އޯލެވެލް ސެޓްފިކެޓް ލިބުން ލަސްވާތީ ޓްރާންސްކްރިޕްޓް ބޭނުން ކުރުމަށް އެޑިއުކޭޝަން މިނިސްޓްރީން އިލްތިމާސްކޮށްފިއެވެ.
އެޑިއުކޭޝަން މިނިސްޓްރީން ނެރުނު ބަޔާނެއްގައި ބުނީ، 2019 ވަނަ އަހަރުގެ އޮކްޓޯބާ ނޮވެމްބާގައި އޭލެވެލް އަދި އޯލެވެލް އިމްތިހާން ހެދި ދަރިވަރުންގެ ސެޓްފިކެޓް ލިބުން ލަސްވެފައިވާ ކަމަށެވެ. އަދި ސެޓްފިކެޓް ލިބުމުގެ ކުރިން މަތީ ތައުލީމުގެ ފުރިސަތަށް އެދި ހުށަހަޅަން ބޭނުންވާ ދަރިވަރުންނަށް މިހާރު ދޫކޮށްފައިވާ ޓްރާންސްކްރިޕްޓް ބޭނުން ކުރެވޭނެ ކަމަށް އެ މިނިސްޓްރީން ބުނެއެވެ.
އެ މިނިސްޓްރީން ބުނީ، ޓްރާންސްކްރިޕްޓްގެ އިތުރުން ނަތީޖާގެ ކަށަވަރުކަން ޔަގީންކުރުމަށް އިތުރު ލިޔުމެއް ބޭނުންވާނަމަ ޑިޕާޓްމަންޓް އޮފް ޕަބްލިކް އެގްޒަމިނޭޝަންސް އަށް އެކަމަށް އެދި ހުށަހެޅުމުން އެފަދަ ލިޔުމެއް ލިބޭނެ އިންތިޒާފު ހަމަޖެހިފައިވާ ކަމަށެވެ. އަދި މިގޮތަށް އެދި ހުށަހަޅާނީ ޕަބްލިކް އެގްޒަމިނޭޝަންގެ މެއިލް އަށް ކަމަށް އެޑިއުކޭޝަން މިނިސްޓްރީން ބުނެއެވެ.
އޭލެވެލް އަދި އޯލެކެވެ ސެޓްފިކެޓްތަކަކީ އެ ޔުނިވާސިޓިތަކުން ޕްރިންޓްކޮށް ސީލްޖަހައިގެން ސެންޓަރުތަކަށް ފޮނުވާ އެއްޗެލެވެ. އަސި ސެޓްފިކެޓްތައް ޕްރިންޓްކުރަނީ ރީޗެކް މަރުހަލާ ނިމި ދަރިވަރުންގެ ނަތީޖާ ކަށަވަރުވީމައެވެ.
ނަމަވެސް މި މަރުހަލާ ނިމި ސެޓްފިކެޓްތައް ފޮނުވުމާއި ހަމައަށް އައިއިރި ކޮވިޑް-19ގެ ސަބަބުން އިނގިރޭސިވިލާތާއި އަދި އެހެން ގައުމުތަކުގެ އެއާޕޯޓްތައް ބަންދުކޮށް އެ ގައުމުތައް ވަނީ ލޮކްޑައުންކޮށްފައެވެ. އެހެންކަމުން ސެޓްފިކެޓްތައް ރާއްޖެއަށް ގެނައުމުގައި ހުރި ގޮންޖެހުންތަކުގެ ސަބަބުން ސެޓްފިކެޓްތައް އަދި ރާއްޖެއާ ހަމައަށް ގެނެވިފައި ނުވާ ކަމަށް އެޑިއުކޭޝަން މިނިސްޓްރީން ބުނެއެވެ.
އެޑިއުކޭޝަން މިނިސްޓްރީން ބުނީ، ސެޓްފިކެޓަތައް ނުލިބި ލަސްވަނީ އިމްތިހާބުތައް ފޯރުކޮށްދޭ މައިމަރުކަޒުތަކުން ސެޓްފިކެޓަތައް ފޮނުވުމުގައި ދިމާވެގެން އުޅޭ ފަތިތަކެއްގެ ސަބަބުން ކަމަށެވެ. އަދި ސެޓްފިކެޓްތައް ލިބުނުހާ އަވަހަކަށް ދަރިވަރުންނަށް ދޫކުރުމުގެ އިންތިޒާމް ހަމަޖައްސާނެ ކަމަށެވެ.
