
ބައިނަލްއަގުވާމީ ތިމާވެއްޓާއި ބެހޭ ދުވަހާ ގުޅިގެން އެ މިނިސްޓްރީން ނެރެފަައިވާ ބަޔާނެއްގައި ބުނީ އިންސާނުންގެ ހުރިހާ ކަމެއް ވަނީ ގުދުރަތީ ވެއްޓާއި ގުޅި ލާމެހިފައި ކަމަށެވެ. ވަކިން ހާއްސަކޮށް ދިވެހިރާއްޖެ ފަދަ ކުދި ޖަޒީރާ ގައުމުތަކަކީ ގުދުރަތީ ވެއްޓަށާއި ވަސީލަތްތަކަށް ވަރަށް ބޮޑަށް ބަރޯސާ ވެގެންވާ ގައުމުތަކެއް ކަމަށް އެ މިނިސްޓްރީން ބުނެއެވެ.
"އަޅުގަނޑުމެންގެ ދިވެހިރާއްޖެއާ މެދު ވިސްނާލުމުން މިކަން ވަރަށް ރަގަޅަށް ދޭހަވެއެވެ. އަޅުގަނޑުމެންގެ އިގްތިސާދު ބިނާވެގެންވާ ދެ ސިނާއަތްކަމަށްވާ ފަތުރުވެރިކަމާއި މަސްވެރިކަމަކީ ދުޅަހެޔޮ ވެއްޓެއްގެ މައްޗަށް ބިނާވެފައިވާ ދެ ސިނާއަތެވެ. އަޅުގަނޑުމެންގެ ކުދި ޖަޒީރާ ރަށްތައް އޭގެ ޒާތުގައި ސަލާމަތްތެރިކަމާއެކު އޮތުން ވަނީ ގުދުރަތީ ވެއްޓާއި އަދި ވަކިން ހާއްސަކޮށް ފަރުގެ ވެއްޓާއި ވަރަށް ބޮޑަށް ގުޅިލާމެހިފައެވެ. އަޅުގަނޑުމެންގެ ހިތްހަމަޖެހުމާއި މުނިފޫހިފިލުވުމާއި ނަފްސާނީ ދުޅަހެޔޮކަންވެސް ވަނީ ގުދުރަތީ މާހައުލާއި ގުޅިފައެވެ." ބަޔާނުގައިވެއެވެ.
އެންވަޔަރަމަންޓު މިނިސްޓްރީގެ ބަޔާނުގައި ދިވެހިންގެ ގުދުރަތީ ވެއްޓާއި އެވެށީގެ މުއްސަދިކަމާއި މުހިންމު ކަމުގެ އަގު އެންމެ ފުރިހަމަ ގޮތުގައި ވަޒަން ނުކުރެވޭކަން ވަނީ ފާހަގަކޮށްފައެވެ. ވިސްނާލުމެއްނެތި ވެއްޓަށް ގެއްލުންވާފަދަ ކަންތަށްކޮށް އެކަށީގެންވާ މިންވަރަށް ވުރެއް ގިނައިން ގުދުރަތީ ވަސީލަތްތައް ބޭނުންކުރެވޭކަން ވަނީ ފާހަގަކޮށްފައެވެ.
އެގޮތުން މިއަހަރުގެ ތިމާވެށީގެ ދުވަހުގެ ޝިއާރު "ޓައިމް ފޯ ނޭޗާ" އިން ދޭހަކޮއްދޭން ބޭނުން ވަނީ މިވަގުތަކީ ގުދުރަތީ މާހައުލުގެ ވަގުތުކަން ކަމަށާއި ގުދުރަތީ މާހައުލާއި އެމާހައުލުގެ މުހިންމުކަމާއި ބޭނުންތެރިކަމާމެދު ވިސްނާ ގުދުރަތީ މާހައުލަށް އިސްކަމާއި އަހައްމިއްޔަތިކަން ދޭންވީ ވަގުތުކަން ކަމަށް އެންވަޔަރަމަންޓު މިނިސްޓްރީން ބުނެއެވެ.
"އަޅުގަނޑުމެން މިބަލިމަޑުކަމުން އަރައިގަނެ ދިރިއުޅުން އަލުން ބިނާކުރަން މަސައްކަތްކުރާއިރު މިޝިއާރުގެ ބޭނުން ހިފައި ގުދުރަތީ މާހައުލަށް އިސްކަން ދިނުން ވަރަށް މުހިންމެވެ. ކުރު މުއްދަތުގެ އިގްތިސާދީ ފައިދާ އާއި މަންފާއަށް ގުދުރަތީ ވެށި ގުރުބާންކޮށް ވެށި ހަލާކުވުމުން އެވެށި އަލުން އާރާސްތުކުރުމުގެ އުސޫލު ދޫކޮއްލާ، ގުދުރަތީ މާހައުލާއި ރައްޓެހި، މާހައުލުގެ ސަލާމަތްތެރި ކަމަށް ވިސްނައިގެން އިގްތިސާދީ މަޝްރޫއުތަށް ރޭވުން މުހިންމެވެ. އަޅުގަނޑުމެންނަކީ ފަރުގެ ދަރިންކަމުގައި ވާހިނދު އަޅުގަނޑުމެންގެ އަމަލުތަކާއި ދިރިއުޅުމުގެ ވައްޓަފާޅި، ފަރުތަކާއި އެފަރުތަކާއި ގުޅިފައިވާ ގުދުރަތީ ނިޒާމްތަކަށް ވީހާވެސް ގެއްލުން ކުޑަ ގޮތަކަށް ބިނާކުރަންވީ ވަގުތެވެ. އަދި ގުދުރަތީ މާހައުލަކީ އޭގެ ޒާތުގައި ވެސް އަގު ހުރި އެއްޗެއްކަމާއި މެދު ވިސްނައި ގުދުރަތީ މާހައުލަށް އިހްތިރާމާއެކު އަޅުގަނޑުމެންގެ ދިރިއުޅުން ބައްޓަން ކުރަން އަޒުމް ކަނޑައަޅަންވީ ވަގުތެވެ." ބަޔާނުގައިވެއެވެ.
އެންވަޔަރަމަންޓު މިނިސްޓްރީގެ ބަޔާނުގައި އިސްރާފުކުރުވަނި ގޮތުގައި ގުދުރަތީ ވަސީލަތްތައް ބޭނުންކުރުމާއި ދުރުވެ، ގުދުރަތީ ވަސީލަތްތައް ބޭނުންކުރާއިރު، އޭގެ ސަބަބުން މުޅި މާހައުލީ ނިޒާމަށް ކުރާނެ އަސަރާއި މެދު ވިސްނުން ވަރަށް މުހިންމު ކަމަށް ވަނީ ބުނެފައެވެ. އަދި ކޮވިޑް19 ގެ ބަލިމަޑުކަމުން އަރައިގަނެ ނިއު ނޯމަލްއަކަށް ދާއިރު، ދުވަހުން ދުވަހުގެ ދިރިއުޅުމުގައިވެސް ތިމާވެއްޓާއި ރައްޓެހިގޮތްތައް ހިޔާރުކުރުމަށް އަޒުމް ކަނޑައަޅައި ފަރުދީ ޒިންމާ އަދާކުރަން ޖެހޭ ކަމަށްވެސް ބުނެފައިވެއެވެ. އެގޮތުން ގޭބިސީގައި ކުނި އުފެދޭ މިންވަރު މަދުކުރުމާއި މޫދަށް ކުނި އުކުންފަދަ ނޭދެވޭ އާދަތަށް ދޫކޮއްލަންޖެހޭ ކަމަށް އެބަޔާނުގައިވެއެވެ. މީގެއިތުރުން ބޭނުންވާ ވަރަށް ވުރެއް އެއްޗެހި ނުގަތުމާއި އަލުން އެއްޗެހި ބޭނުންކުރުމާއި ތިމާވެށީގެ ދިފާއުގައި އަޑު އުފުލުން ފަދަ އާދަތަށް އަށަގަންނަންޖެހޭ ކަމަށް އެންވަޔަރަމަންޓު މިނިސްޓްރީން ބުންޏެވެ.
އެވެ.
