ކޮވިޑް-19 ފެތުރެމުން ދާ މި ދަނޑިވަޅުގައި މާލެ ސަރަހައްދު ލޮކްޑައުންގެ ހާލަަތުގައި އޮތް ނަމަވެސް މާދަމާ ހާއްސަ ފިޔަވަޅު ތަކާއެކު ރައްޔިތުންގެ މަޖިލީހުގައި ޖަލްސާއެއް ބާއްވަން ހަމަޖެއްސުމުމް އެ ޖަލްސާ ބޭއްވުމަށް ހުރަސް އަޅާ ފަރާތްތަަކަށް ފިޔަވަޅު އެޅުމަކީ މަޖިލީހުގެ ރައީސްއަށް ލާޒިމު ކަމެއް ކަމަށް މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.
މީގެ އިތުރުން އާޒިމް ވިދާޅުވެފައިވަނީ މަޖިލީހުގެ މަސައްކަތްތަކަށް އެއްވެސް ފަރާތްތަކަށް ހުރަސް ނޭޅޭނެ ކަމަށް ވިދާޅުވެފައެވެ.
ހާއްސަ ފިޔަވަޅު ތަކާއެކު ރައްޔިތުންގެ މަޖިލީހުގައި މާދަމާ ޖަލްސާއެއް ބާއްވަން ހަމަޖެއްސުމަށް ނިންމާފައި ވަނީ މިހާރު ލޯކަލް ކައުންސިލްގެ ދައުރު އަންނަ މަހުގެ 2 ވަނަ ދުވަހަށް ހަމަވާތީ އޭގެ ކުރިން ގާނޫނު އަސީސީއަށް އިސްލާހު ގެނެސް ނިންމަން ޖެހޭ ކަންކަން ނިންމުމަށް ކަމަށް ބުނެއެވެ.
އެހެންކަމުން މި މަހުގެ 26 ވަނަ ދުވަސް (މާދަމާ) ޖަލްސާތައް ނުފަށާ އެ ތާރީހަށް ނިންމޭނެ ކަމަށް ދެކެވަޑައި ނުގަންނަވާތީ ޖަލްސާތައް ބޭއްވުމަކީ މުހިއްމު ކަމެއް ކަމަށް ގިނަ މެންބަރުން ދެކެވަޑައިގަންނަވާ ކަމަށް ރައީސް މުހައްމަދު ނަޝީދު ވަނީ ވިދާޅުވެފައެވެ. އަދި 28 ވަނަ ދުވަސް އަންނަން ދެން މަޖިލީހުގެ ޖަލްސާތައް ފަސްކުރެވެން ނެތް ކަމަށް ޑިރެކްޓާ ޖެނެރަލް އޮފް ޕަބްލިކް ހެލްތު މައުމޫނާ އަބޫބަކުރަށް ރައީސް ނަޝީދު ވަނީ އަންގަވާފައެވެ.
މާދަމާ މަޖިލީހުގެ ތަޅުމުގައި ޖަލްސާ ބާއްވަން ބައެއް މެންބަރުން ދެކޮޅު ހައްދަވާފައި ވާއިރު އެ މެންބަރުން ވިދާޅުވަނީ ކޮވިޑް-19 އާ ގުޅިގެން މިހާރު މިއޮތް ހާލަތުގައި ގޭގައި ތިއްބަވައިގެން މަޖިލީހުގެ ބަހުސް ކުރިއަށް ގެންގޮސް ވޯޓު ދެވޭ އިރު ކޮންމެހެން މަޖިލީހަށް ހާޒިރު ވުން ރަނގަޅުނޫން ކަމަށެވެ.
ކޮވިޑް-19 ފެތުރެމުން ދާ މި ދަނޑިވަޅުގައި މާލެ ސަރަހައްދު ލޮކްޑައުންގެ ހާލަަތަށް ގެނެސްފައި ވާ އިރު އެކަމަށް ރައްކާތެރި ވުމަށް ގަނޫނީ ގޮތުން އަމުރުތައް ނެރެފައިވާ ހިނދު އެ އަމުރުތަކަށް ރައްޔިތުން މަޖިލީހުގެ މެންބަރުން ވެސް ތަބާވާން ޖެހޭ ކަމަށާއި މަޖިލީހަށް ދެވޭނި ހާއްސަ ހުއްދައެއް ލިބިގެން ކަމަށް ވިލިމާލެ ދާއިރާގެ މެންނަރު އަހުމަދު އިޝާމް ވަނީ ވިދާޅުވެފައެވެ. މީގެ އިތުރުން ތިމަރަފުށީ ދާއިރާގެ މެންބަރު އަބްދުﷲ ރިޔާޒްވެސް ވަނީ މާދަމާ މަޖީލިހަށް ދެވޭނީ އެޗްޕީއޭ ނުވަތަ ފުލުހުންގެ ހުއްދައެއް ލިޔުމުން ލިބިގެން ކަމަށް ވިދާޅުވެފައެވެ. އަދި އެކަން ރިޔާޒް ވަނީ މަޖިލީހަށް ވެސް އަންގާފައެވެ.
