އެމެރިކާގެ ކަޅު ނަސްލަށް ނިސްބަތްވާ ޖޯޖް ފްލޮއިޑްގެ މަރާ ގުޅިގެން އެގައުމުގައި ހޫނުވެފައިވާ މުޒާހަރާތައް ވަރުގަދަ ކުރަމުން ގޮސް ވައިޓްހައުސް ސަރަހައްދުގައި ކުރި މުޒާހަރާތަކުގައި ކަރުނަ ގޭސް ބޭނުންކޮށްފައިވާކަމަށް ދެކެވޭ ވާހަކަތަކަށް، އެމެރިކާގެ ރައީސް ޑޮނާލްޑް ޓްރަމްޕް އިންކާރު ކުރައްވައިފިއެވެ.
ޓްރަމްޕްގެ މި ވާހަކަފުޅަށް، އޭނާގެ ބައެއް ސަޕޯޓަރުންވެސް ތާއީދުކޮށްފައި ވީ ނަމަވެސް، ބައިނަލްއަގުވާމީ ޚަބަރު ފެތުރުމުގައި އިސްކޮށް ހަރަކާތްތެރިވާ އެސޯސިއޭޓަޑް ޕްރެސްއިން ހަގީގަތް ކަށަވަރު ކުރުމަށް ކުރި މަސައްކަތުން، ކަރުނަ ގޭސް ބޭނުންކުރި ކަމުގެ ހެކި ލިބިފައިވާކަން ވަނީ ހާމަކޮށްފައެވެ.
ވަރުގަދަ މުޒާހަރާތައް ކޮންޓްރޯލް ކުރުމަށް ކެމިކަލް ހަތިޔާރު ނުވަތަ ކަރުނަ ގޭސް ބޭނުން ކުރުމަކީ ހަނގުރާމައެއްގެ ނުތަނަވަސްކަން އުފައްދާ ކަމަކަށްވާއިރު، މިފަދަ ހަތިޔާރު ބޭނުންކުރާ ކަމަށް ބުނުމަށް ތަންފީޒީ ބާރުތަކުން ފަސްޖެހެއެވެ. ނަމަވެސް ނަން ރީތިކޮށްލައިގެން އެހެން ނަމެއްގައިވެސް ހަމަ ކެމިކަލް ހަތިޔާރުގެ ބާރުގެ ބޭނުން ކުރަމުންދިއުމަކީ ހަގީގަތް ބަދަލުވާނެ ކަމެއް ނޫންކަންވެސް ފާހަގަކުރަންޖެހެއެވެ.
މުޒާހަރާތައް ކޮންޓްރޯލް ކުރުމަށްޓަކައި 'ކަރުނަ ގޭސް' (ކެމިކަލް ހަތިޔާރު) ބޭނުން ކުރުމަށް އެމެރިކާގެ ސެންޓާޒް ފޮ ޑިޒީޒް ކޮންޓްރޯލް (ސީޑީސީ) އާއި އެމެރިކާ އަސްކަރިއްޔާ މެޑިކަލް ރިސާޗް އިންސްޓިޓިއުޓް އޮފް ކެމިކަލް ޑިފެންސް އިން އޮންނަނީ ހުއްދަ ދީ، ލިސްޓުކޮށްފައެވެ. ކޮންމެ ނަމެއްގައި ބޭނުންކުރި ކަމުގައި ވީ ނަމަވެސް، ހަމަލާ އަމާޒުވާ މީހުންނަށް ކުރަނީ އެއް އަސަރެކެވެ.
ވައިޓްހައުސް ސަރަހައްދުގައި ކުރިއަށްދިޔަ މުޒާހަރާތައް ރޫޅާލުމަށް ކަރުނަ ގޭސް ބޭނުންކޮށްފައި ނުވާނެ ކަމަށާ، ނަމަވެސް ޕެޕާ ސްޕްރޭ ކޮމްޕައުންޑެއް ބޭނުންކޮށްފައިވާނެ ކަމަށް ޓްރަމްޕް ވަނީ ވިދާޅުވެފައެވެ. ކަންމިހެން އޮތްއިރު، ޕެޕާ ސްޕްރޭ ކޮމްޕައުންޑްއަކީވެސް ކަރުނަ ގޭހުގެ ބާވަތެއް ކަމަށް ސީޑީސީއާއި ސައެންސްގެ ހޯދުންތައް ހޯދާ ބައެއް ޖަމާއަތްތަކުން ވަނީ ގިންތިކޮށްފައެވެ.
ކަރުނަ ގޭސް ބޭނުންކޮށްފައި ނުވާނެ ކަމަށް ޓްރަމްޕް ވިދާޅުވި ނަމަވެސް އެ ވަގުތު އެ މަސްރަހުން ސިފަވަނީ އެނޫން ދެވަނަ މަންޒަރެއް ނޫންކަމަށް ބައިނަލްއަގުވާމީ މީޑިއާއިން ވަކާލާތު ކުރެއެވެ. އެގޮތުން ކެއްސުމާ، ނޭވާ ކުރުވުމުގެ މައްސަލަތައް ކުރިމަތިވިއިރު، ލޯ ރަތްވެ، ލޮލުން ގިނަ އަދަދަކަށް ފެން ފޭބުން ފަދަ ތަކުލީފުތަކުގައި މީހުން އުޅުނު މަންޒަރު ފެނިގެންދިޔަ ކަމަށް ބައިނަލްއަގުވާމީ މީޑިއާއިން ވަނީ ރިޕޯޓްކޮށްފައެވެ.
މުޒާހަރާތަކާ އެއްވުންތައް ރޫޅާލުމަށް ބޭނުންކުރާ މިފަދަ ހަތިޔާރުތަކާ ބެހޭ ގޮތުން ވާހަކަދައްކަވަމުން ޖޯޖް ޔުނިވާސިޓީ މިލްކެން އިންސްޓިޓިއުޓް ސްކޫލް އޮފް ޕަބްލިކް ހެލްތްގެ ޑރ ލީން ގޯލްޑްމަން ވިދާޅުވީ، ލޮލުން ކަރުނަ ހިލުވާލާ ކޮންމެ އެއްޗަކީ މި ހާލަތުގައި ކަރުނަ ގޭސް ކަމަށެވެ.
ސީޑީސީގެ ފެކްޓް ޝީޓް ބުނާ ގޮތުން ނަމަ މުޒާހަރާތަކާ ހަމަނުޖެހުންތައް ކޮންޓްރޯލް ކުރުމަށް މިފަދަ މާއްދާތައް ބޭނުންކުރަން ހުއްދަ ދީފައި އޮންނަނީ، އެ ބާރުގެ ބޭނުން ކުރުމުން މުޒާހަރާގެ ބައިވެރިންގެ ހަރަކާތްތައް ކޮންމެވެސް ވަރަކަށް މަޑުޖައްސާލާ ގޮތަށެވެ. އެހެނީ ލޮލާ ކަރުތެރެއަށް އުނދަގޫވުމާ، ފުއްޕާމެއާ ގައިގެ ހަންގަނޑަށް އުނދަގޫތަކެއް ކުރިމަތިކޮށްގެން މުޒާހަރާ 'މައިތިރި' ކުރުމެވެ.
މިފަދަ ގޮތަކަށް ކަރުނަ ގޭހުގެ ބާރުގެ ބޭނުން ކުރާއިރު ގްރެނޭޑް ފަދަ ގޮވާތަކެތި ތައްޔާރުކުރާއިރު އެކުލެވޭ މާއްދާއެއްގެ ބޭނުންވެސް ބައެއް ފަހަރު ކުރާ ކަމަށާ، ކަރުނަ ގޭހުގެ ބާރުގެ ބޭނުން ކުރާއިރު ދުންގަނޑެއް އަރައިގެންދާ މަންޒަރު ފެންނަނީ އެހެންވެއެވެ.
ކަރުނަ ގޭހާއި ބެހޭ ގޮތުން އެމެރިކާގައި ހަދާފައިވަނީ ނިސްބަތުން މަދު ދިރާސާއެކެވެ. ކަންމިހެން އޮތްއިރު، ފްލޮއިޑްގެ މަރާ ގުޅިގެން އެމެރިކާގައި ހިންގަމުންދާ މުޒާހަރާތަކާ ހަމަނުޖެހުންތައް ކޮންޓްރޯލް ކުރުމަށް ކަރުނަ ގޭހުގެ ބާރުގެ ބޭނުންކުރަމުންދާ ދަރަޖައަށް ބާރުދޭނެ އެއްވެސް ދިރާސާއެއް އަދި މިހާތަނަށް ނެތް ކަމަށް ޑިއުކް ޔުނިވަސިޓީ ސްކޫލް އޮފް މެޑިސިންގެ އިންޓަގްރޭޓަޑް ޓޮކްސިކޮލޮޖީ އެންޑް އެންވައިރަމެންޓަލް ހެލްތް ޕްރޮގްރާމްގެ ޑރ ސްވެން-އެރިކް ޖޯޓް ވަނީ ވިދާޅުވެފައެވެ.
