ރައްޔިތުންގެ މަޖިލިސް ތެރޭގައި ރޭ ހިނގާދިޔަ ކަންތައްތަކަކީ ހުތުރު އަދި ލަދުވެތި ކަންތައްތަކެއް ކަމަށް ކުރީގެ ޕްރޮސިކިއުޓަރު ޖެނެރަލް މުހުތާޒު މުހުސިން ވިދާޅުވެއްޖެއެވެ.
ރޭގެ ޖަލްސާގައި ނައިފަރު ދާއިރާގެ މެންބަރު އަހުމަދު ޝިޔާމްގެ ނަން އިއްވާ ތަޅުމުން ބޭރު ކުރަން އުމުގެ ތެރޭގައި މަޖިލިސް ތެރޭގައި ހިނގާދިޔަ ހަމަނުޖެހުންތަކާއި ގުޅިގެން މުހުތާޒު ކުރެއްވި ޓްވީޓެއްގައި ވިދާޅުވީ ރޭގައި މަޖިލީހުގައި ހިނގާފައި ވަނީ ދެރަވަރު ހާދިސާއެއް ކަމަށެވެ. އަދި ރޭ މަޖިލީހުގައި ހިނގާފައި ވަނީ ހުތުރު އަދި ލަދުވެތި އަމަލު ތަކެއް ކަމަށް މުހުތާޒު ވިދާޅުވިއެވެ.
މުހުތާޒު ވިދާޅުވީ ރޭ މަޖިލިސް ތެރޭގައި ހިނގާދިޔަ ކަންތައްތަކަކީ މަޖިލީހުގެ ގަވައިދުން ބޭރުން ހިންގާފައިވާ އަމަލުތަކެއް ކަމަށެވެ. މަޖިލީހުގެ ތަޅުމުގައި މާރާމާރީ ހިންގުމަކީ މެމްބަރުންނަށް ލިބިދީފައިވާ އިމްތިޔާޒުގެ ތެރޭގައި ހިމެނޭ ކަމެއް ނޫން ކަމަށްވެސް މުހުތާޒު ވިދާޅުވިއެވެ.
ރައްޔިތުންގެ މަޖިލީހުގެ ތަޅުމުގައި މިރޭ ހިނގި ހަމަނުޖެހުންތަކާއި ގުޅިގެން "މާރާމާރީ" ގެ މައްސަލަ ޝިޔާމްގެ ފަރާތްޕުޅުން ވަނީ ފުލުހުންގެ މުއައްސަސާއަށް ހުށަހަޅާފައެވެ.
ސޯޝަލް މީޑިޔާގައި ދައުރުވަމުންދާ ވީޑިއޯތަކުން ފެންނަ ގޮތުގައި މެންބަރު ޝިޔާމްގެ ނަން އިއްވާ އޭނާ ނެރުމަށް ސާޖެންޓް އެޓް އާމްސް މަސައްކަތް ކުރެއްވިއިރު މަޖިލީހުގެ ބައެއް އެހެން މެންބަރުން ވަނީ ޝިޔާމް ކޮއްޕާ ހައްދަވާފައެވެ. އަދި އެވަގުތު ގިނަ ބަޔަކު އަޑުގަދަކޮށް ބައެއް މެންބަރުން ޝިޔާމްގެ ގައިގައި އޮޅުލައިގެން ތިބެ މަޖިލީހުގެ ތަޅުމުން ބޭރަށް ނެރެން އުޅޭތަން ފެނެއެވެ.
ރައްޔިތުންގެ މަޖިލީހުގެ ޖަލްސާގައި ގަވާއިދަށް ހުރުމަތްތެރިކޮށް ނުހިއްތަވާ އަޑުގަދަ ކުރެއްވުމުގެ ސަބަބުން ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް ނަން އިއްވުމަށްފަހު މަޖިލީހުގެ ތަޅުމުން ނެރެފައި ވަނީ ގާނޫނުއަސާސީ އިސްލާހު ކުރުމަށް ރޭ 1:30ގައި ޖަލްސާ ފެށިތަނާއެވެ.
ބުއްދި އާ ވިސްނުން ހުރި ކޮންމެ މީހަ ކު ސިފަ ކުރާނީ ތިހެން...