މިދުވަސްވަރު ކުޑަކުދިން އަތަށް ފޯނު ނުދިނުމަށް ޑރ. އިބްރާހިމް އަފްޒަލް ހަނދާން ކޮށްދެއްވައިފިއެވެ.
ކޮވިޑް-19ގެ ފަހުގެ މައުލޫމާތު ދިނުމަށް ދަރުބާރުގޭގައި ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ، މިދުވަސް ވަރު ތިމާގެ ފޯނަކީ ހަމައެކަނި ތިމާ ބޭނުން ކުރަން ޖެހޭ އެއްޗަކަށް ހެދުން މުހިންމު ކަމަށެވެ. އަދި ހާއްސަކޮށް ކުޑަކުދިން އަތަށް ފޯނު ނުދިނުމުނަށް ޑރ. އަފްޒަލް އިރުޝާދު ދެއްވިއެވެ.
ޑރ. އަފްޒަލް ވިދާޅުވީ، ގިނަގިނައިން ހޭންޑް ސެނިޓައިޒާ ބޭނުންކޮށްގެން ފޯނު ސާފު ކުރުމަކީ ވެސް މުހިންމު ކަމެއް ކަމަށެވެ.
ފޯނުގެ އިތުރުން ގޭތެރެ ސާފު ކުރުމުގައި ވެސް ޑރ. އަފްޒަލް ވަނީ އިރުޝާދު ދެއްވާފައެވެ. އެގޮތުން އެންމެ ގިނައިން ސާފު ކުރަން ޖެހޭނީ އެންމެ ގިނައިން އަތް ޖެހޭ ތަންތަން ކަމަށް އޭނާ ވިދާޅުވިއެވެ. އޭގެ ތެރޭގައި މޭޒުތަކާއި، ދޮރުގެ އަތްގަނޑާއި، އިސްކުރު އަދި ތުވާލު އަޅުވާ ރެކްގެ އިތުރުން ސިޑީގެ ރެއިލިން ފަދަ ތަންތަން ހިމެނެއެވެ.
ތަންތަން ސާފު ކުރުމަށް ބޭނުން ކުރާނީ 20 އެމްއެލް ބްލީޗާއި 1 ލީޓަރުގެ ފެން ކަމަށް ޑރ. އަފްޒަލް ވިދާޅުވެއެވެ. އަދި މި ސޮލިއުޝަން ކޮންމެ 24 ގަޑިއިރަކުން އެއް ފަހަރު އާ ކުރަން ޖެހޭ ކަމަށް އޭނާ ވިދާޅުވިއެވެ.
މި ސޮލިއުޝަން ކުޑަކުދިންނަށް އަތު ނުޖެހޭ ހިސާބުގައި ބެހެއްޓުމަށާއި، މި ސޮލިއުޝަން ބޭނުން ކޮށްގެން ކާބޯތަކެތި ސާފު ނުކުރުމަށް ޑރ. އަފްޒަލް އިރުޝަދު ދެއްވިއެވެ. އޭނާ ވިދާޅުވީމ ކާބޯތަކެތި ދޮންނަން ވާނީ ސާފު ފެނުން ކަމަށެވެ.
