ސިންގަޕޫރުގައި ދިރިއުޅޭ ހިޖުރަވެރި ބިދޭސީ މަސައްކަތްތެރިންނަށް ހާއްސަކޮށްގެން މިހާރަށް ވުރެ ފެންވަރު ރަނގަޅު އެކޮމޮޑޭޝަން ބްލޮކްތަކެއް އަޅާދިނުމުގެ މަސައްކަތް ކުރަމުން އަންނަ ކަމަށް އެގައުމުގެ ސަރުކާރުން ހާމަކޮށްފިއެވެ.
ސިންގަޕޫރުގެ ސަރުކާރުން މިފަދަ މަސައްކަތެއް ފަށާފައި މިވަނީ ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގެ ނުރައްކާ، އެގައުމުގައި މަސައްކަތްކުރާ ބިދޭސީ މުވައްޒަފުންގެ މެދުގައި އިންތިހާއަށް ބޮޑުވި މައްސަލަ ފެންމަތިވެފައިވަނިކޮށެވެ.
ސިންގަޕޫރުގެ ނޭޝަނަލް ޑިވަލޮޕްމަންޓް އަދި މޭންޕަވާ ވުޒާރާއިން އާންމު ކުރި ނޫސް ބަޔާނެއްގައި ބުނެފައިވަނި، މިއަހަރު ނިމުމުގެ ކުރިން، 60000 އެއްހާ ބިދޭސީ މަސައްކަތްތެރިންނަށް އިތުރު ބޯހިޔާވަހިކަން ފޯރުކޮށްދެވޭނެ ކަމަށެވެ. ދިގު މުއްދަތުގެ ޕްލޭނަށް ބަލާއިރު 100000 އެއްހާ ބިދޭސީ، ހިޖުރަވެރި މަސައްކަތްތެރިކަން ހިޔާވަހިކަން ހަމަޖެހިގެންދާނެކަންވެސް މި ބަޔާނުގައި ފާހަގަކޮށްފައިވެއެވެ.
މި ހައުސިންގް ޔުނިޓްތަކަކީ އާންމު ސިއްހީ ބަލިމަޑުކަމެއްގެ ނުރައްކާ ވީހާވެސް ކުޑަވާނެ ގޮތްތަކަށް ބަލައިގެން އިމާރާތް ކުރާނެ ތަންތަން ކަމަށާ، އެގޮތުން ކޮވިޑް-19ގެ ބަލިމަޑުކަމުން ހާސިލުވި ފިލާވަޅުތަކުން އިބުރަތް ހާސިލުކުރާނެ ކަމަށް ސިންގަޕޫރުން ބުނެއެވެ. އަދި މި ޔުނިޓްތައް ފަރުމާކުރާނީ ބައިނަލްއަގުވާމީ ފެންވަރުގައި އެންމެންވެސް މިސާލަކަށް ބަލާނެ ފެންވަރަށް ކަމަށްވެސް ސިންގަޕޫރުން ބުނެއެވެ.
އަލަށް އިމާރާތްކުރާ ހައުސިންގް ޔުނިޓްތަކާ ބެހޭ މައުލޫމާތު އާންމުކުރަމުން ސިންގަޕޫރުން ބުނީ މި ޔުނިޓްތަކުގައި ކޮންމެ މީހަކަށްވެސް އެންމެ މަދުވެގެން 64 އަކަފޫޓުގެ ސަރަހައްދެއް ހާއްސަ ކުރެވޭނެ ކަމަށެވެ. ކޮންމެ ކޮޓަރިއެއްގައިވެސް 10 އެނދަށްވުރެ އިތުރަށް އެނދެއް ނުހުންނާނެ ކަމަށާ، ކޮންމެ 5 އެނދަކަށް އެންމެ މަދުވެގެން 1 ފަހާނާ (ފެންވެރޭ ގޮތަށް) އަދި ސިންކުވެސް ހުންނާނެ ކަމަށް ސިންގަޕޫރުގެ ސަރުކާރުންވަނީ ހާމަކޮށްފައެވެ.
ސިންގަޕޫރަކީވެސް ގިނަ އަދަދަކަށް ބިދޭސީ މަސައްކަތްތެރިން، ހިޖުރަކޮށްގެން ދިރިއުޅެމުންދާ ގައުމކެވެ. އެގޮތުން، 1.4 މިލިއަނެއްހާ ބިދޭސީ މަސައްކަތްތެރިން ސިންގަޕޫރުގައި މަސައްކަތް ކުރާއިރު، މީގެ ތެރޭގައި ގިނައީ ބިނާވެށީގެ ސިނާއަތާ، ލޭބަރުންގެ އިތުރުން ގޭތެރޭ މަސައްކަތުގައި އުޅޭ ބިދޭސީ މަސައްކަތްތެރިންނެވެ.
މިނިސްޓާ އޮފް މޭންޕަވާ ޖޯސެފީން ތިއޯ ވިދާޅުވި ގޮތުގައި 200000 އެއްހާ ބިދޭސީ މަސައްކަތްތެރިން ދިރިއުޅެމުންދަނީ 43 ޑޯމިޓޮރީއެއްގައެވެ. މިއިން ކޮންމެ ޑޯމްރޫމެއްގައި 10 – 20 މީހުން ދިރިއުޅޭއިރު ފެންވަރާ ފާހާނަ ކުރަނީ އެއް ތަނައެއްގައެވެ. ކައިބޮއި ހަދަނީ އެއް ތަނެއްގައެވެ. ނިދާއިރު ދެމީހެއްގެ ދޭތެރޭ ފޫޓެއްގެ ދުރުމިން ކިރިއާ ހުންނަ ކަމެވެ. ޖިސްމާނީ ގައިދުރުކަން ހޯދޭނެ އެއްވެސް ގޮތެއް ނެތެވެ.
ހޯމަ ދުވަހުވެސް ސިންގަޕޫރުން 408 މީހަކު ކޮވިޑް-19އަށް ޕޮޒިޓިވްވެފައިވާއިރު މި ހުރިހާ އެންމެނަކީވެސް އިސްވެ ބަޔާންކޮށްފައިވާ ފަދަ ޑޯމްތަކުގައި ދިރިއުޅޭ މީހުންނެވެ. ސިންގަޕޫރުން ކޮވިޑް-19 ޖެހުނު މީހުންގެ އަދަދު 35929 އަށް އަރާފައިވާއިރު، މީގެ 93.3 ޕަސެންޓް ހިއްސާކުރަނީވެސް ޑޯމްތަކުގައި ދިރިއުޅޭ ފަރާތްތަކެވެ.
