ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ޝިކާރައަކަށްވެ، ބްރެޒިލްއިން ގިނަ އަދަދެއްގެ ކޭސްތަކެއް ރިޕޯޓްކޮށްފިއެވެ.
ފާއިތުވީ 24 ގަޑިއިރެއްހާއިރަށް ބަލާއިރު ބްރެޒީލްއިން 16409 މީހަކު ކޮވިޑް-19އަށް ޕޮޒިޓިވްވެފައިވާއިރު، އެ ގައުމުން ޕޮޒިޓިވްވި މީހުންގެ ޖުމުލަ އަދަދު މިހާރު ވަނީ 514849 އަށް އަރާފައެވެ. މިއާއެކު ބްރެޒީލް ވެފައިވަނީ މުޅި ދުނިޔެއިންވެސް 2 ވަނަ އަށް އެންމެ ގިނަ އަދަދަކަށް ކޮވިޑް-19ގެ ކޭސްތައް ފެންނަމުންދާ ގައުމަށެވެ.
ބްރެޒީލްއިން ކޮވިޑް-19އަށް ޕޮޒިޓިވްވާ މީހުންގެ އަދަދުތައް އިތުރުވާން ފަށާފައި މިވަނީ ބްރެޒީލްވެސް ހިމެނޭ އެމެރިކާ ސަރަހައްދުގައި މި ބަލިމަޑުކަން ނުރައްކާ ދަރަޖައަށް އިތުރުވެގެން ހިނގައިދާނެ ކަމުގެ އިންޒާރު، ޕޭން އެމެރިކަން ހެލްތް އޯގަނައިޒޭޝަންގެ ޑައިރެކްޓާ، ޑރ ކެރިސާ އެޓިނޭ ދެއްވާފައިވާ ދަނޑިވަޅެއްގައެވެ.
ބްރެޒީލްގެ ސިއްހަތާ ބެހޭ ވުޒާރާއިން މައުލޫމާތު ދޭ ގޮތުގައި ފާއިތުވީ 24 ގަޑިއިރު ތެރޭގައި އެގައުމުން ކޮވިޑް-19 ޖެހިގެން 480 މީހެއްގެ ފުރާނަ ވަނީ ގެއްލިފައެވެ. މި ބަލީގައި ބްރެޒީލްއިން މަރުވި މީހުންގެ އަދަދު މިހާރު ވަނީ 29314 އަށް އަރާފައެވެ.
ޖޯންސް ހޮޕްކިންސް ޔުނިވާސިޓީގެ ރެކޯޑްތަކަށް ބަލާއިރު ކޮވިޑް-19ގައި 4 ވަނައަށް އެންމެ ގިނަ އަދަދެއްގެ ބަޔަކު މަރުވެފައިވަނީވެސް ބްރެޒީލްއިންނެވެ. ކަންމިހެން އޮތްރިރު ބްރެޒީލްގެ ވެރިކަމާ ހިސާބުން ކޮވިޑް-19އަށް އެންމެ ފުރިހަމަ އެއްބާރުލުން ނުލިބޭ ކަމަށް ބުނެ، ދުނިޔޭގެ އެކި ކަންކޮޅުތަކުން ދަނީ ބްރެޒީލްއަށް ފާޑުކިއުންތައް އަމާޒު ކުރަމުންނެވެ.
ބައި މިލިއަން.