ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)އާ ގުޅިގެން ބައެއް ކުޑަކުދިންގެ ހަށިގަނޑުން ފެންނަމުންދާ އާދަޔާ ހިލާފު އަލާމާތްތައް ނުވަތަ މަލްޓިސިސްޓަމް އިންފްލަމޭޓަރީ ސިންޑްރޯމް (މިސް-ސީ) އަކީ ވަގުތުން ވަގުތަށް ސިއްހީ ފަރުވާ ބޭނުންވާނެ ކަމެއް ކަމަށާ، ބައެއް ހާލާތްތަކުގައި ހޮސްޕިޓަލުގައި އެޑްމިޓް ކޮށްގެންވެސް ފަރުވާ ދޭންޖެހޭ ކަމަށް ޑޮކްޓަރުން ވިދާޅުވެއްޖެއެވެ.
އެމެރިކާގެ ސެންޓާޒް ފޮ ޑިޒީޒް ކޮންޓްރޯލް އެންޑް ޕްރިވެންޝަން އިންތިޒާމު ކޮށްގެން ކުރިއަށް ގެންދިޔަ ބައްދަލުވުމެއްގައި ޑޮކްޓަރުން ވިދާޅުވީ މިއާ އަލާމާތްތައް ފެންނަ ކުދިންގެ ހިތަށް ގެއްލުން ލިބޭ ކަމަށާ، މިކަމަކީ ވަގުތުން ވަގުތަށް ފަރުވާ ބޭނުންވާނެ ކަމެއް ކަމަށެވެ.
މި އާ އަލާމާތްތައް ފެންނަ ބައެއް ކުދިންނަކީ ބަލީގެ އަލާމާތެއް ނުފެންނަތާ، ކޮވިޑް-19އަށް ނެގެޓިވް ވެފައިވާ ކުދިންނަށް ވީ ނަމަވެސް، މިކަމަކީ ކޮވިޑް-19އާ ގުޅުމެއް އޮތް ކަމެއްކަން ޔަގީނާ ގާތަށް ކަށަވަރު ވެފައިވާ ކަމަށްވެސް ޑޮކްޓަރުން ވިދާޅުވެއެވެ.
މި އާ ސިންޑްރޯމް ފެންނަން ފަށަނީ ކޮވިޑް-19އަށް އިންފެކްޓް ވާތާ ގާތްގަނޑަކަށް 2-6 ހަފުތާއާ ދެމެދު މުއްދަތެއްގެ ތެރޭގައެވެ. އަދި މި ބަލި އާންމުކޮށް ފެންނަނީ މީގެ ކުރިން މުޅިން ރަނގަޅަށް ތިބި ކުދިންގެ ކިބައިން ކަމަށްވެސް ބުނެވެއެވެ.
އާ ސިންޑްރޯމްގެ އަލާމާތް ތަކަކީ ކޮވިޑް-19ގެ އާލާމާތްތައް ނޫން ކަމަށާ، މި ސިންޑްރޯމްގެ އަލާމާތްތަކުގެ ތެރޭގައި ހުން އައުމުގެ އިތުރުން ބަނޑުގައި ރިއްސުން، ހޮޑުލުން އަދި ގައިގެ ތަންތަން ރަތްވުން ފަދަ އަލާމާތްތައް ފެންނަ ކަމަށް ތަޖުރިބާކާރުން ބުނެއެވެ.
އެމެރިކާގެ ސީޑީސީއިން ވަނީ އާ ސިންޑްރޯމްގެ އަލާމާތްތަކަށް ސަމާލުވުމަށް އެގައުމުގައި މަސައްކަތް ކުރައްވާ ކުޑަކުދިންގެ ޑޮކްޓަރުންނަށް ގޮވާލާފައެވެ.
ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)އާ ގުޅިގެން ބައެއް ގައުމުތަކުގައި ކުޑަކުދިންނަށް، ވަރަށް މަދުން ނޫނީ ނުޖެހޭ ޒާތުގެ އިންފްލަމޭޓަރީ ބައްޔެއް ޖެހެމުން ދާކަމަށް ބައެއް ގައުމުތަކުން ދަނީ ރިޕޯޓްކުރަމުންނެވެ.
އިންފްލަމޭޓަރީ ޑިޒީޒް އަކީ ބައެއް ކަހަލަ އިންފެކްޝަން ތަކާ ވައިރަސް ތަކާ ގުޅިގެން މެދުވެރިވާ ހާލަތަކެވެ.
މިހާތަނަށް މިފަދަ ކޭސްތައް ރިޕޯޓް ކުރަމުން ދާ ގައުމުތަކުގެ ތެރޭގައި އެމެރިކާ، އިނގިރޭސިވިލާތް އަދި އިޓަލީވިލާތް ހިމެނެއެވެ. މިއީ ހަލުވިކަމާއެކު ފެތުރެމުންދާ ކޮވިޑް-19ގެ ބަލިމަޑުކަން އޭގެ އެންމެ ސީރިއަސް ދަރަޖާގައި ފެތުރިފައިވާ ގައުމުތަކެވެ.
މި ބަލީގެ އަލާމާތްތައް އެންމެ އެއްގޮތީ، ޓޮކްސިކް ޝޮކް ސިންޑްރޯމްގެ އަލާމާތް ތަކާއެވެ.
